လဂုၚ် – အဝ်ဂါတ်(၂၆)
ရးဒေသလဂုၚ်၊ ပ္ဍဲဂၠံၚ်ကျာ်တေဝ်အေန်ဂူ အရာပ် စၟတ် (၁၆) ပွိုၚ်ဍုၚ်ဒဂုၚ်ဍုၚ်တၟိ သ္ကုတ်သၟဝ်ကျာဂှ် တ္ၚဲဏံဂိတုအဝ်ဂါတ် စၟတ်တ္ၚဲ (၂၅) အခိၚ်နူဂယးဂှ် ကျာ်နာ်ရီု ဃောသိုၚ်ခၞံဒၟံၚ် ခရိုဟ်စှ်ေလဝ်တုဲ ပရေၚ်ဇီုကပိုက်ဒးမၞိဟ်နွံဒၟံၚ်ရဂှ် ဂွံတီကေတ် နူဒပ်ပလိုတ်ပၟတ် ကၟိန်ဍုၚ်ဗၟာရ။
ပရေၚ်ဒဒှ်ဂှ် တ္ၚဲဏံ အခိၚ်နူဂယး ၜိုတ် (၁၀)နာဍဳပြၚ်ပြၚ်ဂှ် ကျာ်နာ်ရီု ဃောသိုၚ်ခၞံဒၟံၚ် ပ္ဍဲအရှာံဘာ၊ ဗ္ဒာဲတိုဝ်ကျောၚ်ကလေဝ်ဂှ် ခရိုဟ်စှ်ေလဝ်တုဲ ဟိုတ်နူသၟာကမၠောန်တအ် ဒးဒုၚ်ကၟာတ်ဂွံလဝ်ဂှ်ရ ဒပ်ပလိုတ်ပၟတ်ကၟိန်ဍုၚ်ဗၟာ အာစိုပ် ရီုဗၚ်ကဵုလဝ်ရ။
“နာ်ဇၞော်ဃောသိုၚ်ဒၟံၚ်ဂှ် ခရိုဟ်စှ်ေအာ သီုဖအိုတ်ရ။ ဒဵုကဵုလၟုဟ် ကၠောန်ဒၟံၚ်ပရေၚ်ဂၠိုက်ဂၠာဲ ဟံၚ်ပြာ်ဖိုဟ်ဏီ။ မၞိဟ်ဒးဒုၚ်ကၟာတ်ဂွံလဝ်ပ္ဍဲတေံ နွံဒၟံၚ်ဏီ။ မွဲတၠဂှ်ဒးလဝ်က္ဍိုပ်တုဲ ဒးပလံၚ်ဏာရုၚ်ဂဥုဲရ”ဂှ် ကောန်ဒပ်ပလိုတ်ပၟတ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
စပ်ကဵုပရေၚ်ဒဒှ်ဏံတုဲ ကၠောန်ရေၚ်တၠုၚ်ဒၟံၚ် ကမၠောန်ရီုဗၚ်ဟံၚ်ပြာ် နကဵုကွဳစက်ရီုဗၚ်ဟံၚ်ပြာ် နူဒပ်ပလိုတ်ပၟတ်ကၟိန်ဍုၚ်ဗၟာ (၁)ဖ္ဍိုက်၊ ယာဉ်သ္ကိုပ်အုပ်ဓုပ် (၁)ဖ္ဍိုက်၊ ယာဉ် Repeater (၁)ဖ္ဍိုက်တုဲ မွဲကရောံကဵု ဒပ်ပလိုတ်ပၟတ်ပွိုၚ်ဍုၚ်မဆေၚ်စပ်တအ်ဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်တအ်လေဝ် ကၠောန်ရေၚ်တၠုၚ်ဒၟံၚ် ပရေၚ်ဂၠိုက်ဂၠာဲရီုဗၚ်ရဂှ် ဂွံတီကေတ်ရ။
စဵုကဵုအခိၚ်လၟုဟ်ဏံ ပ္ဍဲပရေၚ်ကျာ်နာ်ရီု ခရိုဟ်စှ်ေလဝ်ဂှ် ဇီုကပိုက်ဒးလဝ်ဘဲဝပ် မူစိတၠရောဂှ် နကဵုသြၚ်လောန်တိုၚ်(မ်) ဟွံဂွံတီကေတ်လဝ် သောဲသောဲဗြောဲဗြောဲဏီရ။
ပရိုၚ် – သြၚ်လောန်တိုၚ်(မ်)
ဗီုရုပ် – MFSD
sanlontai