ကြဴနူအ္စာၝောံဗ္တောန်လိက်မွဲတၠ ဒးဒုၚ်သ္ပလဝ်အဓမ္မ ဒးဒုၚ်ဂစိုတ်လဝ် ပ္ဍဲဒၞာဲမၞိဟ်ဂၠိုၚ်ဒၟံၚ်တုဲဂှ် သွက်ဂွံဂလိုၚ်ပ္တိုန် ဗ္ဂပ်စုတ် ကမ္မရာဂီုကၠီုဂှ် သ္ကိုပ်ဇမၞော်ဍုၚ်သိုလ် ဟီု

သိုလ်၊ အဝ်ဂါတ်(၂၅)

ပ္ဍဲသတ္တာဟတုဲကၠုၚ်တေံ ပ္ဍဲဂၠံၚ်တိုန်ဒဵု ဒၞာဲမၞိဟ်ဂၠိုၚ်ဒၟံၚ်မွဲဒၞာဲဂှ် ကြဴနူဂဗုတ်သ္ပအဓမ္မ အ္စာၝောံဗ္တောန်လိက်မွဲတၠတုဲ ပြိုက်ဂစိုတ်လဝ် ဓဇန်န်ကြာန်န် က္တဵုဒှ်လဝ်တုဲဂှ် ဗ္ဂပ်စုတ်ဂလိုၚ်ပ္တိုန်ကမ္မရာမၚ်ရံၚ် ပ္ဍဲကၠအ်ပ္ကဴ မၞုံပ္ဍဲဍုၚ်ဇၞော်တအ်ရောၚ်ဂှ် သ္ကိုပ်ဇမၞော် ဍုၚ်ဇၞော်သိုလ် ဟီုလဝ် ပ္ဍဲဂိတုအဝ်ဂါတ် စၟတ်တ္ၚဲ(၂၃)ဂှ်ရ။

ပ္ဍဲဂိတုအဝ်ဂါတ် စၟတ်တ္ၚဲ(၂၃) ဂှ်ဟေၚ် နကဵုဒပ်ဗၠာဲသၟိၚ် ဓမံက်ပ္တိတ်ကောန်ဒုဟ်သံသယမာန်လဝ်ရ။ ပ္ဍဲဒေသ ဒၞာဲညးဂမၠိုၚ်စၟဳမၚ်ဒၟံၚ်လေဝ်ဒှ်၊ ဒၞာဲမၞိဟ်ဂၠိုၚ်လေဝ် ဒှ် မၞုံခရိုၚ်ဇြဳလေန်မ် ဍုၚ်သိုလ် ဟွံဂွံဗ္ဂပ်စုတ်လဝ် CCTV ဂှ် ညးဗြဴညး ဒှ်အ္စာၝောံဗ္တောန်လိက်ဂှ် ဒးဒုၚ်ၜုၚ်တက်လဝ် ဗွဲမဓဇန်ကြာန်တုဲ ဒးဒုၚ်သ္ပလဝ် အဓမ္မပြိုက်ဂစိုတ်လဝ်ရ။

ပရေၚ်ဒဒှ်ဏံဂှ် ပ္ဍဲလ္တူညးဇၞော်ကံၚ်ဇြဳခရိုၚ်မဆေၚ်စပ်တအ် လလောၚ်တြးလဝ် သွက်ဂွံသ္ကုတ်ဗပိုတ်ဗာတ်ဂျေတ် ပရေၚ်ဂီုကၠီုညးဗြဴတအ်ဂှ် ပရေၚ်ဟီုဂး နကဵုဒေါသမဇၞော် က္တဵုဒှ်လဝ်တုဲ သီုအလုံမွဲကၟိန်ဍုၚ်ကိုဝ်ရဳယာသၠုၚ်ကျာ ဒးချဳကၠိုက်ကၟဵုလဝ်ရ။

“ဂဗုတ်ဏံဂှ် စဳဇန်လဝ် ချိုတ်တ်ပၠိုတ်တ်တုဲ တၠဒုဟ်ဒဏ်ဂှ်လေဝ် ပ္ဍဲကဵုဨရိယာညးဂမၠိုၚ်ပိုၚ်ပြဳဂှ် ရုဲစှ်ကေတ်ညးဗြဴဒတုံစှ်ေမွဲမွဲတၠတုဲ ပ္ကီုပရာပ်လဝ်လိၚ်တုဲ က္တဵုဗဒှ်လဝ် ဒဵုကဵုလမျီုဒးအိုတ်ရ”ဂှ် ဂွံတီကေတ် အတိုၚ်လဟီု ဌာန်ပရိုၚ် ယွောန်ဟာတ်ရ။

တၚ်ဂၞၚ်ကောန်ဒုဟ်သံသယ ပ္ဍဲကိုဝ်ရဳယျာသၠုၚ်ကျာဂှ်မ္ဂး ၜိုန်ရဟွံကေၚ်ဓမံက်ပ္တိတ်လဝ် မွဲလှ်ေကီုလေဝ် အတိုၚ်လဟီုဒပ်ဗၠာဲသၟိၚ် ပ္ဍဲတ္ၚဲဗုဒ္ဓဝါဂှ် ပ္ဍဲလ္တူဒုဟ်ဒဏ်က္လိလောန်လဝ် ထပ်ကဵုထပ်ဂှ် ညံၚ်ဓဝ်ဖေက်အကြာညးဍုၚ်ကွာန်တအ် ဂွံအောန်စှ်ေအာ နဒဒှ်ထံက်ရံၚ်ကဵု ဒတုဲဖိုလ်လ္ပာ်ခိုဟ်တုဲ စၟတ်သမ္တီဓမံက်ထ္ၜးအာ ကောန်ဒုဟ်ဂှ်ရောၚ် ဟီုသ္ဂးလဝ်ရ။

ညးဒးချိုတ်လဝ်ဂှ် ဒှ်အ္စာၝောံထ္ၜးတန်မူလ အယုက် (၃၀)သၞာံ မွဲတၠတုဲ ဒးဒုၚ်လဝ်ဘဲဝေဒနာသ္ကာတ်မြဟ် စိုပ်ရုၚ်ဂဥုဲတုဲ လအ် ပွိုၚ်(၂) တ္ၚဲ ဒးချိုတ်အာလဝ်ရဂှ် သ္ဂးလဝ်ရ။

သ္ကိုပ်ဇမၞော်ဍုၚ်ဇၞော်သိုလ်ဂှ်မ္ဂး သွက်ဂွံဖ္အောန်ယှအ်ဖျေံ ဒၞာဲဗ္ဒန်မတ် က္တဵုဒှ်ဂဗုတ်အရာတအ်မာန်ဂှ် ဂလိုၚ်ပ္တိုန်ဗ္ဂပ်စုတ်အာ ကမ္မရာဂီုကၠီု ပ္ဍဲကၠအ်ပ္ကဴ၊ ပ္ဍဲဂၠံၚ်တိုန်ဒဵုတအ် ဟွံကဵုသှ်ေၜက်ရောၚ်ဂှ် သ္ဂးလဝ်ရ။

“ဍုၚ်သိုလ်ဟီုဂှ် ၜိုန်ရဒှ်ညးဗြဴမွဲတၠဓဝ်လေဝ် ဒှ်ဍုၚ်ဇၞော် ကွာ်အာဂၠံၚ် ဂီုဂီုကၠီုကၠီုမာန် မွဲဍုၚ်ရ။ ဂဗုတ်ဗီုပြၚ်ဏံ ယဝ်ရဆက်က္တဵုဒှ်ဒၟံၚ်ဏီတှ်ေ သၞိၚ်ရုပ်ဍုၚ်ဂီုကၠီုဂှ်လေဝ် ဒးစှ်ေအာမာန်ဒၟံၚ်ရောၚ်”ဂှ် သ္ကိုပ်ဇမၞော်ဍုၚ်ဂှ် ဟီုလဝ်ရ။

ကိုဝ်ရဳယာသၠုၚ်ကျာဂှ် ဗွဲယေဘုယျမ္ဂး ဒှ်ကၟိန်ဍုၚ်ဂီုကၠီု ဗွဲမလောန်တုဲ ပ္ဍဲသၞာံ ၂၀၂၁ ဂှ် အပံၚ်လၟိဟ်မၞိဟ် မွဲကိုတ်မ္ဂး ၁.၃ တၠဟေၚ် ဗ္ၜတ်ဂဗုတ်ဂစိုတ်မၞိဟ် နွံလဝ်ရဂှ် ဓမံက်ထ္ၜးလဝ် ပ္ဍဲစရၚ်အၚ် လုပ်သၞောဝ်တအ်ရ။

Ref: AFP