ဒဝ်နေဝ်ထရာမ် ဒးနုက်တိတ် နူပရေၚ်ရုဲစှ် အလံၚ်သမ္မတထေက်ရောၚ် ကၠတ်ထဝ်လ္တူအမေရိကာန် ကောန်ဗော်ရဳပါပလဳကာန်တအ် ဟီု

ဝါယှေန်တာန်၊ အဝ်ဂါတ်(၂၂)

နကဵုသမ္မတတြေံ ဒဝ်နေဝ်ထရာမ်ဂှ် ပ္ဍဲပေါဲရုဲမာဲသွာၚ်နာနာဏံ သွက်ဂွံဇၞးမာဲမာန် ဟၟဲဂှ်ရ ဒဒှ်ရထေက်ကဵုဒးနုက်တိတ် နူပေါဲရုဲစှ်အလံၚ်သမ္မတ သၞာံ ၂၀၂၄ ဂှ် ကၠတ်ထဝ်လ္တူအမေရိကာန် ကောန်ဗော်ရဳပါပလဳကာန်ပြာကတ်တအ် ဟီုလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၀)ရ။

ပ္ဍဲအခိၚ်ချိၚ်ရုၚ် သမ္မတတြေံ အလန်ဒုတိယ ပ္ဍဲသၞာံ ၂၀၂၁ ပၞောဝ်ကဵုအမာတ်ကၠတ်ထဝ်လ္တူ ရဳပါတ်ပလဳကာန် ဖျေံလဝ်သ္ဂုတ်သွာတ် သွက်ဂွံကေတ်အရေဝ် ကုထရာမ် (၇)တၠ ဘေလ်ကာတ်ဇြဳဒဳ ပါလုပ်ဒၟံၚ်မွဲတၠဂှ်မ္ဂး ညးဒးဒုၚ်ဖျေံလဝ်ဒုဟ်ဒဏ် သွက်ဂဗုတ်မွဲမွဲသာ် ရုဲစှ်အာ နဒဒှ်သမ္မတဟွံသေၚ်ရဂှ် ဟီုကဵုလဝ်သတိရ။

နကဵုညးတၠဆန္ဒမာဲတအ်လေဝ် စပ်ကဵုကိစ္စတၞးလိက်ဖေတ်ဒရေဝ် ဆက်စပ်ဒၟံၚ်ကဵုထရာမ်တုဲ သွက်ဂွံဒးဂွံသတိ ဟီုဗတိုက်ဖ္အောဝ်လဝ်ရ။

ပ္ဍဲအစဳဇန် State of the Union CNN ဂှ် နူကဵုပေါဲရုဲစှ်သမ္မတ ထရာမ်ထေက်ဒးနုက်တိတ်ကဵုထေက်ဟာ အခိၚ်သၟာန်လဝ်ဂှ် လူဝေတ်ဇြဳရာနာ ရဳပါပလဳကာန်ဂှ် “ဣဏံ ပိုဲလေဝ်တော်ချပ်လဝ်ရ၊ ဆ္ဂးတုဲတဴ လ္တူညးရ။ အဲမိက်ဂွံဟီုဂှ် ယဝ်ရသၟာန်လညာတ်အဲတှ်ေ ညးဂှ် ယဝ်ရံၚ်ကဵုမာဲအခိၚ်လၟုဟ်ဏံ ဒးကျဂျိုဝ်ဗိုၚ်ဒါန်ဏောၚ်”ဂှ် ဟီုသ္ဂးလဝ်ရ။

နူရဳပါပလဳကာန် ဟိုတ်နူပရေၚ်ညးဆက်ဆောံဗော်ၜါလ္ပာ်တုဲ မၞိဟ်တီဂၠိုၚ်ဒၟံၚ် ကာတ်ဇြဳဒဳဂှ် ပ္ဍဲချူခၞံသၞောဝ်စမြိုၚ်ဒုၚ်သ္ဇိုၚ် မၞုံ (၁)ထရဳလျာန် ဒဝ်လာအမေရိကာန် မူအပြောံ ပ္ဍဲသၞာံ ၂၀၂၁ ဂှ်လေဝ် ပါလုပ်ဒၟံၚ် ပ္ဍဲအခန်ကဏ္ဍပရေၚ်က္ဍိုက်က္ဍိုပ်ရ။

ထရာမ်ဂှ် ကြဴနူစ္ဍးတိတ်နူသ္ၚိနန်ဗ္တာၚ် ပ္ဍဲသၞာံ ၂၀၂၁ တုဲဂှ် ပရေၚ်ဟွံပြေပြံၚ်သၞောဝ်ဓဝ် တၚ်စောဲစုတ်ပါလုပ်ဒၟံၚ်ပန်တၚ်တအ် ဂၠိုၚ်တိုန်ကၠုၚ်ဒၟံၚ်ကီုလေဝ် ညးဂှ် က္ဍိုက်ဒၟံၚ်က္ဍိုပ် နဒဒှ်အလံၚ်သမ္မတရဳပါတ်ပလဳကာန်ရ။

“နဒဒှ်အလံၚ်သမ္မတ ဒးဒုၚ်ဖျေံလဝ်ဒုဟ်ဒဏ် သွက်ဂဗုတ်ရာဇဝတ်မွဲမွဲ ကာလနွံလေဝ် နွံမာန်ဏောၚ်။ ဒၞာဲဂျိုဝ်ဗိုၚ်ဒါန်ဂှ်လေဝ် သွက်ဂွံဒးထပ်စၞး နွံဒၟံၚ်ဏောၚ် အဲထေၚ်ကေတ်ရ။ ဆ္ဂးမၞိဟ်ဒးဒုၚ်ဖျေံလဝ်ဒုဟ်ဒဏ်မွဲတၠဂှ် အမေရိကာန်တအ် ကဵုမာဲဏောၚ်ဂှ် ဟွံထေၚ်ပုဟ်။ ဟိုတ်ဂှ်ရ သီုဖအိုတ်စိုတ်ဟွံမိပ်ဒၟံၚ်ရ။ ဣဏံဂှ် ဝေၚ်ဒၟံၚ်ဏောၚ်”ဂှ် ကာတ်ဇြဳဒဳ ဟီုသ္ဂးလတ်ရ။

ပ္ဍဲတၚ်ဂၞၚ်လလောၚ်တြးလဝ် ပ္ဍဲဂိတုဏံ ထရာမ်ဂှ် နအပိုၚ်ခြာအလုံမွဲကၟိန်ဍုၚ် က္လိဂွံလဝ်မာဲ ရဳပါတ်ပလဳကာန် (၄၇)တၟံကၠံတုဲ သ္ကိုပ်ရေၚ်အုပ်ဓုပ်ပွိုၚ်ဍုၚ်ဖလဝ်ရဳဒါဂှ်မ္ဂး ပ္ဍဲဂိတုဂျူလာၚ်ဂှ် အောန်ယအ်စှ်ေအာ စဵုကဵု (၁၃)တၟံကၠံရ။

ထရာမ်ဂှ်မ္ဂး ပ္ဍဲအစဳဇန်ထ္ပက်ပၞာန်အရေဝ်ဂှ် တိုန်စိုပ်အာဟွံသေၚ်တုဲ ပ္ဍဲအေန်တာဗျူအောန်လာၚ် နူဌာန်ပရိုၚ် Fox News ဂှ် ပါလုပ်ဟီုသ္ဂးအာရောၚ်ဂှ် ဂွံတီကေတ်ရ။

Ref: Asiaone