ပ္ဍဲပွိုၚ်ဍုၚ်ကျံက်ကျဳ KNU ဒးဒုၚ်ကြာတ်ထောံဖျေံဗုံ ကဵုက္ၜၚ်ကျာတုဲ ကောန်အရာပ်မွဲတၠ ချိုတ်

ကျံက်ကျဳ၊ အဝ်ဂါတ်(၂၆)

တိဍာ်အုပ်ဓုပ် ဗော်သွးကောန်ဂကူကရေၚ် KNU၊ ခရိုၚ်ညံၚ်လေဝ်ပေန်၊ ပွိုၚ်ဍုၚ်ကျံက်ကျဳဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ဂြာတ်ထောံဖျေံဗုံ ကဵုက္ၜၚ်ကျာဗ္တိုက်ဂျက် ပ္ဍဲကွာန် တေဝ်တဝ်မူတေဝ်တဝ်ခွာဂှ်ရ ကောန်အရာပ်မွဲတၠ ဒးချိုတ်လဝ်ရဂှ် KNUဗဟဵု လလောၚ်ပ္တိတ်လဝ်ရ။

က္ၜၚ်ကျာဗ္တိုက်ဂျက် ကံၚ်ဇြဳပၞာန်ဂှ် ပ္ဍဲဂိတုအဝ်ဂါတ် စၟတ်တ္ၚဲ (၂၄) သ္ပတံနူ အခိၚ်လ္ဒေါဝ်တ္ၚဲ (၁)နာဍဳကဝက် စဵုကဵု (၂)နာဍဳကဝက်ဂှ် ကၠုၚ်စိုပ်ဂြာတ်ဖျေံဏာလဝ်ဗုံ ပ္ဍဲကွာန်တေဝ်တဝ်မူတေဝ်တဝ်ခွာဂှ် (၆)မရ။

ဟိုတ်နူဒးဒုၚ်ဂြာတ်ထောံဖျေံလဝ်ဗုံတုဲ ကောန်အရာပ် သဝ်ဘဗာသေဝ်ဖိုဝ် အာယုက် (၂၈)သၞာံဂှ် ဒးကဝေက်ဗုံ ဒးချိုတ်လဝ်တုဲ ကောန်သ္ဂံၚ်မေတ္တာ နူဒပ်ပၞာန်ဗၠးၜးကောန်ဂကူကရေၚ် ဇီုကပိုက်ဂွံလဝ်ဝပ်ရဂှ် သ္ဂးရ။

အတိုၚ်တၚ်လလောၚ်တြး ကဝ်မတဳပရေၚ်ရီုဗၚ်ကာတၟေၚ်ကရေၚ် ပွိုၚ်ဍုၚ်ကျံက်ကျဳ လလောၚ်တြးလဝ်ဂှ်မ္ဂး ပ္ဍဲပွိုၚ်ဍုၚ်ကျံက်ကျဳဂှ် သ္ပတံနူ ဂိတုမေသၞာံဏံ စဵုကဵုဂိတုအဝ်ဂါတ် စၟတ်တ္ၚဲ (၁၅)ဂှ် ဟိုတ်နူလွဟ်ဇၞော်၊ ဒရုၚ်၊ ပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တံတုဲ ညးဍုၚ်ကွာန်ကောန်အရာပ် (၆)တၠချိုတ်တုဲ က္လိဂွံလဝ်ဝပ်သ္ကာတ်မြဟ် (၁၃)တၠရဂှ် လလောၚ်ပ္တိတ်လဝ်ရ။

သ္အာၚ်နူဂှ်ပၠန် ပ္ဍဲခရိုၚ်ညံၚ်လေဝ်ပေန်ဂှ် ဟိုတ်နူပရေၚ်ဗ္တိုက်ဂစိုတ်ဂယိုၚ်ကံၚ်ဇြဳပၞာန် စွံပွန်လ္တူညးဍုၚ်ကွာန်ကောန်အရာပ်တံဂှ်တုဲ ညးဍုၚ်ကွာန်ကောန်ဒေသ (၈၀၀၀)ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် လလောၚ်ပ္တိတ်လဝ် ပ္ဍဲဂိတုအဝ်ဂါတ် သတ္တဟတတိယဂှ်ရ။

ပ္ဍဲခရိုၚ်ညံၚ်လေဝ်ပေန် ပဋိပက္ခပၞာန် သ္ကာတ်မြဟ်မံၚ်ဂှ် ပ္ဍဲကဵုပေါဲဗ္တိုက် က္တဵုဒှ်လဝ် ပွိုၚ် ၃ သတ္တဟတုဲကၠုၚ်တေံ ဒပ်ကံၚ်ဇြဳပၞာန် စံၚ်ပလီုပလာ်လဝ် သ္ၚိဒၟံၚ်ညးဍုၚ်ကွာန်ကောန်အရာပ် ၁၀၀ မ ပြၚ်ရဂှ် ဂွံတီကေတ် အတိုၚ်တၚ်လလောၚ်တြး ဗော်သွးကောန်ဂကူကရေၚ် (KNU) ဗဟဵုရ။

ပရိုၚ် – သြၚ်လောန်တိုၚ်မ်

ဗီု – KNU