ကေတ်အာအရေဝ် တိုက်သြန်ပုဂ္ဂလိကကေုာံ ကမၠောန်ပရေၚ်ရေၚ်တၠုၚ် သုၚ်စောဲ သြန်တၞး (၂၀၀၀၀)တံရောၚ် NUG ဟီု

လ္ဂုၚ်၊ အဝ်ဂါတ်(၂၆)

ပ္ဍဲတိုက်သြန်ပုဂ္ဂလိကကဵု ကမၠောန်ပရေၚ်ရေၚ်တၠုၚ်တံဂှ် ယဝ်ရသုၚ်စောဲ သြန်တၞး (၂၀၀၀၀)ဒ္ကေဝ် ကံၚ်ဇြဳပၞာန် တြးပ္တိတ်လဝ်ဂှ်မ္ဂး ကေတ်အရေဝ် ရေၚ်တၠုၚ်အာရောၚ်ဂှ် အလဵုသဳညဳသၟဟ်ဂကူ (NUG) လလောၚ်ပ္တိတ်လဝ် နကဵုစၟတ်တ္ၚဲ (၂၄) ဂိတုအဝ်ဂါတ်ရ။

ပွမဂိုၚ်စွံလဝ် သြန်တၞး (၂၀၀၀၀)ဒ္ကေဝ် ပ္ဍဲတဲကီု၊ ကၠောန်သွံရာန်ကီု သီုသၠဲပြံၚ်မွဲနဲမွဲဗီုတံဂှ် လဂွံကဵုဥပဒေ ဗ္တိုက်ပလီုပွပကီုပရာပ် အခန် ၁၂ ဂှ် ဒှ်ပွက္လိလောန်ဒုဟ်ရဂှ် ပါလုပ်ဒၟံၚ် ပ္ဍဲတၚ်လလောၚ်တြးဂှ်ရ။

ဟိုတ်ဂှ်ရ သြန်တၞး (၂၀၀၀၀)ဒ္ကေဝ် ကံၚ်ဇြဳပၞာန် တြးပ္တိတ်လဝ်တံဂှ် လဂွံကဵုဥပဒေပကီုပရာပ်ဂှ် ရန်တၟအ်လဝ် သွက်ဂွံတာဒၞါ သွက်အမှုထံက်ပၚ်သြန်လှုဲ ပွပကီုပရာပ်တံဂှ်တုဲ ဂကောံဗ္တိုက်ပလီုပွပကီုပရာပ် ဗဟဵု အလဵုသဳ(NUG)တံ ဒးပ္တိတ်လဝ်အမိၚ်တာဒၞါရဂှ် သ္ဂးလဝ်ရ။

ယဝ်ရဟွံဒ္ဂေတ်ဗက်အမိၚ်တာဒၞါ လလောၚ်တြးလဝ်ဂှ်မ္ဂး ဗွဲမဗဗွဲကဵုဥပဒေ ပရေၚ်ဗ္တိုက်ပလီုပွပကီုပရာပ်ဂှ် တာဒၞါကေတ်အရေဝ် ကဵုအာဒုဟ်ဒဏ်ရောၚ် လလောၚ်တြးလဝ်ရ။

ညးမၞုံအခေါၚ်ဟီုဂး အလဵုသဳညဳသၟဟ်ဂကူ (NUG) ဥူကျဝ်ဇြဝ်ဂှ်တှ်ေ ပရေၚ်တက်တြးပ္တိတ် သြန်တၞး (၂၀၀၀၀)ဒ္ကေဝ် ကံၚ်ဇြဳပၞာန်ဂှ် ဟိုတ်နူရန်လဝ် ညံၚ်ညးဍုၚ်ကွာန်တံ သ္ဂောံစိုပ်ဒဒိုက်တုဲ ကၠောန်လဝ်ဂှ်ရ ညံၚ်ဟွံဂွံသုၚ်စောဲဂှ် ဒးတာဒၞါရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

“ကံၚ်ဇြဳပၞာန်ပကီုပရာပ်ဂှ် အခေါၚ်ပ္တိတ် သြန်တၞး (၂၀၀၀၀) ဏံလေဝ် ဟၟဲပုဟ်၊ အဝဵုလေဝ် ဟၟဲပုဟ်။ မုဟိုတ်ရောဟီုတှ်ေ ဍေံတံဂှ် ညးပကီုပရာပ်ရ။ ပ္တိတ်သြန်ဏံတုဲ ဂစာန်သွက်ဂွံဆက်ကလိလောန် ပွပကီုပရာပ်တံပၠန်ရ။ ဟိုတ်နူကၠောန်ဗီုဏံဂှ်ရ ပ္ဍဲဍုၚ်ဗၟာဂှ် ပရေၚ်သြန်ဖောဝ်တံ ဂၠိုၚ်တိုန်ကၠုၚ်တုဲ ရန်လဝ် သွက်ဂဓရိုဟ်ဒတုံဖျေံ ညးဍုၚ်ကွာန်တံ သာတုဲသ္ဂောံစိုပ် ပ္ဍဲကတိုၚ်ဒဒိုက်တုဲ ကၠောန်လဝ်ရ။ ဟိုတ်နူဏံရ အလဵုသဳပိုဲဂှ် ပရေၚ်ပ္တိတ်သြန်တၞး (၂၀၀၀၀)ဒ္ကေဝ်ဏံဂှ် ညံၚ်သ္ဂောံဒှ်အထံက်အပၚ် ကုပြဝပကီုပရာပ်ဍေံတံတုဲ ပ္တိတ်လဝ်တုဲ ဟိုတ်နူကံၚ်ဇြဳပၞာန်တံ ကၠောန်မံၚ် ညံၚ်ကတိုၚ်ဒဒိုက်ညးဍုၚ်ကွာန်တံ သာတုဲသ္ဂောံဇြိုဟ်စှ်ေဂှ်ရ ညံၚ်ဟွံဂွံသုၚ်စောဲ သြန်တၞး(၂၀၀၀၀)ဏံဂှ် ဟီုလဝ်ရ” သာ်ဝွံ သ္ဂးရ။

တိုက်သြန် ကေုာံ ကမၠောန်ပရေၚ်ရေၚ်တၠုၚ်သြန်လှုဲ သ္ပစၟတ်သမ္တီတုဲ ဒုၚ်တဲသုၚ်စောဲမံၚ် သြန်တၞး(၂၀၀၀၀)ဒ္ကေဝ် မပ္တိတ်လဝ်အမိၚ်တာဒၞါတံ သွက်သြန်လှုဲသ္ဂောံဂေတ်ဂြိပ်တံဂှ်လေဝ် ညးဍုၚ်ကွာန်တံ ညံၚ်သ္ဂောံကဵုသမ္တီ တေၚ်ဗစိုပ် နကဵုသက်သဳအိုတ်ညိဂှ် NUG ဆဝ်မ္ၚုဟ်လဝ်ရ။

ကံၚ်ဇြဳပၞာန်ဂှ် သြန်တၞး (၂၀၀၀၀)တၟိဏံဂှ် နဒဒှ်စၟတ်သမ္တီ ကျာ်ပတိမာရုပ် မာရဝိဇယ က္ဍိုပ်သ္ကိုပ်ပၞာန် သ္ကိုပ်သ္ကဒက်ပ္တန်လဝ် အာစိုပ်ဒတုဲကဵု စိၚ်ဗ္တာၚ် ရဋ္ဌနန္ဒက ပေၚ်မွဲသၞာံတုဲ တြးပ္တိတ်လဝ်ရဂှ် တုဲကၠုၚ်ဂိတုဂျူလာၚ် စၟတ်တ္ၚဲ (၂၃)ဂှ် လလောၚ်ပ္တိတ်လဝ်ရ။

ဟိုတ်နူပရေၚ်တြးပ္တိတ် သြန်တၞး (၂၀၀၀၀)ဒ္ကေဝ် ကံၚ်ဇြဳပၞာန်ဂှ်တုဲ ပရေၚ်သြန်ဖောဝ်တံကဵု ဒမြိပ်ကလောန်ကၟိတ်ဟွံမွဲတံ သၠုၚ်တိုန်ကၠုၚ်မာန်တုဲ ညးဍုၚ်ကွာန်တံ ထပ်တုဲဒးဂဗကၠုၚ် ဘဲဒဏ်ၚုဟ်ဖျာက္ဍၚ်တိုန်ကၠုၚ် ဂၠိုၚ်ကဵုဆတံမာန်ဒၟံၚ်ရဂှ် တၠပညာပရေၚ်ပိုန်ဒြပ်တံ ကဵုလဝ်သတိရ။

ပြဟ်ဟ်ဏံလေဝ် ဟိုတ်နူကလိုက်ကၟဵု သြန်တၞး(၂၀၀၀၀)ဒ္ကေဝ်ဂှ် ၚုဟ်မးသြန်ဍုၚ်ဗၟာစှ်ေတုဲ ညးဍုၚ်ကွာန်တံ ဒးဒုၚ်ဒၟံၚ် ဘဲဒဏ် ၚုဟ်ထဝ်၊ ဒဝ်ဠာ၊ ၝာတ် ကဵု ၚုဟ်ဗၞိက်စစၞသ္ဇိုၚ် ပ္ဍဲဗွဝ်ဖျာတံ က္ဍၚ်တိုန်ကၠုၚ် ဂၠိုၚ်ကဵုဆ ဇၞော်ကဵုဇြဟတ်ရ။

အလဵုသဳညဳသၟဟ်ဂကူ (NUG)ဂှ်မ္ဂး သြန်တၞး (၂၀၀၀၀)ဒ္ကေဝ် ကံၚ်ဇြဳပၞာန်တက်တြးပ္တိတ်လဝ်တံဂှ် ဒှ်သြန်တၞးဟွံလုပ်သၞောဝ်ရဂှ် တုဲကၠုၚ်ဂိတုဂျူလာၚ် စၟတ်တ္ၚဲ ၂၇ ဂှ် လလောၚ်ပ္တိတ်လဝ်ရ။

ပရိုၚ် – သြၚ်လောန်တိုၚ်မ်

ဗီု – Social Media