ဟိုတ်နူၚုဟ်ဖျာက္ဍၚ်တုဲ အပ္ဍဲဒပ်ပၞာန်ဗၟာ ညာန်ညေဲဒၟံၚ်

နေဗျဳဒဝ်၊ အဝ်ဂါတ် (၂၇)

ပ္ဍဲလက်ထက်ကံၚ်ဇြဳပၞာန် မသီလဝ်အဝဵုကၟိန်ဍုၚ် နကဵုလွဟ်လက်နက်ဂှ် ဒၟါနူၚုဟ်ဖျာက္ဍၚ်တိုန်ကၠုၚ် ကဵုဆဂှ်ရ ညးဍုၚ်ကွာန်ကောန်အရာပ်တံသၟးဟွံက သီုကဵုညးထံက်ဂလာန်ဒပ်ပၞာန်တံကဵု အပ္ဍဲကဵုဒပ်ပၞာန်ဍေံတံဂှ်လေဝ် ပရေၚ်ပါ်ပါဲတံ သၠုၚ်တိုန်ဒၟံၚ်ရ။

မ္ၚးနူဇြဟတ်ဒပ်လေၚ်ဒိုက်တံဂှ် ကောန်ဒပ်ကံၚ်ဇြဳပၞာန် သီုစိုတ်ဓာတ်စှ်ေဒၟံၚ်တံဂှ်ဝွံ မွဲလ္ပာ်တေံ ကရောံၚုဟ်ဖျာက္ဍၚ်ဂှ် ပရေၚ်ထပိုတ်သြန်ဂိတုနာနာသာ်တံဂှ်တုဲလေဝ် ဒးဆေၚ်ဒၟံၚ်မုက် ကုပြသၞာပရေၚ်စသုၚ်မံၚ်စံၚ်သ္ၚိကၟိန်တံ ဇၞော်ကဵုဇြဟတ်ရ။

အတိုၚ်သြန်လောန်တိုၚ်(မ်) ဂၠိုက်ဂၠါဲသၟာန်သၟုက်ဂွံဂှ်မ္ဂး သြန်ဂိတုကောန်သ္ဂံၚ် ဂွံဒၟံၚ်ၜိုတ်ၜါကိုဋ်မွဲဠက်ဒ္ကေဝ်ဂှ်ဝွံ နူကဵုၚုဟ်ဒုၚ်လျိုၚ်လမျီု၊ သြန်ပ္ကောံပ္ဍဲဗာန်၊ ပရေၚ်ချိုတ်ဂျိုၚ်၊ ၚုဟ်ပၟတ်၊ သြန်ဂလေံကဝ်ဝေဒ် သွက် (၂) ဂိတုတံကီု စဵုကဵုၚုဟ်ကယျိုၚ်ဓမ္မစက်တံဒှ်တမ် ထ္ၜးဟိုတ်နာနာသာ်တုဲ ထပိုတ်ဒၟံၚ်သြန်ဂိတုဂှ်ရ မွဲဂိတုမ္ဂး သှ်ေဒၟံၚ် ၜိုတ် ၄၅၀၀၀ ဒ္ကေဝ်ဓဝ်ရ။

ပ္ဍဲကဵုအကာဲအရာဏံဂှ် သ္ၚိကၟိန်ကောန်သ္ဂံၚ် တိတ်ဒၟံၚ်မုက်ပၞာန်ဂမၠိုၚ်ဝွံ ကဵုသြန်ဂိတုဂှ် ဟိုတ်နူဟွံရုမ်ဂပ်ဂှ်ရ ကေတ်သ္ၚုသက်သာအပ္ဍဲဒပ်ကီု၊ ကေတ်သြန်ဂလေံ နကဵုအိက် ၂၀ တံတုဲ ဒးပသောၚ်ဒၟံၚ်ပြသၞာပရေၚ်စသုၚ်မံၚ်စံၚ်သ္ၚိကၟိန်တံဂှ်တုဲ ကွာၚ်ရဂှ် ရာန်စဟွံမာန်ရပုဟ်ဂှ် သမ္ဘာကောန်ပၞာန်မွဲတၠ သ္ဂးရ။

ပြသၞာၚုဟ်ဖျာက္ဍၚ်တံကဵု သြန်ဂိတုဟွံရုမ်ဂပ်တံဂှ် ပ္တိုန်ထ္ၜးဒၟံၚ် စဵုကဵုသ္ကိုပ်တမ်ဒပ်တံနွံကီုလေဝ် သောၚ်ကလးရေၚ်တၠုၚ်ကဵု မုမှဟွံမွဲပုဟ်ဂှ် ညးမစုက်လုက်ကဵု ဒပ်ပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အလဵုသၞာဲဒဴမၞုံကဵုကဆံၚ်တံဂှ် ဒးဂဗဒၟံၚ်ယျဟီုတှ်ေ ဍေံတံပ္တိုန်ထ္ၜးတုဲ သ္ကိုပ်တမ်ဒပ်တံဂမၠိုၚ်လေဝ် တီဒၟံၚ်ရ။ ဆ္ဂး တီဒၟံၚ်ကီုလေဝ် ဟွံဂံၚ်ပ္တိုန်ထ္ၜး လ္တူတေံပုဟ်။ ဟီုဒၟံၚ် ဒဒှ်ရကၠိုဟ်ဒၟံၚ်သၟးမွဲရ။ ဒှ်အခက်အခုဲဗီုဏံဂှ် ကၠိုဟ်ဒၟံၚ်ရ။ ဒှ်ဒၟံၚ်ၜိုတ်ကဆံၚ် ဟီုပြေကဵုစိုတ်ညိညရ။ အလဵုဍေံတံလေဝ် တီဒၟံၚ်ရ၊ နကဵုညးတံ ဟွံဂံၚ်ပ္တိုန်ထ္ၜး လ္တူတေံပုဟ်။ မုဒးကၠောန်ဒၟံၚ်ရောဟီုတှ်ေ ကောန်ပၞာန်တံဂှ် အာပံက်သြိုဟ်ကဵု ရဲထံက်ဂလာန်ဒပ်ပၞာန်တံရ။ မၞိဟ်တံဏံဂှ် ပ္တိုန်ထ္ၜးကၠုၚ် အကာဲအရာအပ္ဍဲဒပ်ပၞာန်တံ လ္တူလပှ်ကျာဂှ် ဂွံဆဵုကၠုၚ်ရ။ မၞိဟ်အပ္ဍဲတေံလေဝ် ဟီုဂးကၠုၚ်အိုတ်ရ“ သာ်ဝွံ သ္ဂးရ။

သွက်ပရေၚ်စသုၚ်မံၚ်စံၚ် သ္ၚိကၟိန်ဒပ်ပၞာန်တံဂှ် ကံၚ်ဇြဳပၞာန် ပရအ်ကဵုဒၟံၚ်ဇွောံမအပ္ဍဲဒပ်တံနွံကီုလေဝ် သွက်ဇွောံမတံဏံဂှ် ထပိုတ်ဒၟံၚ်သြန် အတိုၚ်ၚုဟ်မ္ၚးဏံ နူကဵုသြန်ဂိတုတံ နွံဒၟံၚ်ဂှ် သ္ၚိကၟိန်ဒပ်ပၞာန်ဂမၠိုၚ် သ္ဂးအိုတ်ရ။

မွဲလ္ပာ်ပၠန်ဂှ် ကရောံသြန်ဂိတုဟွံပဵုတိုန်ကၠုၚ်ဂှ် ဘဲဒဏ်ၚုဟ်ဖျာက္ဍၚ်တံဂှ် အကြာသ္ၚိကၟိန်ဒပ်ပၞာန်တံ ရမျာၚ်ကရောတ်ကရေဝ်တံ မံက်တိတ်ကၠုၚ် ထတ်တ်ရ။

ဗိုလ်ဇၞော်ထက်မျေတ် မသ္ပလဝ်ဇြဳဒဳအာမ်ဂှ် ကရောံအသိၚ်ၚုဟ်ဖျာက္ဍၚ်တံဂှ် ဟိုတ်နူပြသၞာခတှ်အပ္ဍဲဒပ်ပၞာန်တံတုဲ ရဲဂြိပ်တိတ်နူပၞာန်တံ သာဂၠိုၚ်ကၠုၚ်မာန်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အဓိကဂှ်တှ်ေ ဒုၚ်ဒဝ်ပြဝဒပ်ပၞာန်တံဟွံမာန်မ္ဂး မၞိဟ်ဂ္စါန်ကၠောံကၠုၚ်လ္ပာ်ဏံဂှ် သာဂၠိုၚ်ကၠုၚ်မာန်ရ။ ဂၠါဲကၠုၚ်ဂၠံၚ်ဍာန် သာပြေပြံၚ်နူဏံအိုတ်ဏောၚ်။ ဟွံသေၚ်မ္ဂးလေဝ် မၞိဟ်ဘဝဒးလီုဂှ် ဂၠိုၚ်ကၠုၚ်မာန်ဏောၚ်။ အပ္ဍဲတေံဂှ် မၞိဟ်ခတှ်ဂၠိုၚ်၊ ဒှ်ပြသၞာ သောၚ်ဟွံမာန်တုဲ ဂြိပ်တိတ်ဂှ်လေဝ် နွံ။ ဂြိပ်တိတ်တုဲမှ ဖေက်ဒးဒုၚ်ရပ်တုဲ မၞိဟ်ကလေၚ်လုပ်အာ ပ္ဍဲကဵုဒပ်မွဲမွဲပၠန်ဂှ်လေဝ်နွံ။ မၞိဟ်ကၠောန်ဗီုဏံဂှ် သာဂၠိုၚ်ကၠုၚ်မာန်ဏောၚ်” သာ်ဝွံ သ္ဂးရ။

ဆ္ဂး ဟိုတ်နူစေဝ်ပၞောန် မလလောၚ်ပ္တိတ်လဝ် အပ္ဍဲဒပ်တံဂှ်တုဲ ယဝ်ရဒစဵုဒစး ကုဒပ်ပၞာန်၊ ယဝ်ရဆဝ်မ္ၚုဟ် ညံၚ်ဂွံကလိုက်ကၟဵုမ္ဂး ဒးဒုၚ်ဖျေံဒုဟ်ဒဏ် သီုဒဏ်ထံၚ် သီုဒဏ်ဂစိုတ်မာန်ဂှ်ရ ဂွံဒှ်ကၠုၚ်ရုရုသံၚ်သံၚ်ဂှ် ဟွံမွဲပုဟ်ဂှ် ဗိုလ်ဇၞော်ထက်မျေတ် ဇြဳဒဳအာမ်ဂှ် သ္ၚဳဂၠိပ်လဝ်ရ။

ပ္ဍဲဂိတုတုဲကၠုၚ်တေံဂှ်လေဝ် ပ္ဍဲကဵုတမ်ဒပ် ရးဗဂေါမွဲဂှ် မၞိဟ်ပါ်ပါဲ ဒပ်ပၞာန် စပ်ကဵုပရေၚ်ၚုဟ်ဖျာက္ဍၚ်တံ ဒးဒုၚ်ရပ်လဝ်ရောၚ် ပရိုၚ်တမ်ရိုဟ်နူကဵုအပ္ဍဲဒပ်တံ ဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာမာန် ဟွံမွဲဏီရ။

ၚုဟ်ဖျာစၞစသ္ဇိုၚ် ပါလုပ်သီုကဵုသ္ၚုတံဂှ်ဝွံ အပ္ဍဲကာလသီအဝဵုပွိုၚ်ၜါသၞာံပြၚ်ဏံ ကပေါတ်မွဲဂကူဂှ် ၚုဟ်သၠုၚ်တိုန်ကၠုၚ် နူ ၃ ဆ စဵုကဵု ၄ ဆတုဲ သ္ၚု(ဧည့်မထ) သ္ၚုကြံၚ်ဂှ်လေဝ် မွဲရိုက်ဂှ် ၚုဟ်မၞုံဒၟံၚ် စဵုကဵု (၈၀၀၀၀) ဒ္ကေဝ်ရ။

ၚုဟ်ဖျာက္ဍၚ်တံဂှ် အလဵုညးထံက်ဂလာန်ဒပ်ပၞာန်တံ ပ္တိတ်ဒၟံၚ်သၟာန်တံနွံကီုလေဝ် ကံၚ်ဇြဳပၞာန်ဂှ် ၚုဟ်ဖျာက္ဍၚ်ဒၟံၚ်ဂှ်ဝွံ ဟိုတ်နူတၠကမၠောန်ပရေၚ်ပိုန်ဒြပ်တံကဵု ရဲဝေၚ်ၚုဟ်လှုဲတံဏောၚ်ဂှ် ပ္တိုန်လဝ်ဒုဟ်ရ။

မွဲလ္ပာ်ပၠန်ဂှ် ကံၚ်ဇြဳပၞာန်ဝွံ သွက်ဂွံသောၚ်ကလး ပြသၞာၚုဟ်ဖျာက္ဍၚ်ဂှ်တုဲ ဒက်လဝ်ကမ္မတဳပရေၚ်ၚုဟ်ဖျာဂွံညိၚ်ဝတ်တံကီုလေဝ် ဒဵုကဵုအခိၚ်လၟုဟ် ညံၚ်ၚုဟ်ဖျာဂွံစှ်ေ ရေၚ်တၠုၚ်ဟွံမာန်ဏီရ။

ညးမၚ်ရံၚ်ပရေၚ်အပ္ဍဲဒပ်တံဂှ် နကဵုကံၚ်ဇြဳပၞာန် ထိၚ်ဒက်ကၠေံ အကာဲအရာအပ္ဍဲဒပ် သီုၚုဟ်ဖျာက္ဍၚ်တံဂှ် ဟွံမာန်မ္ဂး သွက်ပရေၚ်စသုၚ်မံၚ်စံၚ်သ္ၚိကၟိန်တံတုဲ ကောန်သ္ဂံၚ်ဒပ်ပၞာန် မသ္ပကၠုၚ်ဇြဳဒဳအာမ်တံ သာဂၠိုၚ်ကၠုၚ်မာန်ရောၚ် သ္ၚဳဂၠိပ်လဝ်ရ။

ပရိုၚ်−သြၚ်လောန်တိုၚ်(မ်)