ပရေၚ်ယူကရုၚ်ဗတိုက်ပန်ဒၟံၚ် ပ္ဍဲကၟိန်ဍုၚ်ရုယှာ ဟွံထံက်ဂလာန်ပုဟ်ဂှ် အမေရိကာန်ဟီု

ဝါယှေန်တာန်၊ အဝ်ဂါတ်(၂၄)

ရုယှာပန်ဖျေံလဝ် က္ၜၚ်ကျာမသက္ကုမၞိဟ်ဒဳယူကရုၚ် ပ္တိတ်ဒၟံၚ်ဇြဟတ် သွက်ဂွံဗတိုက်ပန်မဝ်သဂိုဝ်ရဂှ် ညးပိုၚ်ပြဳအဝဵုရုယှာဂမၠိုၚ် ဟီုဂးလဝ်တုဲဂှ် ဟွံထံက်ဂလာန် ပရေၚ်ဗတိုက်ပန် ပ္ဍဲကၟိန်ဍုၚ်ရုယှာပုဟ်ဂှ် အမေရိကာန် ဟီုသ္ဂးလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၃)သ္ကုတ်ကၠာဂှ်ရ။

ပွမကဵုဇြဟတ်ဒရိုဟ် ပရေၚ်အာစိုပ်လုပ်ဗတိုက် ပ္ဍဲကၟိန်ဍုၚ်ရုယှာ ဟွံသေၚ်မ္ဂး ဗီုပြၚ်ထံက်ဂလာန်လေဝ် ဟွံထံက်ဂလာန်ပုဟ်ဂှ် ညးမၞုံအခေါၚ်ဟီုဂး ဌာနဝန်ဇၞော်ဍုၚ်သ္အာၚ်အမေရိကာန် ဟီုသ္ဂးလဝ်ရ။

စပ်ကဵုပရေၚ်လောန်ၜက်ရုယှာ စက္တဵုဒှ်ကၠုၚ်လဝ် ပ္ဍဲဂိတုဖေဖဝ်ဝါရဳ သၞာံတုဲကၠုၚ်တေံဂှ်တုဲ တၚ်သ္ဂုတ်သွာတ် သွက်ဂွံစဵုဒၞာဇကုဇကုဂှ်မ္ဂး တုဲတဴဒၟံၚ်ကဵုယူကရုၚ်တုဲ ပေါဲပၞာန်ရုယှာဂှ် အခိၚ်ဟွံရုဲ အာစိုပ်ဒတုဲ တုဲဒှ်အာမာန်ဒၟံၚ်ရဂှ်လေဝ် ဟီုစုတ်လဝ်ရ။

ကြဴနူက္ၜၚ်ကျာမသက္ကုမၞိဟ်ဒဳၜါဖ္ဍိုက် ဒးဒုၚ်ပလီုပလာ်လဝ် ပ္ဍဲကရေန်မလေန် ပ္ဍဲဂိတုမေသ္ကုတ်ကၠာတုဲတေံဂှ် ပရေၚ်ဗတိုက်ပန်ကဵုဒရုမ် ပ္ဍဲကၟိန်ဍုၚ်ရုယှာ ဂၠိုၚ်တိုန်ကၠုၚ်လဝ်ရ။ ပ္ဍဲတုဲကၠုၚ် အခိၚ်ဟွံလအ်ဏီဂှ် ပရေၚ်ဗတိုက်ပန် ပ္ဍဲဍုၚ်ဇၞော်ကၟိန်ဍုၚ်ရုယှာ သာဂၠိုၚ်တိုန်ကၠုၚ်လဝ်ရ။

သွက်ဂွံဒုၚ်ဒဝ်ဗတိုက် ပရေၚ်ရုယှာလောန်ၜက်ဂှ် အမေရိကာန် ထံက်ပၚ်ကဵုလဝ်လွဟ်လက်နက် ကေုာံ ကပေါတ်ကြိယာဗာလက်နက်ပၞာန်တၞဟ် ဗွဲမဂၠိုၚ်ဂၠေၚ်ဂှ်မ္ဂး ဒဒှ်ရဟွံထံက်ဂလာန် ပရေၚ်ဗတိုက်ပန် ပ္ဍဲကၟိန်ဍုၚ်ရုယှာပုဟ်ဂှ် ဟီုသ္ဂးကၠုၚ်လဝ် မွဲဒမြိပ်ရ။

ပန်ဖျေံလဝ်ဒရုမ် ပ္တိတ်ဒၟံၚ်ဇြဟတ် သွက်ဂွံဗတိုက်မဝ်သဂိုဝ် ပိဖ္ဍိုက်ရဂှ် ဌာနဝန်ဇၞော်ပရေၚ်စဵုဒၞာရုယှာ ဟီုသ္ဂးလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၃)သ္ကုတ်ကၠာဂှ်ရ။

ပ္ဍဲတ္ၚဲဗုဒ္ဓဝါသ္ကုတ်ကၠာတေံဂှ် ဟိုတ်နူဒရုမ်မွဲဖ္ဍိုက် လုပ်ဇီုတေက်ဒးစမြိုၚ် စဂွံသိုၚ်ခၞံမွဲစမြိုၚ် မၞုံလ္ဒောဝ်ဍုၚ်မဝ်သဂိုဝ်တုဲ လျိုၚ်ဝန်ဍုၚ်ဇၞော်မဝ်သဂိုဝ် သာဂျဳဇြောဗဳယာန်နေန် ဟီုသ္ဂးလဝ် နူတေဝ်လဳဂရာမ်ညး မွဲကဆံၚ်ရ။

သၞေဟ်က္ၜၚ်ကျာမဝ်သဂိုဝ်ဂှ် ဟိုတ်နူပရေၚ်ဒဒှ်ဏံတုဲ ဒဒှ်ရဒေါံဇူလဝ်လၟေၚ်တရဴဂှ် ဓမံက်ထ္ၜးလဝ် ပ္ဍဲအေဂျေန်ဇြဳပရိုၚ် TASS ရ။ ဟိုတ်နူပရေၚ်ချဳဒရာၚ်က္ၜၚ်ကျာမသက္ကုမၞိဟ်ဒဳယူကရုၚ်တုဲ ပ္ဍဲတုဲကၠုၚ် မွဲၜါတ္ၚဲတေံဂှ် ကၟာတ်ဒၞာလဝ် ပရေၚ်စ္ဍးတိတ် ကေုာံ ပရေၚ်ဆိုက်စိုပ်ပဝ်လုပ်စိုပ်ကၠုၚ် ပ္ဍဲသၞေဟ်က္ၜၚ်ကျာအဓိက မၞုံပွဳဗွိုၚ်ဍုၚ်ဇၞော်ကၟိန်ဍုၚ်ရုယှာတအ်ဂှ်ရ။

ပန်ဖျေံလဝ်ဒရုမ်ယူကရုၚ်ၜါဖ္ဍိုက် လ္တူတိဍာ်မဝ်သဂိုဝ်မာန်လဝ်တုဲ ပ္ဍဲဒေသဗရဳယ မၞုံပယျဵုယူကရုၚ်ဂှ်လေဝ် ထပ်ပန်ဖျေံလဝ် က္ၜၚ်ကျာမသက္ကုမၞိဟ်ဒဳၜါဖ္ဍိုက်တၞဟ် မာန်လဝ်ရဂှ် ဌာနဝန်ဇၞော်ပရေၚ်စဵုဒၞာ ဟီုသ္ဂးလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၂)ဂှ်ရ။

စပ်ကဵုပရေၚ်ပန်ဗတိုက် ပ္ဍဲပယျဵုဒၞက်ရုယှာဂှ်တုဲ နူလ္ပာ်ယူကရုၚ် ၜိုန်ရဟွံဟီုကဵုတၚ်သမ္တီကီုလေဝ် နူကဵုဒရုမ်ၜါဖ္ဍိုက် ဒးဒုၚ်ပလီုပလာ်လဝ် ပ္ဍဲလ္တူနန်ကရေန်မလေန် ပ္ဍဲဂိတုမေသ္ကုတ်ကၠာတေံတုဲဂှ် ပရေၚ်က္ဍိုက်ဗတိုက်ဗီုလၟုဟ်ဏံ အသိၚ်သၠုၚ်ဂၠိုၚ်တိုန်ကၠုၚ်ဒၟံၚ်လေဝ် ဒှ်ရ။

ဟိုတ်နူပရေၚ်ပန်ဗတိုက်တအ်တုဲ လၟေၚ်တရဴကျာတအ်ဂှ် ဒးပိုတ်သ္ကုတ်အာလဝ် မွဲခနခေတ္တတုဲ စမြိုၚ်တအ်ဂှ် ပရေၚ်ဇီုကပိုက်ဒးလဝ် အဇာဍောတ်ဟေၚ် က္တဵုဒှ်လဝ်ရ။

အာတေတ် (23/08/2023)

Ref: Reuters