ဒပ်ကံၚ်ဇြဳပၞာန်တိုန်ကၠုၚ် သွက်ဂွံက္လေၚ်သီကေတ် ဗဒိုပ်ကုန်ဒဵုလက်ဟတ်ဂှ် ဒးဂိလဝ်တုဲ က္လေၚ်ဆုတ်တိတ်အာ

မြဝတဳ၊ အဝ်ဂါတ်(၂၆)

သွက်ဂွံက္လေၚ်သီကေတ် ဗဒိုပ်ကုန်ဒဵုလက်ဟတ်မာန်ဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နဇြဟတ်ပေၚ်ၚ် လအ်ပွိုၚ်မွဲဂိတုဂှ် ဒးက္လေၚ်ဆုတ်တိတ်အာလဝ် သီုပရေၚ်ဇီုကပိုက်ချိုတ်ဂျိုၚ် ဗွဲမဂၠိုၚ်ရဂှ် သ္ကိုပ်ချဳဒရာၚ်ပၞာန် ကရောၚ်ပၞာန်ကဝ်ဗရာ ဗိုလ်ဒါဗဝ် ဟီုသ္ဂးလဝ်ရ။

ဗဒိုပ်ကုန်တိုၚ်တာဝါ ဒဵုလက်ဟတ် ပွိုၚ်ဍုၚ်မြဝတဳ၊ တွဵုရးကရေၚ် ဂကောံဇြဟတ်ပၠန်ဂတးတအ် ထိၚ်ဒဝ်သီဂွံလဝ်ဂှ် သွက်ဂွံက္လေၚ်သီကေတ်မာန် ဒပ်ကံၚ်ဇြဳပၞာန် နကဵုဇြဟတ်ဗွဲမဂၠိုၚ် ထ္ပက်ကၠုၚ်ကရောၚ်ပၞာန် ပ္ဍဲဗလးမုက်တိ ဗလးကျာတုဲ ၜိုန်ရဗတိုက်လဝ်ကီုလေဝ် စဵုကဵုပေၚ်ပွိုၚ်မွဲဂိတု သီုသီကေတ်ဟွံမာန်တုဲ ဒးက္လေၚ်ဆုတ်တိတ်အာလဝ်ရ။

သွက်ဂွံကလေၚ်သီကေတ် ဗဒိုပ်ကုန်ဒဵုလက်ဟတ် ဒးဆောံလေၚ်လဝ်ဂှ် နကဵုတၚ်စၞောန်ပ္ညုၚ် သ္ကိုပ်ၝောံဒပ် ၝောံဒပ် (၄၄) ကံၚ်ဇြဳပၞာန်ဂှ် ခမရ (၂) ခမရ (၁၁၈) ဇြဟတ်ပံၚ်ပ္တိတ်နုက် (၁၀၀)ပြၚ် သ္ပတံနူ ဂိတုဂျူလာၚ် စၟတ်တ္ၚဲ (၂၄)တေံတုဲ က္လေၚ်ထ္ပက်ကရောၚ်ပၞာန် ဗတိုက်ဒၟံၚ်ရ။

ဆ္ဂး ဒပ်ကံၚ်ဇြဳပၞာန်ဂှ် ပ္ဍဲပွိုၚ်မွဲဂိတုဏံ ၜိုန်ရထ္ပက်ကၠုၚ်ကရောၚ်ပၞာန်စဵုကဵု (၁၀)ဝါကီုလေဝ် ၜိုတ်ဗ္ဒာဲဇိုၚ်ဒဵု ဒဵုလက်ဟတ်ဓဝ်ဟေၚ် ဆုဲလုပ်ဟွံမာန်တုဲ ဒးက္လေၚ်ဆုတ်တိတ်အာ သီုပရေၚ်ဇီုကပိုက် ချိုတ်ဂျိုၚ်မွဲမဂၠိုၚ်ရဂှ် သ္ကိုပ်ချဳဒရာၚ်ပၞာန်ကရောၚ်ပၞာန်ကဝ်ဗရာ ဗိုလ်ဒါဗဝ်ဟီုလဝ်ရ။

အတိုၚ်ဗျူဟာပရေၚ်ပၞာန် မၞုံတိဍာ်ဒပ်မဟာ (၆) KNU မ္ဂး ပၟိက်ဇၞော်ဒၟံၚ်တုဲ ဗဒိုပ်ကုန်တိုၚ်တာဝါဒဵုလက်ဟတ် ဇြဟတ်ဒပ်ကံၚ်ဇြဳပၞာန် ဗ္ဒာဲ (၆၀) နွံဒၟံၚ်ဂှ် ကရောၚ်ပၞာန်ကဝ်ဗရာ KNLA ဂကောံဇြဟတ်ပၠန်ဂတးတအ် ဗတိုက်သီကေတ်လဝ် ပ္ဍဲဂိတုဂျူလာၚ် စၟတ်တ္ၚဲ (၂၁) တုဲကၠုၚ်တေံရ။

ပ္ဍဲပေါဲဗတိုက်ဒဵုလက်ဟတ်ဂှ် ဟွံဂွံအမိၚ်ဆုတ်မွဲသာ် သ္ကိုပ်တံဒပ် ကေုာံ ဒုသ္ကိုပ်တံဒပ် နူတံဒပ်ကံၚ်ဇြဳပၞာန် ခမရ(၂) ဆုတ်တိတ်လဝ်ဒပ် ဂြိပ်တိတ်အာလဝ်တအ်ဂှ် ကံၚ်ဇြဳပၞာန် ကဵုလဝ်ဒုဟ်ဒဏ် ဖျေံလဝ်ထံၚ် ပ္ဍဲထံၚ်စာတ် ပွိုၚ်ဍုၚ်ကျာ်ထဝ်၊ တွဵုရးဍုၚ်မန် နကဵုဂဗုတ်ဒစဵုဒစးအဝဵုရဂှ် ဗိုလ်ဒါဗဝ် ဟီုထ္ၜးလဝ်ရ။

ပ္ဍဲဗဒိုပ်ကုန်တိုၚ်တာဝါဒဵုလက်ဟတ်ဂှ် ပ္ဍဲကဵုပေါဲဗတိုက်ၜါလ္ပာ် က္တဵုဒှ်လဝ် ဂိတုဏံ လ္ပာ်ဒပ်ကံၚ်ဇြဳပၞာန် ပါလုပ် သီုဗိုလ်ဇၞော် (၂)တၠ ဒးချိုတ်လဝ် (၁၇)တၠတုဲ ဒးလဝ်ဘဲဝပ် (၃၄)တၠရဂှ် ဂွံတီကေတ် အတိုၚ်တၚ်လလောၚ်တြး KNU ခရိုၚ်ဒူပလာယာ လလောၚ်တြးလဝ်ပ္ဍဲဂိတုအဝ်ဂါတ် စၟတ်တ္ၚဲ(၁၅)ဂှ်ရ။

သွက်ဂွံကလေၚ်သီကေတ်ဒဵုလက်ဟတ်မာန် အခိၚ်ထ္ပက်ဒၟံၚ်ကရောၚ်ပၞာန်ဂှ် ကောန်ဒပ် နူတံဒပ်ခမရ (၁၁၈) သၟဝ်တဲၝောံဒပ် (၄၄) (၂)တၠ၊ ကောန်ဒပ် ပၞာန်မၚ်ပယျဵုမွဲတၠတအ်ဂှ် ကၠုၚ်စိုပ်ပံၚ်တောဲကဵု KNLA သီုလွဟ်လက်နက် လုပ်စိုပ်ဖျေံလဝ်လွဟ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU