ပေကျေန် – အဝ်ဂါတ်(၂၄)
ကၟိန်ဍုၚ်အာဖရိကတအ်ဂှ် နူကဵုကြုက်သိုၚ်ခၞံကဵုဒၟံၚ် စမြိုၚ်သ္ဇိုၚ်ဂှ် မိက်ဂွံကဵုပြံၚ်သၠာဲကၠောန် ကမၠောန်ကွတ်စက် ကွတ်တဲ ပ္ဍဲဒေသရဂှ် ကလုတ်ကြုက် ဟီုဂးလဝ် ပ္ဍဲအခိၚ်ကောံဓရီုကဆံၚ်လ္တူ ဗရေစ်စ် BRICS ကၠောန်ဗဒှ်လဝ် ပ္ဍဲအာဖရိကသၠုၚ်ကျာ တုဲဒှ်ဂှ်ရ။
“ပရေၚ်ပံၚ်ကောံအာဖရိကဂှ် ဒမြိပ်အသိၚ်သၠုၚ်တိုန်ဒၟံၚ်တုဲ ကၟိန်ဍုၚ်တအ် သွက်ဂွံချပ်စန်စာ အပြံၚ်သၠာဲပရေၚ်ကၠေံစိုတ်ပိုဲ အာတ်မိက်လဝ် ကၟိန်ဍုၚ်ကြုက်ရ” ဂှ် ဂအုပ်သ္ကိုပ်စၞောန်ပ္ညုၚ် ဌာနဝန်ဇၞော်ဍုၚ်သ္အာၚ်ကြုက် ဌာနကေၚ်ကာအာဖရိက ဝူပေန် ဟီုသ္ဂးလဝ်ရ။
တၚ်တုပ်စိုတ်ပရေၚ်ဆက်စၠောံကူသာန်ဗၞိက်ဗၠးၜး တိုက်အာဖရိက (AfCFTA) ပ္ဍဲသၞာံ ၂၀၂၁ သ္ကုတ်ကၠာ တုဲကၠုၚ်တေံဂှ် ချပ်စန်စာပၠုပ်တုဲ သွက်ဂွံဆက်စၠောံကူသာန်ဗၞိက် အကံက်အခေါန်ဟၟဲ ကၟိန်ဍုၚ်အာဖရိကတအ် ပ္ဍဲအနာဂတ်ဂှ် နွံဒၟံၚ်ပၟိက် ပရေၚ်အပြံၚ်သၠာဲရဂှ် ညးဟီုသ္ဂးလဝ်ရ။
ပ္ဍဲပေါဲသဳကၠဳတၟေၚ် ဗရေစ်စ် ကၠောန်ဗဒှ်အာ နူဂိတုအဝ်ဂါတ် စၟတ်တ္ၚဲ (၂၂) စဵုကဵုစၟတ်တ္ၚဲ (၂၄)ဂှ် နူကဵုက္ဍိုပ်သ္ကိုပ်အာဖရိကတအ် ကေုာံ အစဳဇန်ဆေၚ်စပ်ကဵုကွတ်စက်အာဖရိက်ဂွံဂဵုလဟဵု မွဲကဆံၚ် သဳကၠဳအာရောၚ်ဂှ် ဂွံတီကေတ်ရ။
တိုက်သြန်ကၟိန်ဍုၚ်ကြုက်ပိုၚ် ဗွဲမဂၠိုၚ်ဂှ်လေဝ် ပ္ဍဲသၞာံ နူ ၂၀၀၀ စဵုကဵု ၂၀၂၀ ဂှ် သွက်ဂွံပ္တိတ်ဂလေံကဵု ကၟိန်ဍုၚ်အာဖရိကတအ် ဒဝ်ဠာ (၁၆၀)ဗဳလျာန် တုပ်လဝ်စိုတ်ရဂှ် ဂွံတီကေတ်လဝ်ရ။
သွက်ဂွံထ္ၜလဘာ် ကၟိန်ဍုၚ်ဃောတဴတက်တအ် စမြိုၚ်သ္ဇိုၚ်ဂှ် ပ္ဍဲသၞာံ ၂၀၁၃ ဂှ် ကြဴနူယှဳ စတံကၠောန်ကဵုလဝ် အစဳဇန် ဇုက်ဂၞိၚ်မွဲကဝး ဂၠံၚ်မွဲတၞၚ်တုဲဂှ် ၜိုန်ရသၠုၚ်ပ္တိုန်ကဵုလဝ် ကတိကဝတ်သြန်ဂလေံတအ်ကီုလေဝ် ပ္ဍဲသၞာံ ၂၀၁၆ ဂှ် နူကဵုဒဝ်ဠာ (၂၈.၄)ဗဳလျာန် စဵုကဵုသၞာံ ၂၀၂၀ (၁.၉)ဗဳလျာန်ဓဝ်ဟေၚ် ဆုတ်စှ်ေအာလဝ် တီတီရ။
စပ်ကဵုကိစ္စကာတၟေၚ်တုဲ ပရေၚ်သဳကၠဳပၟိက်ဇၞော်ဂှ် စဵုကဵုဖိုဝ်ရာမ် ပရေၚ်ပံၚ်တောဲရေၚ်တၠုၚ် ကြုက် – အာဖရိက မဒှ်ကောံဓရီု အကြာဝန်ဇၞော်ကြုက်ကဵု အာဖရိက ကၠောန်ဗဒှ်အာ ပ္ဍဲသၞာံကၠုၚ်စိုပ်ဂတဏံ မၚ်ဟွံမာန်ရဂှ် ဝူဟီုသ္ဂးလဝ်ရ။
နကဵုကုမ္ပဏဳ ဇာဍောတ် အဇာလ္ဒောဝ်ကြုက် ဖျေံသ္ဇိုၚ်အာဖရိကတအ်ဂှ်လေဝ် သၠုၚ်ပ္တိုန်အာ ပရေၚ်ဓလိုက်တံရိုဟ်ရောၚ်ဂှ် ညးတာလျိုၚ်တအ် ဟီုသ္ဂးလဝ်ရ။
“စပ်ကဵု ပရေၚ်ပိုန်ဒြပ်ဂၠးကဝ်၊ ဟွံသေၚ်တှ်ေ ပရေၚ်ပိုန်ဒြပ်ကြုက်တုဲ မုဒှ်ဒှ် ကုမ္ပဏဳကြုက်တအ်ဂှ် သွက်ဂွံဂံၚ်ဒုၚ်သၠး အာ အာဖရိက ပၟိက်ဆန္ဒ နွံဒၟံၚ်ရ”ဂှ် ဝူ ဟီုသ္ဂးလဝ်ရ။
Ref,CNA
sanlontai