ဟိုတ်နူပန်ဖျေံဒၟံၚ်လွဟ်ဇၞော် ပ္ဍဲပွိုၚ်ဍုၚ်မုမ် KNU တုဲ ကွာန် (၁၁) ကွာန်ဒးပါဲဒၟံၚ်ဘဲပၞာန်

မုမ်၊ အဝ်ဂါတ်(၂၃)

ပ္ဍဲပွိုၚ်ဍုၚ်မုမ် တိဍာ် ဒပ်မဟာ (၃) ဗော်သွးကောန်ဂကူကရေၚ် KNU ဂှ် နူကဵုဒပ်ကံၚ်ဇြဳပၞာန် မ္ၚးနူလွဟ်ဇၞော်တုဲ ဟိုတ်နူပန်ဗတိုက်ဒၟံၚ်ကဵုဒရုမ် အဆက်ဟွံပိုတ်သ်ကုတ်ဂှ်ရ ညးဒေသနူကွာန် (၁၁)ကွာန်တအ် ဒးဂြိပ်ဒဴပါဲဓလေတ်ဒၟံၚ်ရဂှ် ဗဟဵု KNU လလောၚ်တြးလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၂) ရ။

တံဒပ်ပၞာန်တိုက်ကံၚ်ဇြဳပၞာန် ခမရ (၃၀၇) ကေုာံ ခမရ(၄၃၉) ဖျေံသ္ဇိုၚ်ပွိုၚ်ဍုၚ်မုမ်တအ်ဂှ် သ္ပတံနူ ဂိတုအဝ်ဂါတ် စၟတ်တ္ၚဲ (၁၉)တုဲ ပေါဲဗတိုက်ဟၟဲမွဲသာ် ပန်ဖျေံဒၟံၚ်လွဟ်ဇၞော် ပ္ဍဲကွာန်တေတ်ဖျူဇြုက် ကေုာံ လက်တက်ဂျဳတအ် အဆက်ဟွံပိုတ်သ္ကုတ်ရ။

မ္ၚးနူလွဟ်ဇၞော်ကံၚ်ဇြဳပၞာန်ဂှ် ဟိုတ်နူပန်ဗတိုက်ဒၟံၚ်ကဵုဒရုမ် အဆက်ဟွံပိုတ်သ္ကုတ်တုဲ ညးဒေသနူကွာန် (၁၁) ကွာန်ပါလုပ်သီုကွာန်နောၚ်ဘိုဝ်၊ လက်တက်ဂျဳ၊ တေတ်ဖျူဇြုက်၊ ဇြလုပ်ဂျဳ၊ လှေဒိုဝ်၊ တနာပ်ကွေန် ကေုာံညောၚ်ချေတောက်တအ်ဂှ် ဒးပါဲဒၟံၚ်ဘဲပၞာန် လ္ပာ်ဗၟံက်ၜဳသေတ်တိုၚ်ရ။

ဟိုတ်နူပရေၚ်ဒပ်ကံၚ်ဇြဳပၞာန် ပန်ဖျေံလွဟ်ဇၞော် ပ္တဝ်လဝ်ကဵုကောန်အရာပ်ညးဍုၚ်ကွာန်တအ်တုဲ ဒဝ်အေနေဝေန် အယုက် (၄၂) သၞာံ ကေုာံ ဒဝ်ခေန်ညော အယုက် (၅၄)သၞာံ ဒၟံၚ်ကွာန်လက်တက်တအ်ညးၜါတၠ ဒးလဝ်ဘဲဝပ်လွဟ်မကမ်ရ။

တ္ၚဲဂှ်ဟေၚ် ဒပ်ကံၚ်ဇြဳပၞာန် ရပ်ကော်ကေတ်ဏာလဝ် ညးဒေသၚထိုဲဇြုပ် ကၠုၚ်ရာန်ဒၟံၚ်ဖျာ ပ္ဍဲဍုၚ်မုမ် (၅) တၠ သီုတၚ်ထ္ၜးဟိုတ်ဟၟဲမွဲသာ်တုဲ ကော်ကေတ်ဏာလဝ် ပ္ဍဲတံဒပ်ခမရ (၅၉၉) ရဂှ် ဓမံက်လဝ်ပ္ဍဲတၚ်လလောလၚ်တြးဂှ်ရ။

ညးဒေသဒးဒုၚ်ရပ်လဝ် (၅)တၠတအ်ဂှ် စဵုကဵုအခိၚ်လၟုဟ် ဂကောံသ္ၚိကၟိန်အိန်ထံၚ် ညးဟွံဂွံကလေၚ်ဗၠးတိတ်ဏီတအ်ဂှ် ပရေၚ်ဒှ်ဓဝိၚ် ဂွိၚ်ကဵုအန္တရာယ်လမျီုညးတအ် ဂၠိုၚ်တိုန်ဒၟံၚ်ရဂှ် ဂွံတီကေတ် အတိုၚ်လဟီု ညးဒေသတအ်ရ။

ပ္ဍဲဂိတုဂျူလာၚ် တုဲကၠုၚ်တေံလေဝ် ဒပ်ကံၚ်ဇြဳပၞာန် ရပ်ကေတ်ဏာလဝ် ညးဒေသအာရာန်ဇွောံမ ပ္ဍဲဍုၚ်ညံၚ်လေဝ်ပေန် ကေုာံ ဍုၚ်ကျောက်တခါ (၂၀)တၠတုဲ ၜိုန်ရက္လေၚ်ဗလးကဵုလဝ် (၂) တၠဓဝ်ကီုလေဝ် ညးဒေသသှ်ေဒၟံၚ် (၁၈) တၠဂှ် ထ္ၜးဟိုတ်နာနာတုဲ ဖျေံလဝ်ထံၚ် ညးမွဲ (၆) ဂိတုရဂှ် KNU လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် -KNU