ဗၠာဲသၟိၚ်ထိၚ်ရး နူကဵုယှိုဲကျေန်ညံၚ်လေဝ်ပေန် ဒးဒုၚ်ရပ်တုဲဂှ် ပဳဒဳအာဖ်တံ ဘဗလညးဍုၚ်ကွာန်တံဂးတုဲ ရဲထံက်ဂလာန်ဒပ်ပၞာန်တံ တြးပရိုၚ်ဗၠေတ်

ဒး၊ ဗၠေတ်

မ္ၚဵုရအဴ။ ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရ။

တ္ၚဲဏံ ပရူပရာ မပါလုပ် ပ္ဍဲဗီုဓာတ် အကံက်ပ္တောံကံၚ်ဇြဳပၞာန်တံ မတြးဒၟံၚ် “ကိုဝ်ညုၚ်ဠေန် မဒှ်ညးဒုၚ်တာလျိုၚ် ပရေၚ်ပြုပြေၚ်ပၞာန်ရးလ္ဂုၚ် NUG ကဵု ဂကောံညးတံ စၟဳစၟတ်ဒၟံၚ်ယာန်၊ ဂစိုတ်ဒၟံၚ် ညးဍုၚ်ကွာန်သ္ကုတ်ဂၠံၚ် ယှိုဲကျေန်ညံၚ်လေဝ်ပေန်၊ ပွိုၚ်ဍုၚ်ညံၚ်လေဝ်ပေန်၊ ရးဒေသဇၞော်ဗဂေါတံရောၚ်” ဂှ် စၟဳတ်ကဵုအာရောၚ် မဒှ်ရ။

ပရူပရာဏံဂှ် နူကဵုထလဳဂရာမ်ချာန်နေဝ် PEOPLE MEDIA, Han Nyein Oo ကေုာံ We love Myanmar ၊ မျဵုချေတ်တံ ချူတြးလဝ်ဝါဒ လ္တူအောန်လာၚ်ရ။

စပ်ကဵု ပရူပရာ မပါလုပ် ပ္ဍဲပသ်ထ် ကေုာံ ဗီုဓာတ် အကံက်ပ္တောံရဲထံက်ဂလာန်ဒပ်ပၞာန်တံ မတြးဒၟံၚ်ဂှ်တုဲ နူကဵုသြၚ်လောန်တိုၚ်(မ်) စၟဳစၟတ်စမ်ရံၚ်ဂှ် ဒဒှ်ရဒှ်ဒၟံၚ်ပရိုၚ်ဗၠေတ် တြးဝါဒမွဲဂှ် စၟဳစၟတ်ဂွံဆဵုကေတ်ရ။

လၟေၚ်ဒဒှ်ဍာံဂှ် ပ္ဍဲဂိတုအဝ်ဂါတ် (၁၁) တေံ နူကဵုကောန်ဂကောံဒပ်ပၞာန်စဵုဒၞါညးဍုၚ်ကွာန် သၟဝ်ပၠတရဴကိုဝ်ဒဳညုၚ်လေန် မဒှ်ညးဒုၚ်တာလျိုၚ် ပရေၚ်ပြုပြေၚ်ပၞာန်ရးလ္ဂုၚ် NUG ဂှ် ရပ်ထိၚ်လဝ် ဗၠာဲသၟိၚ်ထိၚ်ရး ကံၚ်ဇြဳပၞာန် မကဵုဒၟံၚ်ဒဒိုက် ကုညးဍုၚ်ကွာန်တံ ပ္ဍဲကဵုဂၠံၚ်ယှိုဲကျေန်−ညံၚ်လေဝ်ပေန်ဂှ်တုဲ ဒှ်ဒၟံၚ်စၟတ်သမ္တီရုပ်ရမျာၚ်ဏံကဵု ဗီုဓာတ်ဂမၠိုၚ်ဂှ် စၟဳစၟတ်ဂွံဆဵုကေတ်ရ။

ဂကောံ Royal Peacock Column သၟဝ်ပၠတရဴကိုဝ်ဒဳညုၚ်လေန် ညးဒုၚ်တာလျိုၚ် ပရေၚ်ပြုပြေၚ်ပၞာန်ရးလ္ဂုၚ် NUG ဂှ် အခိၚ်ကေတ်ဒၟံၚ်ဂီုကၠီု ပ္ဍဲကဵုဒၞါဲဂၠံၚ် ယှိုဲကျေန်−ညံၚ်လေဝ်ပေန်ဂှ် ရပ်ဂွံလဝ် အံၚ်ကိုဝ်ဝ်နာၚ် ညးမကေတ်လဝ်တာလျိုၚ်ဗၠာဲသၟိၚ်ထိၚ်ရး ပ္ဍဲကဵုဗ္ဒိုပ်ဗၠာဲသၟိၚ်မဒံက်ဂှ်ရ။

ဗၠာဲသၟိၚ်ထိၚ်ရးဏံဂှ်ဝွံ ဘပဠညးဍုၚ်ကွာန်တံတုဲ ကဵုသ္ပရဲကဵုပရိုၚ်ကီု၊ အာတ်လှုဲတံကီု၊ ရပ်ဒက်ကောန်ဂကောံဒပ်ညးဍုၚ်ကွာန်တံ၊ ဂစိုတ်ဂယိုၚ်တံ ကၠောန်သ္ပလဝ်ဂှ် ဒဒှ်ရဂၠိုက်ဂၠါဲစၟဳတ်ကေတ် လ္ဂောံကဵုတၚ်နၚ် မၞုံပ္ဍဲဖုၚ်တဲညးဂှ် ဂွံတီကေတ် အတိုၚ်တၚ်လလောၚ်ပ္တိတ် နူကဵု Royal Peacock Column ကဵု ဌာန်ပရိုၚ်ဗၠးၜးဂမၠိုၚ်ရ။

စၟတ်သမ္တီဗီုရုပ် နူကဵု Royal Peacock Column ရပ်ဒက်ဒၟံၚ် ဗၠာဲသၟိၚ်ထိၚ်ရး ကံၚ်ဇြဳပၞာန်တံဂှ် လလောၚ်ပ္တိတ်လဝ်တုဲ နူကဵုအကံက်ထံက်ဂလာန်ဒပ်ပၞာန်တံ ရပ်စပ်ကေတ် ဗီုဓာတ်စၟတ်သမ္တီတံဏံဂှ်တုဲ ဗီုဒးစိုတ်ချူတြးဒၟံၚ်ဝါဒ တြးဒၟံၚ်ပရိုၚ်ဗၠေတ်တံဂှ် စၟဳတ်ဂွံဆဵုကေတ်ရ။

တၚ်လလောၚ်တြး Royal Peacock Column သၟဝ်ပၠတရဴညးဒုၚ်တာလျိုၚ် ပရေၚ်ပြုပြေၚ်ပၞာန်ရးလ္ဂုၚ် ကိုဝ်ဒဳညုၚ်လေန် လလောၚ်တြးလဝ်ဂှ်

http://surl.li/kfods

ဌာန်ပရိုၚ် People’s Spring ထ္မံက်ထ္ၜးလဝ်ဂှ်

http://surl.li/kfodx

ဌာန်ပရိုၚ် MYANMAR Pressphoto Agency ထ္မံက်ထ္ၜးလဝ်ဂှ်

http://surl.li/kfoec

ဟိုတ်နူတၚ်နၚ်တံဏံတုဲ ပရူပရာ မပါလုပ် ပ္ဍဲဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “ကိုဝ်ညုၚ်ဠေန် မဒှ်ညးဒုၚ်တာလျိုၚ် ပရေၚ်ပြုပြေၚ်ပၞာန်ရးလ္ဂုၚ် NUG ကဵု ဂကောံညး စၟဳစၟတ်ဒၟံၚ်ယာန်၊ ဂစိုတ်ဒၟံၚ် ညးဍုၚ်ကွာန်သ္ကုတ်ဂၠံၚ် ယှိုဲကျေန်ညံၚ်လေဝ်ပေန်၊ ပွိုၚ်ဍုၚ်ညံၚ်လေဝ်ပေန်၊ ရးဒေသဇၞော်ဗဂေါတံရောၚ်” ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။

သြၚ်လောန်တိုၚ်(မ်)