ပ္ဍဲကရေၚ်ဍာဲ ပေါဲဗတိုက်သ္ကာတ်မြဟ်ဒၟံၚ် အရိုဟ်ရိုဟ်တ္ၚဲ

လွိုၚ်ကဝ် – အဝ်ဂေတ်(၂၂)

ပ္ဍဲဂၠံၚ်ဇၞော်ကၟိန်ဍုၚ် ဒှ်ဂၠံၚ်ဇၞော်အဓိက်ဆက်စၠောံလဝ် လွိုၚ်ကဝ် – ဒဳမအ်ဇြော – ဖရူဇြော၊ တွဵုရးကရေၚ်ဍာ်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်သ္ကာတ်မြဟ် က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲရဂှ် PDF တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္ပတံနူ ဂိတုအဝ်ဂါတ်မံက် တုဲကၠုၚ်တေံတုဲ ပ္ဍဲမွဲဗွိုၚ် ဗ္ဒာဲဍုၚ်ဒဳမအ်ဇြောဂှ် ပေါဲဗတိုက်တအ်သ္ကာတ်မြဟ်ဒၟံၚ်တုဲ စဵုကဵုဂိတုအဝ်ဂါတ် စၟတ်တ္ၚဲ (၂၁) တ္ၚဲဏံ အခိၚ်နူဂယးဂှ် ပရေၚ်ဇီုကပိုက်ဆေၚ်မုက်တအ် နွံဒၟံၚ်ရ။

ပ္ဍဲပေါဲဗတိုက်ဆေၚ်မုက်တအ်ဂှ် သွက်ဂွံကလေၚ်သီကေတ် ကုန်ဗဒိုပ်မေဝ်သေအ် ပ္ဍဲဗစပ်ပယျဵု သေံ-ကရေၚ်ဍာဲ ဒပ်ကံၚ်ဇြဳပၞာန်ဒးဗလးထောံလဝ်တဲဂှ် ဟိုတ်နူဍိုက်ထ္ပက်ကၠုၚ်ကရောၚ်ပၞာန် နဇြဟတ်ပေၚ်ၚ်တုဲ လ္ပာ် PDF တအ်ကြတ်ဗတိုက်ဒၟံၚ်ဂှ်ရ ပေါဲဗတိုက်က္တဵုဒှ်လဝ်ရဂှ် ညးတာလျိုၚ် PDF ဒဳမအ်ဇြော ဟီုသ္ဂးလဝ်ရ။

“ပရေၚ်ပန်ပှော် အဓိကဂှ်တှ်ေ ဂၠံၚ်ကၟိန်ဍုၚ်ဏံရ။ သွက်ဂွံထိၚ်ဒဝ်ဂၠံၚ်ကၟိန်ဍုၚ်မာန်ရ ဂၠံၚ်ဏံ ယဝ်ရဍေံတအ် ထိၚ်ဒဝ်ဂွံအာဏောၚ်တှ်ေ ပ္ဍဲတံဒပ်ဍေံတအ် နွံဒၟံၚ်ဂတတေံဂှ် ပလံၚ်ကဵုဇွောံမ ဂွံဏောၚ်။ ဇွောံမစၞစတအ်၊ လွဟ်လက်နက်တအ် ပလံၚ်ဂွံဏောၚ်။ ဂၠံၚ်ဇၞော်ကၟိန်ဍုၚ် အဓိကဂှ်တှ်ေ ဒှ်ဒၟံၚ် အကြာဒဳမအ်ဇြောကဵု ဖရူဇြောရလေဝ်ဏး။ ပွိုၚ်ဍုၚ်ဒဳမအ်ဇြောကဵု ဂၠံၚ်ကၟိန်ဍုၚ်ရ ဒှ်မံၚ်အကြာ မွဲဗွိုၚ်ဏံရ။ ထ္ပက်ဒၟံၚ်ကရောၚ်ပၞာန်နွံဒၟံၚ်ဂှ်ရ ပေါဲဗတိုက်ဂှ်တှ်ေ နွံဒၟံၚ်ကြပ်ဒှ် အရိုဟ်တ္ၚဲရ”ဂှ် ညးတာလျိုၚ် PDF ဒဳမအ်ဇြောဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂၠံၚ်ဇၞော်ကၟိန်ဍုၚ်ဂှ် ဒှ်ဂၠံၚ်ဇၞော်အဓိက ဆက်စၠောံဗၞိက်ပယျဵု နူကဵုဍုၚ်ဇၞော်တွဵုရးကရေၚ်ဍာဲလွိုၚ်ကဝ် စဵုကဵုပယျဵု သေံ-ကရေၚ်ဍာဲ Bp – 13 မာန်ရ။

သွက်ဂွံထိၚ်ဒဝ်ဂၠံၚ်ဇၞော်စှ်ေကိုန်အဓိဏံမာန်ဂှ် လ္ပာ်ကံၚ်ဇြဳပၞာန် မ္ၚးနူကမ်လှောဝ်တောဲ၊ ကွဳစက်ခြပ်ပသဲ၊ ကွဳစက်အမၠံက်တအ်တုဲ သုၚ်စောဲဒၟံၚ်ဗုမ် ပံၚ်-၅၀၀ ကဵုက္ၜၚ်ကျာရဂှ် ဂကောံဇြဟတ်ပၠန်ဂတးတအ် ဟီုသ္ဂးလဝ်ရ။

ကံၚ်ဇြဳပၞာန် သုၚ်စောဲကၠုၚ်ဒၟံၚ်ဇြဟတ် လောန်လောန်ၜက်က်တုဲ ၜိုန်ရဗတိုက်ဒၟံၚ်ကီုလေဝ် ပ္ဍဲပရေၚ်ဇီုကပိုက်ဆေၚ်မုက်ဂှ် ပရေၚ်ချိုတ်ဂျိုၚ် နွံဂၠိုၚ်ဒၟံၚ်တုဲ စဵုကဵုသၞာဲဒဴတအ် ဒးချိုတ်လဝ် နွံကၠုၚ်ဒၟံၚ်ရ။

သ္အာၚ်နူဂှ်ပၠန် ပ္ဍဲဂိတုအဝ်ဂေတ် စၟတ်တ္ၚဲ (၁၀)တုဲကၠုၚ်တေံ ပ္ဍဲကဵုပေါဲဗတိုက်ဂှ် ဒုသ္ကိုပ်တံဒပ် နူဒပ်သၟဝ်တဲၝောံဒပ် – ၅၅ မွဲတၠ ကေုာံ ပ္ဍဲစၟတ်တ္ၚဲ (၁၂)ဂှ်လေဝ် ဗိုလ်ဇၞော်မွဲတၠ ဒးချိုတ်လဝ် ပ္ဍဲပေါဲဗတိုက်ရဂှ် ဒပ်ပၠန်ဂတးတအ် ကဵုလဝ်သမ္တီရ။

အခိၚ်လၟုဟ်ဏံမ္ဂး ဒပ်ကံၚ်ဇြဳပၞာန် ဆုတ်ပ္တိတ်လဝ်ဒပ်တုဲ ကၠောန်သ္ပဒၟံၚ် ပရေၚ်ဗပေၚ်ဇြဟတ်တုဲ ပေါဲဗတိုက်တအ် သာသ္ကာတ်မြဟတ်တိုန်ကၠုၚ်မာန်ဒၟံၚ်ရဂှ် ဂကောံဇြဟတ်ပၠန်ဂတးတအ် လလောၚ်တြးလဝ်ရ။

ဂၠံၚ်ဇၞော်ကၟိန်ဍုၚ် ပေါဲဗတိုက်သ္ကာတ်မြဟ် က္တဵုဒှ်ဒၟံၚ်ဂှ် ဒှ်ဂၠံၚ်ဖံက်ဆက်စၠောံလဝ်ကဵု ဍုၚ်တံၚ်ဥူ – လုက်တိုဝ် – ယာဒိုဝ် – ဟိုဝ်ပုမ် လက်ထက်အလဵုအသဳ NLD တုဲ ပ္ဍဲသၞာံ ၂၀၂၀ ဂှ် ဓမံက်လဝ်ရုပ်ရဴ ဗစိုပ်လဝ်ဒတုဲရဂှ် ဂွံတီကေတ်လဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNDF(ဃောသီဂွံလဝ် လွဟ်လက်နက်ကံၚ်ဇြဳပၞာန်)