ဒပ်ကံၚ်ဇြဳပၞာန် ဒးမာၚ်ဗတိုက် ပ္ဍဲတုၚ်ဇြယာတ်တုဲ ဒးချိုတ် (၂)တၠ ဒးလဝ်ဘဲဝပ် (၂)တၠ

တုၚ်ဇြယာတ်၊ အဝ်ဂါတ်(၂၇)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ဍုၚ်တုၚ်ဇြယာတ်၊ ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ဗ္ဒာဲတၞုၚ်ဂၠံၚ်သုသာန်ယွာလေဝ်ဂှ် ဒးလဝ်မာၚ်တုဲ ဒးချိုတ် (၂)တၠ ဒးလဝ်ဘဲဝပ် (၂)တၠရဂှ် ဂွံတီကေတ် နူဂကောံဇြဟတ်ပၠန်ဂတး KRF ရ။

ဒပ်ကံၚ်ဇြဳပၞာန် ကံၚ်ဇြဳပၞာန်ကဵု ပျူသဝ်ထဳ ဇြဟတ်နွံ ဗ္ဒာဲ (၃၀)ဂှ် ပ္ဍဲဂိတုအဝ်ဂါတ် စၟတ်တ္ၚဲ (၂၄)အခိၚ်ဇိုၚ်သဝ်တ္ၚဲ ၜိုတ် (၉)နာဍဳ ဃောထ္ပက်လုပ်ကၠုၚ်ပၞာန်တိုက်ဂှ် ဒးလဝ်မာၚ်ဗတိုက်ဒပ်ပံၚ်ကောံ ဂကောံဇြဟတ်ပၠန်ဂတးတအ် ပါံစွံလဝ်ရ။

ကြဴနူဒးလဝ်မိုၚ်ဗတိုက်တုဲဂှ် ဒပ်ကံၚ်ဇြဳပၞာန် လပှ်ကေတ်ဏာ ကောန်ဒပ်ကံၚ်ဇြဳပၞာန်ဇီုကပိုက်ဒးချိုတ်လဝ်တအ်ဂှ်တုဲ က္လေၚ်ဆုတ်တိတ်လဝ် ကရောၚ်ပၞာန်ရဂှ် ညးတာလျိုၚ်လလောၚ်ပရိုၚ် ဂကောံဇြဟတ်ပၠန်ဂတးကျာ်ထဝ် KRF ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဃောဒးလဝ်မာၚ်ဗတိုက်ဂှ် ကောန်ဒပ်ကံၚ်ဇြဳပၞာန် ဒးချိုတ်လဝ် (၂)တၠတုဲ ကောန်ဂကောံပျူသဝ်ထဳ (၁)တၠ ကေုာံ ကောန်ဒပ်ကံၚ်ဇြဳပၞာန် (၁)တၠ ဒးလဝ်ဘဲဝပ် ဒဒှ်ရဂွံတီကေတ် နူတံရိုဟ်တၚ်ဂၞၚ်ပရိုၚ်ပ္ဍဲဒပ်ဂှ် ညးဟီုလဝ်ရ။

ပ္ဍဲမွဲဗွိုၚ် ဗ္ဒာဲဍုၚ်တုၚ်ဇြယာတ်ဂှ် တုဲကၠုၚ်မွဲၜါတ္ၚဲတေံလေဝ် ဒပ်ပံၚ်ကောံ ဂကောံဇြဟတ်ပၠန်ဂတးတအ် တိုန်လ္တူဂၠံၚ် ကၠောန်သ္ပလဝ်ပရေၚ်စၟဳစၟတ် သွက်ပရေၚ်ထိၚ်ဒဝ်တိဍာ်ရ။

ပ္ဍဲဍုၚ်တုၚ်ဇြယာတ် ဂကောံဇြဟတ်ပၠန်ဂတး ဇြဟတ်ခိုဟ်ဒၟံၚ်ဂှ်မ္ဂး ဒပ်ပၞာန်တိုက်ကံၚ်ဇြဳပၞာန် ခမရ (၂၀၇) ကေုာံ ဒပ်အမၠံက် စၟတ် (၃၁၀)တအ် ဖျေံလဝ်သ္ဇိုၚ်တုဲ ပန်ဖျေံဒၟံၚ်လွဟ်ဇၞော် ပ္ဍဲလ္ပာ်ကွာန်တအ် အရိုဟ်ဒဒှ်တ္ၚဲ ကၠောန်သ္ပဒၟံၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – SAC Channel