ပ္ဍဲကျာ်ထဝ် ဝိုၚ်ဝေၚ်လံၚ်ၛၚ် BGF သ္ကိုပ်သ္ကတုဲ ပံက်လဝ်ဂှ် ဒပ်ပၞာန်လုပ်ဍိုက်ဗ္တိုက်၊ ရပ်မၞိဟ်ဟွံဂွံတုဲ သီလဝ် ကွဳလိုန်ဓါတ် (၄၀)ဖ္ဍိုက်

ကျာ်ထဝ်၊ အဝ်ဂါတ်(၂၃)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ပ္ဍဲကွာန်အလာဒံၚ်ဂှ် ဒပ်ပံၚ်ကောံကံၚ်ဇြဳပၞာန်တံ လုပ်စိုပ်ဍိုက်ဗ္တိုက်လဝ် ဝိုၚ်ဝေၚ်လံၚ်ၛၚ် လ္ပာ်ဒပ်မၚ်ပယျဵုကရေၚ် BGF သ္ကိုပ်သ္ကပံက်လဝ်ဂှ်တုဲ ဟိုတ်နူရပ်မၞိဟ်ဟွံဂွံဂှ်ရ သီဏာလဝ် ကွဳလိုန်ဓါတ် (၄၀)ဖ္ဍိုက်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ဝိုၚ်ဝေၚ်လံၚ်ၛၚ် သၞာဲဒဴ BGF မွဲတၠ ကိုဝ်ဝေန်သဵု သ္ကိုပ်သ္ကတုဲကၠောန်လဝ်ဂှ် ပ္ဍဲဂိတုအဝ်ဂါတ် စၟတ်တ္ၚဲ (၂၁) ၜိုတ်အခိၚ်လ္ဒေါဝ်တ္ၚဲ (၁)နာဍဳဂှ် ဒပ်ကံၚ်ဇြဳပၞာန် သီုဒပ်ဗၠာဲသၟိၚ် ဇြဟတ် (၃၀) ပြၚ်တံ စိုပ်ကၠုၚ်နကဵုကွဳစက် (၅) ဖ္ဍိုက် ပါလုပ်သီုကွဳစက်ဖဝ်တုဲ လုပ်စိုပ် ဍိုက်ဗ္တိုက်လဝ်ရ။

အတိုၚ်လဟီု ညးဒေသတံမ္ဂး သွက်ဂွံကၠောန်ဗဒှ် ဝိုၚ်ဝေၚ်လံၚ်ၛၚ်ဏံမာန် ကဵုလဝ်သြန် ဒပ်ပၞာန်၊ ဗၠာဲသၟိၚ် ကေုာံ ဂကောံဆေၚ်စပ်တံ ကိုဋ် ဂၠိုၚ်ကဵုကၠံတုဲ ကဵုလဝ်အခေါၚ်ဝေၚ်လံၚ်ၛၚ် ပွိုၚ်မွဲဂိတုတုဲ ဟိုတ်နူတ္ၚဲ လောန်ၜက်အာဂှ်ရ လုပ်စိုပ်ဍိုက်ဗ္တိုက်လဝ်ရဂှ် သ္ဂးရ။

အဃောဒပ်ပံၚ်ကောံကံၚ်ဇြဳပၞာန် လုပ်စိုပ်ဍိုက်ဗ္တိုက်လဝ်ဂှ် သၟာဝေၚ်ၛၚ်တံ ဂြိပ်တိတ်အာအိုတ်တုဲ ကွဳလိုန်ဓါတ်သှ်ေမံၚ် (၄၀)ဖ္ဍိုက်ကီု သီုကပေါတ်ဝေၚ်လံၚ်ၛၚ်တံဂှ် လ္ပာ်ကံၚ်ဇြဳပၞာန် သီဂိုၚ်ဏာတုဲ စံၚ်ပလီုပလာ်ဏာလဝ် ရုၚ်ဝေၚ်လံၚ်ၛၚ်ဂှ်ရ။

ပ္ဍဲဝိုၚ်ဝေၚ်လံၚ်ၛၚ်ဏံဂှ် ဝိုၚ်စာၚ်၊ ဖေဝ်၊ ဒဵုလာ်(အန်ဂလုံ) ကေုာံ ဝိုၚ်အနဳထောၚ်တံ ပါလုပ်တုဲ လၟေၚ်တ္ၚဲ ဟိုတ်နူမၞိဟ်ဂၠိုၚ်ကဵုကၠံ ကၠုၚ်စိုပ်ဝေၚ်မံၚ်ဂှ်ရ ဒှ်ဝိုၚ်ဝေၚ်လံၚ်ၛၚ် ယၟုဒယှ်ဒၟံၚ်မွဲရဂှ် ဂွံတီကေတ်ရ။

ပ္ဍဲတွဵုရးဍုၚ်မန် ပ္ဍဲကာလဒပ်ပၞာန်သီအဝဵုဏံ ဒပ်ကံၚ်ဇြဳပၞာန်ကဵု ဂကောံဒပ်ဗၠာဲသၟိၚ်တံ ကေတ်သြန်တုဲ ကဵုလဝ်အခေါၚ်ပံက်ဝိုၚ်ဝေၚ်လံၚ်ၛၚ် ဟွံလုပ်သၞောဝ်တံတုဲ လၟေၚ်ဂိတု အာတ်မံၚ်ၚုဟ်အကံက်ခေါန် ကိုဋ်ဂၠိုၚ်ကဵုကၠံ နွံဒၟံၚ်ရဂှ် ဂွံတီကေတ် အတိုၚ်ဂလာန်ညးဒေသတံရ။

ပရိုၚ်-သြၚ်လောန်တိုၚ်မ်

ဗီု-CJ