ဍာ်ဗု၊ အဝ်ဂါတ်(၂၃)
ရးဒေသဇၞော်တၞၚ်သြဳ၊ ပ္ဍဲပွိုၚ်ဍုၚ်ဍာ်ဗုဂှ် ဂိတုအဝ်ဂါတ် နူစၟတ်တ္ၚဲ (၈) စဵုကဵုစၟတ်တ္ၚဲ (၁၈) ဒပ်ကံၚ်ဇြဳပၞာန် ထ္ပက်လုပ်လဝ်ကရောၚ်ပၞာန်ဂှ် သ္ၚိဒၟံၚ်ဗ္ဒာဲ ၂၀၀ မ ဒးဒုၚ်ပလီုပလာ်လဝ်တုဲ ပ္ဍဲကဵုဂှ် သ္ၚိဒၟံၚ် (၁၇)မ ဒးဒုၚ်စံၚ်ပလီုလဝ်ရဂှ် ဂကောံပကဖပွိုၚ်ဍုၚ်ဍာ်ဗု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် နွံၜိုတ် (၂၀၀) ဂှ် နူလ္ပာ်သၞေဟ်ဍာ်ဒမျိုဟ်ထဝါဲ ဂေတ်ကၠုၚ်လၟေၚ်ကွာန် ပ္ဍဲပွိုၚ်ဍုၚ်ဍာ်ဗုတုဲ ထ္ပက်ကၠုၚ်လဝ် ကရောၚ်ပၞာန်ရ။
ပ္ဍဲမွဲပွိုၚ်ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်ဂှ် ကြဴနူလုပ်စိုပ်ဒကဵုဂၟာဲလဝ် သ္ၚိဒၟံၚ် နူကွာန်ဨကနိ၊ ခမောက်ချောၚ် ကေုာံဝဇြောန်တဝ်တအ် ဗ္ဒာဲၜိုတ် (၂၀၀)မ ပြၚ်တုဲဂှ် ကၠောန်သ္ပလဝ် ပရေၚ်ပလီုပလာ် ပရေၚ်စံၚ်ပလီုရ။
ပ္ဍဲကဵုဂှ် အကာဲအရာပရေံအိုတ် ပ္ဍဲကွာန်ဨကနိမွဲကွာန်ဓဝ်ဂှ် သ္ၚိဒၟံၚ် ဗ္ဒာဲ (၁၇၀) ဒးဒုၚ်ပလီုပလာ်လဝ်တုဲ သ္ၚိဒၟံၚ် (၁၄) မ ဒးဒုၚ်စံၚ်ပလီုလဝ်ရဂှ် ညးတာလျိုၚ်လလောၚ်ပရိုၚ် ဒပ်စဵုဒၞာညးဍုၚ်ကွာန် ပွိုၚ်ဍုၚ်ဍာ်ဗု ဟီုလဴထ္ၜးလဝ်ရ။
ဃောဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်ဂှ် မၞိဟ်ဗြဴနူကွာန် ဝဇြောန်တဝ် (၂)တၠ၊ လကျာ် နူကွာန်ဨကနိမွဲဇကု ကေုာံ မၞိဟ်တြုံ (၁) တၠ ၊ ညးဒေသတၞုၚ်ဂၠံၚ်ကျာ်ဒတူဍာ်ဗု (၄)တၠ၊ အပံၚ်လၟိဟ်ကောန်အရာပ် ၈ တၠ ဒးဒုၚ်ပန်ပှော်လဝ်တုဲ ဒးလဝ်ဘဲဝပ်ညးသ္ကအ်ရ။
ဟိုတ်နူကရောၚ်ပၞာန်ကံၚ်ဇြဳပၞာန် လုပ်ကၠုၚ်တုဲ ညးဒေသနူကွာန် (၁၀) ကွာန် ပါလုပ်သီုကွာန်ဨကနိ၊ ဝဇြောန်တဝ်၊ ခမောက်ချောၚ်၊ ယျၚေဝ်၊ ထုၚ်ကျဳတအ် (၄၀၀၀) ပြၚ် ဒးဂြိပ်ဒဴဒၟံၚ်တုဲ ညးဒေသကွာန်ဨကနိတအ်ဂှ် စဵုကဵုလၟုဟ်ဏံ ဟွံဂံၚ်က္လေၚ်စဴဌာန်ဒၟံၚ်ဏီရဂှ် ညးဒေသတအ် ဟီုထ္ၜးလဝ်ရ။
ရးဒေသတၞၚ်သြဳဂှ် ပ္ဍဲဂိတုဂျူလာၚ်တုဲကၠုၚ်တေံ ဟိုတ်နူပေါဲဗတိုက်အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ်တုဲ ညးဒေသ ၃၆၀၀၀ ပြၚ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် ဂကောံသုတေသနဒေသဂှ်ဂမၠိုၚ် လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် -CJ
sanlontai