က္လေၚ်ဂၠိုက်ဂၠာဲဒၟံၚ် ကပေါတ်တြေံတြဟ် ဒးဒုၚ်ကၠတ်ကေတ်ဏာလဝ် နူတိုက်ထ္ၜးပျးဗျိတိယှ ၜိုတ် (၂၀၀၀)ပြၚ်

လာန်ဒါန် – အဝ်ဂါတ်(၂၇)

ကပေါတ်တြေံတြဟ် ပါလုပ်သီုကပေါတ်ရတ်ကျိုၚ်ကျဝ် ဒးဒုၚ်ကၠတ်ကေတ်ဏာလဝ် နူတိုက်ထ္ၜးပျးဗျိတိယှ အပံၚ်လၟိဟ်ၜိုတ် (၂၀၀၀)ဂကူပြၚ်ဂှ် ကၠောန်သ္ပပ္တိတ်ဒၟံၚ်ဇြဟတ် သွက်ပရေၚ်ဂၠိုက်ဂၠာဲရဂှ် ဥက္ကဋ္ဌတိုက်ထ္ၜးပျး ဂျအ်အောစ်ဘွောန် ဟီုလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၆)ရ။

ပၞောဝ်ကဵုတိုက်ထ္ၜးပျးလာန်ဒါန် Rosetta Stone မဒှ်တိုက်ထ္ၜးပျး ဒယှ်တှ်ပြာကတ်မွဲကီု သီုပ္ဍဲတိုက်ထ္ၜးပျး ထ္ၜးပျးလဝ်လဝ် အာဲကၟာဲအဳဂျေတ် ချူပုတ်လဝ် နကဵုအက္ခရလိက် တၞဟ်မွဲဂှ် ကြဴနူဗ္ဒမ်သီဂိုၚ်ကပေါတ် နူကဵုဘဳဇြဳ (၁၅)ဗွဝ်ကၠံ စဵုကဵုအေဒဳ (၁၉)ဗွဝ်ကၠံ ဒးဒုၚ်ကၠတ်ကေတ်လဝ်တုဲဂှ် ပ္တိတ်ထောံလဝ် ညးလုပ်ဂကောံလျိုၚ်ဝန်မွဲတၠရဂှ် ဂွံတီကေတ်ရ၊

ဒါရိုက်တာတိုက်ထ္ၜးပျး ဖေစ်ချာဂှ်လေဝ် စပ်ကဵုကပေါတ်ပကောံပကေဝ်လဝ်တအ် ဒးဒုၚ်ကၠတ်ကေတ်လဝ်ဂှ်တုဲ ပ္ဍဲပရေၚ်ဂၠိုက်ဂၠာဲစၟဳစၟတ် ဝတ်လီုလဝ်ရဂှ် ဒုၚ်လဝ်ဝန်တုဲ နုက်တိတ်လဝ် နူဌာနန္တရရဂှ် ဟီုလဝ်ရ။

ဥက္ကဋ္ဌတိုက်ထ္ၜးပျး အောစ်ဘွန် မဒှ်ဝန်ဇၞော်ပရေၚ်ဘဏ္ဍာဗျိတိယှတြေံဂှ် ပရေၚ်ပကောံပကေဝ် တိုက်ထ္ၜးပျးသီုဖအိုတ်ဂှ် ဟိုတ်နူကၠောန်လဝ်စရၚ် နသၞောတ်စှ်ေစှ်ေ ဟွံသေၚ်မ္ဂး ပၠုပ်လဝ်စရၚ် ဟွံသေၚ်ဂှ်ရ ပ္ဍဲကဵုဂကောံဇၞော် ပကောံပကေဝ်လဝ် ဂၠိုၚ်ကဵုဗွဝ်ကၠံသၞာံ အကာဲအရာတၟေၚ်တၟဟ် ဟွံသေၚ်ရဂှ် ဟီုလဝ်ကဵု ရေဒဳယော BBCရ။

သွက်ဂွံတီကေတ်ကပေါတ်ဒးဒုၚ်ကၠတ်ဂၠံက်ကေတ်ဏာလဝ်တအ်ဂှ် ကၠောန်ရေၚ်တၠုၚ်ဒၟံၚ် ပရေၚ်ဂၠိုက်ဂၠာဲစမ်ၜတ်ဂဗုတ်ပညာဥုဲမွဲရဂှ် ညးဟီုလဝ်တုဲ “လၟိဟ်ကပေါတ် ၜိုတ်(၂၀၀၀)ဂကူနွံဏောၚ်ထေၚ်ရ၊ ဆ္ဂး ပိုဲတအ်ဒးဟီုဂှ် ဣဏံဂှ် ဒှ်လၟိဟ်ဂၞန်သၚ်္ချာမွဲချိုန်ခနတုဲ ပိုဲဆက်ဂၠာဲဒၟံၚ်ဖိုဟ်ရ”ဂှ် ဟီုလဝ်ရ။

“ကပေါတ်ပိုဲဒးဒုၚ်ကၠတ်ကေတ်ဏာလဝ်လ္ၚဵုဂှ် စဂၠိုက်ဂၠာဲဂွံဒၟံၚ်ယျ”ဂှ် ညးဟွံဓမံက်ထ္ၜးတၚ်ဂၞၚ်သောဲသောဲဗြောဲဗြောဲပါဲနူဂှ်တုဲ ထပ်ဟီုလဝ်ရ။

ဒှ်ဒၟံၚ်ပ​ရေၚ်ကၠတ်ဂၠံက်ကေတ် ပ္ဍဲတိုက်ထ္ၜးပျးရဂှ် ကြဴနူပါဲတးလဝ် တၚ်ကဵုသတိ ပ္ဍဲသၞာံ ၂၀၂၁ တုဲဂှ် ဂြောပ်ဗ္ဒန်ကေတ်လဝ် ဟွံမွဲရဂှ် ဥက္ကဋ္ဌတိုက်ထ္ၜးပျး က္လေၚ်ဟီုပလန်လဝ်ရ။

ဆ္ဂး တၚ်ထေၚ်ခယျ ဂကောံဗော်သွးသ္ကုတ်လ္တူ ဂကောံဟွံပတှ်ေကေတ် ဒဒှ်မၞိဟ်ပ္ဍဲ ကၠတ်ကေတ် ဒှ်မာန်ဂှ်လေဝ် နွံဒၟံၚ်ရ။

ပရေၚ်ကၠတ်ကေတ်ဂှ် သ္ပကဵုဇီုကပိုက်ဒး ဂုဏ်သိက္ခာတိုက်ထ္ၜးပျး မဒှ်ညးမၚ်မွဲထိၚ်ဒက် ကပေါတ်ကညောတ်ပ္တန်ၚုဟ်မးဟွံမာန် ဂွံဖျေံစိုတ် ပၞောဝ်ကဵု အာဲကၟာဲယေန်သၞာၚ် နွံအလုံမွဲဂၠးကဝ် ဒးစှ်ေလဝ် ဇၞော်ကဵုဇြဟတ် ချိုတ်ပၠိုတ်တုဲ “ဟိုတ်ဂှ်ရ ဒုၚ်ဏာဂုဏ် စၞးတိုက်ထ္ၜးပျးရ” ဂှ် ညးဟီုလဝ်ရ။

စပ်ကဵုကပေါတ်ဒးဒုၚ်ကၠတ်ကေတ်လဝ်ဂှ်တုဲ ၜိုန်ရဒပ်ဗၠာဲသၟိၚ် ဆဵုဂဗသၟာန်ဇာန်လဝ် မၞိဟ်တြုံဟွံမိက်ဓမံက်ယၟုမွဲတၠဂှ် နွံကီုလေဝ် ပရေၚ်စောဲလဝ်ဂဗုတ် ဟၟဲရဂှ် ဟီုလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၄)တေံရ။

Ref,CNA