ကံၚ်ဇြဳပၞာန်ကဵု TNLA တအ် ပ္ဍဲမွဲတ္ၚဲဓဝ် ပေါဲဗတိုက်ဒှ်လဝ် (၃) အလန်

လာယှိုဝ် – အဝ်ဂါတ်(၂၂)

တွဵုရးသေံ၊ ပ္ဍဲဍုၚ်လာယှိုဝ်ကဵု ဍုၚ်ကွောတ်ခိုၚ်ဂှ် ဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူတအာၚ် (TNLA)တအ် ဂိတုအဝ်ဂါတ် စၟတ်တ္ၚဲ (၁၉) ပ္ဍဲပွိုၚ်မွဲတ္ၚဲဓဝ်ဂှ် ပေါဲဗတိုက်ဒှ်လဝ် စဵုကဵု (၃)အလန်ရဂှ် TNLA လလောၚ်တြးလဝ်ပရိုၚ်ရ။

ဟိုတ်နူဒပ်ကံၚ်ဇြဳပၞာန်သီအဝဵု ထ္ပက်လုပ်ကၠုၚ်ကရောၚ်ပၞာန်တုဲ ပ္ဍဲပွိုၚ်ဍုၚ်လာယှိုဝ်ဂှ် ပေါဲဗတိုက်ဒှ်လဝ် (၁)အလန်တုဲ ပ္ဍဲဍုၚ်ကွောတ်ခိုၚ်ဂှ် ဒှ်လဝ် စဵုကဵု (၂)အလန်ရ။

ပေါဲဗတိုက်ဒှ်လဝ် ပ္ဍဲပွိုၚ်ဍုၚ်လာယှိုဝ်ဂှ် ဟိုတ်နူထ္ပက်လုပ်ကၠုၚ်ကရောၚ်ပၞာန် နကဵုကွဳစက် (၂)ဖ္ဍိုက် ပ္ဍဲသိန္နဳ ဒၞာဲဒပ် TNLA နွံဒၟံၚ်ဂှ်တုဲ ဒှ်လဝ်ရဂှ် ဟီုလဝ်တုဲ ပ္ဍဲမာန်ပါန် ပွိုၚ်ဍုၚ်ကွောတ်ခိုၚ်ဂှ်လေဝ် ဟိုတ်နူထ္ပက်ကၠုၚ်ကရောၚ်ပၞာန်တုဲ ဒှ်လဝ်ပရေၚ်ဇီုကပိုက်ဆေၚ်မုက်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် ကဵုရေၚ်ကွဳစက်ကံၚ်ဇြဳပၞာန် ကွဳစက် (၂၁)ဖ္ဍိုက် ဖ္ဍိုက်လဝ်လွဟ်လက်နက်ပၞာန် နူဍုၚ်ကွောတ်ခိုၚ်ဂှ်လေဝ် ဒှ်လဝ်ပေါဲဗတိုက်ဏီရဂှ် ဓမံက်လဝ် ပ္ဍဲတၚ်လလောၚ်တြး TNLA ရ။

ပ္ဍဲပေါဲဗတိုက်ဆေၚ်မုက် က္တဵုဒှ်ဒၟံၚ်ပြဟ်ဟ်လၟုဟ်ဏံ အကာဲအရာပရေၚ်ဇီုကပိုက်ၜါလ္ပာ် သောဲသောဲဗြောဲဂှ် ဟွံဂွံဓမံက်ထ္ၜးလဝ် ပ္ဍဲတၚ်လလောၚ်တြးဏီဂှ်ရ နကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်လဝ် ညးတာလျိုၚ် TNLA ကီုလေဝ် ကေတ်အဆက် ဟွံဂွံဏီရ။

နူဂိတုဂျူလာၚ် စၟတ်တ္ၚဲ (၂၃)တုဲကၠုၚ်တေံ ပ္ဍဲပေါဲဗတိုက် ကံၚ်ဇြဳပၞာန်သီအဝဵုကဵု ဒပ် TNLA တအ်ဂှ် လ္ပာ်ကံၚ်ဇြဳပၞာန် ဒးချိုတ်လဝ် ဟွံအောန်နူ (၂၅)တၠတုဲ ရပ်သီဂွံလဝ် ဂၠုဲပၞာန် ကေုာံ လွဟ်လွဟ်လက်နက်မကမ်တအ်ရဂှ် TNLA ကဵုလဝ်သမ္တီရ။

ပရိုၚ် – သြၚ်လောန်တိုၚ်(မ်)

ဗီုရုပ် – TNLA