တၠဒုဟ် ကၟိန်ဍုၚ်သ္ဂောံလီုလာ်ဆောံလေၚ်အဓိကဂှ် ဒှ်ဒပ်ပၞာန်ရဂှ် ဂကောံဇြဟတ်ပၠန်ဂတးတံခၠေဝ်ပၠန်

ဒဳမအ်သဵု၊ အဝ်ဂါတ်(၂၇)

ဟိုတ်နူပရေၚ်သီအဝဵုကၟိန်ဍုၚ် နကဵုဇြဟတ်လွဟ်တုဲ ညးတၠဒုဟ် ဖဵုအဆက်လက္ကရဴ ပရေၚ်လီုလာ်ဆောံလေၚ်တံဂှ် ဒှ်ဒပ်ပၞာန်သီအဝဵုဟေၚ်ရဂှ် ဂကောံဇြဟတ်ပၠန်ဂတး ကေုာံ ပရေၚ်ဒဳမိုကရေဇြဳတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ကံၚ်ဇြဳပၞာန်ဂှ် ပရေၚ်ဗ္တိုက်က္တဵုဒှ်မံၚ် ပ္ဍဲဍုၚ်တံဂှ် ဂကောံဒပ်စဵုဒၞါညးဍုၚ်ကွာန်(PDF) ဒစဵုဒစးမံၚ်ဍေံတံ ကၠောန်သ္ပမံၚ်ရဂှ် ပ္ဍဲကၟိန်ဍုၚ်သၟးဟွံက ပ္ဍဲပွဳဗွိုၚ်ဍုၚ်သ္အာၚ်တံလေဝ် စောတ်စောဲပ္တိုန်မံၚ်ဒုဟ်မွဲခဏမွဲခဏရ။

ပ္ဍဲကောံဓရီု ပရေၚ်ဗ္တိုက်သ္အးအမှုပရေၚ်တတ်ကၠောံဍုၚ် ကဆံၚ်ဝန်ဇၞော်အာဇြဳယာန် ကၠောန်ဗဒှ်လဝ်ပြဟ်ဟ်ဏံဂှ် ဝန်ဇၞော်ကာပ္ဍဲဍုၚ်ကံၚ်ဇြဳပၞာန် ဒုသ္ကိုပ်ဗိုလ်ဇၞော်ယျာပျေအ်ဂှ် ပ္ဍဲဍုၚ်ဗၟာ (PDF)ဒက်ပ္တန်လဝ် နကဵုယၟုနာနာသာ်တံဂှ် ကလိလောန်မံၚ် ပွပကီုပရာပ်တံရောင်ဂှ် စောတ်စောဲဟီုဂးလဝ်ရ။

ဟိုတ်နူပရေၚ်ဗ္တိုက် (PDF)တံတုဲ ညးဍုၚ်ကွာန်ဒုဟ်ဒဏ်ဟၟဲတံ၊ ခမဳသၚ်တံ၊ သဳလတံ ဒးချိုတ်လဝ်နွံတုဲ စမြိုၚ်ဆေၚ်စပ်ကဵုပရေၚ်ထတ်ယုက်၊ ဂၠံၚ်ဍာန်၊ ဒဒန်၊ တိုၚ်တာဝါ ပၟတ်ဓါတ်လလဳကေုာံ ပရေၚ်ဆက်စၠောံတံ က္တဵုဒှ်လဝ်ပရေၚ်ဆောံလေၚ်တံရောၚ်ဂှ် သ္ဂးရ။

လ္တူတၚ်စောတ်စောဲဟီုဂးမံၚ်ဏံဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ဒဳမအ်သဵု၊ တွဵုရးကရေၚ်ဍာဲမွဲတၠဂှ်တှ်ေ ဒပ်ပၞာန်တံ ပ္ဍဲဗလးတိဏံဂှ် ဟိုတ်နူကေတ်မံၚ်ပရေၚ်စဵုဒၞါ ကုဘာဗ္တောန်လိက်တံ၊ ဘာကျာ်တံတုဲ ပလီုပလာ်မံၚ် သ္ၚိဌာန်ကၠအ်သွဝ်ညးဍုၚ်ကွာန်တံရဂှ် ဟီုကဵုဌာန်ပရိုၚ် သြၚ်လောန်တိုၚ်မ်ရ။

“ပ္ဍဲဗလးတိဇေတ်တ်ဏံဂှ် ပလီုပလာ်မံၚ် ဘာကျာ်တံ၊ ဘာဗ္တောန်လိက်တံဂှ် ညးဂှ်ကၠောန်မံၚ်ရောဟီုဂှ် ညးဍုၚ်ကွာန်တံ တီလဝ်တုဲတုဲရ။ ပိုဲလေဝ်တီမံၚ်ရ။ ဍေံတံ(ဒပ်ပၞာန်)ဂှ်တှ်ေ ကေတ်မံၚ်ပရေၚ်စဵုဒၞါကဵုကျာ်တှ်ေ၊ ကေတ်ပရေၚ်စဵုဒၞါကဵုကျာ်တုဲ မံၚ်မံၚ်နွံမံၚ်၊ ကေတ်ပရေၚ်စဵုဒၞါကဵု ဘာဗ္တောန်လိက်တုဲ မံၚ်ဒၟံၚ်နွံမံၚ်၊ ကေတ်မံၚ်ပရေၚ်စဵုဒၞါတၞဟ်ဟ်တုဲ မံၚ်မံၚ်နွံရ။ ပ္ဍဲဗလးတိဏံ ပိုဲတံဂှ် ပွပလီုပလာ်သ္ၚိဌာန်ကၠအ်သွဝ်ညးဍုၚ်ကွာန်တံလေဝ် ဟၟဲပုဟ်၊ ပွစံၚ်ပလီုတံလေဝ် ဟၟဲရ။ တုဲပၠန် ပိုဲတံစံၚ်ပလီုပလာ်လဝ် စမြိုၚ်ပရေၚ်ဘာသာတံလေဝ် ဟၟဲရ။ ပလီုပလာ်မံၚ် ပ္ဍဲဗလးတိဇေတ်တ်ဏံဂှ် ဒှ်မံၚ်ဍေံတံရ” သာ်ဝွံ ညးသ္ဂးရ။

တွဵုရးကရေၚ်ဍာဲဂှ် ကြဴနူဒပ်ပၞာန်သီအဝဵုတုဲ ဒှ်ဒေသ ပရေၚ်ရပ်လွဟ်ပၠန်ဂတးဒပ်ပၞာန် နူကဵုဂကောံဒပ်စဵုဒၞါဒေသဂမၠိုၚ် ပါလုပ်သီုဗော်ပရေၚ်တဴတက်ကောန်ဂကူကရေၚ်ဍာဲ(KNPP) မဒှ်ဂကောံရပ်လွဟ်ကောန်ဍုၚ်အရၚ် မမံက်ဂတဝ်ကၠုၚ်တံ ဇြဟတ်ခိုဟ်မံၚ်မွဲရ။

ပ္ဍဲအကာဲအရာဏံဂှ် ဒပ်ပၞာန်တံ မ္ၚးနူပၞာန်ထ္ပက်ဗလးတိကဵု ပန်ပှော်လွဟ်ဇၞော်တံဂှ် ဟိုတ်နူသုၚ်စောဲကၠုၚ် ပရေၚ်ဗ္တိုက်တရဴကျာတံ သၠဲသၠဲလးလးဂှ်ရ ပ္ဍဲကာလသီအဝဵု ပွိုၚ် (၂)သၞာံပြၚ်ဏံ ပ္ဍဲတွဵုရးကရေၚ်ဍာဲဂှ် ပရေၚ်ပၞာန်၊ ပရေၚ်ဍုၚ်ကွာန်တံကဵု ပွဒးဒုၚ်ဝးပ္ကဝ် အခေါၚ်အရာမၞိဟ်တံလေဝ် သၠုၚ်တိုန်မံၚ်ရ။

အတိုၚ်စရၚ် ဂကောံဇြဟတ်ညးဍုၚ်ကွာန်ကရေၚ်ဍာဲတောတက်ဂှ်မ္ဂး ပ္ဍဲတွဵုရးကရေၚ်ဍာဲဂှ် ကောန်အရာပ် (၃၇၅)တၠ ဒးဒုၚ်ဂစိုတ်ဂယိုၚ်လဝ်တုဲ ပါလုပ်သီုညးဒးချိုတ်လဝ် အဃောပါဲဒဴဘဲပၞာန်တံ (၁၄၁)တၠဂှ် ပရေၚ်ဗ္တိုက်တရဴကျာ (၅၇၂)ဝါ၊ စမြိုၚ်ပရေၚ်ဘာသာတံကဵု သ္ၚိဒၟံၚ်တံဂှ် အပံၚ်လၟိဟ် ၁၆၇၀ မ ပြၚ် လီုလာ်လဝ်ရဂှ် ပ္ဍဲဂိတုအဝ်ဂါတ် စၟတ်တ္ၚဲ(၁)ဂှ် လလောၚ်ပ္တိတ်လဝ်ရ။

ဒါရိုက်တာ ဂကောံအခေါၚ်အရာမၞိဟ်ကရေၚ်ဍာဲ (KnHRG) ဥူဗညာဂှ်လေဝ် ပွပကီုပရာပ် က္တဵုဒှ်မံၚ်ပ္ဍဲဍုၚ်သီုဖအိုတ်တံဂှ် ဒှ်ဖဵုအဆက်လက္ကရဴ က္တဵုဒှ်ကၠုၚ် ကြဴနူဒပ်ပၞာန်သီအဝဵုဏောၚ်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

“ပွပကီုပရာပ်က္တဵုဒှ်မံၚ် ပ္ဍဲဍုၚ်ဏံသီုဖအိုတ်ဂှ် စနူလဵုရောဟီုတှ်ေ ဣဏံဂှ် သောၚ်ကွေံကွေံရ။ ဒှ်ဖဵုအဆက်လက္ကရဴ က္တဵုဒှ်ကၠုၚ် ကြဴနူဒပ်ပၞာန်သီအဝဵုရ။ ဣဏံဂှ်မှ ပ္ဍဲကာလဒပ်ပၞာန်စသီအဝဵုတုဲတေံဂှ် ညးဍုၚ်ကွာန်တံ ညံၚ်ဂွံထ္ၜးဆန္ဒအာတ်မိက်ဒၟံၚ် ၜိုဟ်ဟ်သြိုဟ်ဟ်မာန်၊ သွက်သ္ဂောံကလေၚ်စိုပ်ဂၠံၚ်တရဴ ဒဳမိုကရေဇြဳမာန် လ္ဂါမ်ဇိုၚ်ပ္တဝ်က္ဍိုပ်မာန်သာ်ဏံတံရ အာတ်မိက်လဝ်ဆၜိုတ်ဏံရ။ သ္ပတံနူ ပကီုပရာပ်ဗ္တိုက်သ္အးလ္တူဏံတုဲ ကၞောတ်တဲ ပ္တဝ်ကၠုၚ်က္ဍိုပ် လ္ပာ်ပရေၚ်ပၞာန် သာတုဲပရေံတိုန်ကၠုၚ်တံတုဲဗက် ပွပကီုပရာပ်တံ သာတုဲဂၠိုၚ်အာရ။ ဟိုတ်ဂှ်ရ တၠဒုဟ်အဓိကဂှ် ဒပ်ပၞာန်ရ။ ဒှ်ကံၚ်ဇြဳပၞာန် မေန်အံၚ်လှိုၚ်တံရဂှ် ၁၀၀တၟံကၠံ ဟီုစဂွံပေၚ်ၚ်ရ” သာ်ဝွံ ညးသ္ဂးရ။

ဒုသ္ကိုပ်ဗိုလ်ဇၞော်ယျာပျေအ်ဂှ်တှ်ေ နိဿဲကေတ် လိက်ဒုၚ်စဳရေၚ် ပရေၚ်ပကီုပရာပ်ဆေၚ်စပ်ကဵုဂၠးကဝ်ဂှ်တုဲ ဂကောံပကီုပရာပ်တံ စသုၚ်စောဲကၠုၚ်ဒရုၚ်မသက္ကုမၞိဟ်ဒဳတံဂှ် ဒှ်ကၠုၚ်တၚ်ကော်ဆဴ သွက်အနာဂတ်ဏံမွဲရဂှ် ထပ်ဟီုလဝ် ပ္ဍဲကောံဓရီုဂှ်ရ။

ညးတာလျိုၚ်ပရေၚ်ပၞာန် ဂကောံဇြဟတ်ပၠန်ဂတးကျာ်ထဝ် (KRF)ဂှ်တှ်ေ ကိုပ်ကၠာဒပ်ပၞာန်ဂွိုအ်သီအဝဵုဂှ် ဗီုကိစ္စက္တဵုဒှ်မံၚ်လၟုဟ်ဏံ ကေၚ်က္တဵုဒှ်လဝ်ကီုဟာဂှ် ပ္တိတ်တၚ်သၟာန်ကုကံၚ်ဇြဳပၞာန်တုဲ သွက်ဂွံဒုၚ်ကေတ်လျိုၚ် နကဵုသတ္တိနွံနွံဂှ် ဖ္တိုက်ဖ္အောဝ်လဝ်ရ။

“အဲမိက်ဂွံကလေၚ်သၟာန်မွဲဂှ် ကိုပ်ကၠာမေန်အံၚ်လှိုၚ် ဟွံဂွံသီအဝဵုဂှ် ကိစ္စဗီုလၟုဟ်ဏံ ကေၚ်ဒှ်လဝ်ကီုဟာ။ သီအဝဵုဂှ်ဂှ် သီအဝဵုရဂှ် ဟွံဂံၚ်လလောၚ်တြးနကဵုသတ္တိနွံနွံမွဲသာ် ထိၚ်အဝဵုတံမုတံရဂးတုဲ ဒှ်မံၚ်ကောန်ပၞာန်ဖိုဟ် ပ္တောံမံၚ်ညံၚ်မၞိဟ်ဒးဂိလဝ်တံဂှ် လၟုဟ်ဂှ် စၟဳစမံၚ်ညးဂှ်ရော။ မုက္တဵုဒှ်မု ဂုဏ်နူမုရောဟီုဂှ် အလဵုဍေံတံလေဝ် တီမံၚ်ရ။ ကလေၚ်လီဠာန်မံၚ်ဇကုဇကုပၠန်ဂှ် ဒှ်ပြဝကြအ်အိုတ်ရ။ သီအဝဵုရဂှ် ညးဟွံဂံၚ်ဟီု နကဵုသတ္တိနွံနွံတံဂှ် ညးလဵု ချိုတ်မံၚ် နူကဵုဟိုတ်သာ်လဵု နကဵုသတ္တိနွံနွံ ဗွဲမဍာံစၟတ်ဂှ် ဂံၚ်ပါ်ပါဲဟီုဂးညိဟာ။ နကဵုသတ္တိနွံနွံ ကေတ်တာလျိုၚ်တုဲ ဒုၚ်ထောံဝန် သွက်ပြဝဇကုညိ” သာ်ဝွံ ညးသ္ဂးရ။

ကံၚ်ဇြဳပၞာန် ရပ်ဒက်လဝ် က္ဍိုပ်သ္ကိုပ်ကၟိန်ဍုၚ်တံ နကဵုတၚ်ထ္ၜးဟိုတ် မမာဲဟွံဓဝ်ယာ ပ္ဍဲပေါဲရုဲမာဲတံဂှ် ကုညးဍုၚ်ကွာန်ထ္ၜးဆန္ဒဒစဵုဒစးမံၚ် ၜိုဟ်ဟ်သြိုဟ်ဟ်တံဂှ် သုၚ်စောဲလွဟ် ပါ်ထ္ကးလဝ်တုဲ ကၠောန်သ္ပလဝ် ပွရပ်ဒက်ဖျေံထံၚ်တံရ။

ဟိုတ်ဂှ်ရ ညးကတိုၚ်ကၟဟ်ပရေၚ်ဒဳမိုကရေဇြဳတံကဵု ညးဍုၚ်ကွာန်ဒုဟ်ဒဏ်ဟၟဲတံ ဟွံဒေါံဟွံဂွံ ဒးရုဲစှ်ကွာ်ကၠုၚ် ဂၠံၚ်တရဴရပ်လွဟ်တံတုဲ ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်ဂှ် ရပ်လွဟ်ပၠန်ဂတးမံၚ် မဒှ်ရ။

လ္ပာ်ကံၚ်ဇြဳပၞာန်ဂှ်တှ်ေ ပါလုပ်သီုဂကောံပၠန်ဂတးရပ်လွဟ်တံဂှ် ညးဍုၚ်ကွာန်ဒုဟ်ဒဏ်ဟွံမွဲတံ၊ ညးရီုဗၚ်ထံက်ပၚ်တံဂှ် ညံၚ်သ္ဂောံပြးဇးအာဂှ် ကၠောန်မံၚ်ပရေၚ်ပါ်ထ္ကးဆီတံ နကဵုနဲကဲစုၚ်လေၚ်ရဂှ် ညးဒစဵုဒစးတၠအဝဵုပၞာန်တံ သ္ဂးအိုတ်ရ။

“အဓိကဂှ်တှ်ေ ပရေၚ်ညဳသၟဟ်ပိုဲလီုအာဟွံဂွံပုဟ်။ ပရေၚ်ညဳသၟဟ်လီုအာမ္ဂး ဂၠဴပြးမ္ဂး ကၠဓဇက်ရ၊ ကၠမဓဇက်ဂှ် ဍဵုဍိုက်မံၚ် အလုံမွဲကၟိန်ဍုၚ် ဓဇန်ဓဇန်ရ ညးဂှ်ရောဟီုဂှ် ညးဍုၚ်ကွာန်တံသီုဖအိုတ်တီမံၚ်ရတှ်ေ ညံၚ်ဟွံဂွံ ဒုၚ်ဗလးထောံမတ် ကုတိုၚ်ပ္ကဴရန်တၟအ်ဇကုတုဲ သွက်ဂွံဆက်အာဂတတေံ နွံပၟိက်ရ” သာ်ဝွံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

ပြဟ်ဟ်ဏံဂှ်တှ်ေ မွဲကရောံကဵုပရေၚ်ကၟာတ်လဒဵုကေတ်အရေဝ်ဍုၚ်သ္အာၚ်ဂှ် ပရေၚ်ဗ္တိုက်ထပိုတ်ရိုဟ်ကၞက်သၞောတ်တၠအဝဵုပၞာန် နကဵုဂၠံၚ်တရဴသ္ပမာန် ညးဍုၚ်ကွာန်နွံပၟိက် ဒဳမိုကရေဇြဳ ပၠန်ဂတးမံၚ်ကုကံၚ်ဇြဳပၞာန် ဒးပံက်လဝ်မုက်ပၞာန်ကြပ်အလုံဍုၚ်မွဲတံ ဇြဟတ်ခိုဟ်မံၚ်ဖိုဟ်ရောၚ်မဒှ်ရ။

ဂကောံသုတေသန (ISP Myanmar)ဂှ် ပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ အလုံမွဲကၟိန်ဍုၚ် ပေါဲဗ္တိုက်အပံၚ် စဵုကဵု(၁၀၀၀၀)ပြၚ်က္တဵုဒှ်လဝ်ရဂှ် ပ္ဍဲဂိတုအဝ်ဂါတ် စၟတ်တ္ၚဲ (၁၈)ဂှ် လလောၚ်ပ္တိတ်လဝ်ရ။

ပရိုၚ်-သြၚ်လောန်တိုၚ်မ်

ဗီု-MOI