မတ်မလီု၊ သေပ်တေမ်ဗာ(၇)
တွဵုရးဍုၚ်မန်၊ ဍုၚ်မတ်မလီု၊ ဇြေန်တာသ္အးဆီစွက်ဂြိုဟ်ကောန်တၟံမတ်မလီု မၞုံပ္ဍဲအပိုၚ်ခြာရုၚ်စက်ကျောက်တာန်ဂှ် ဂိတုသေပ်တေမ်ဗာဏံအိုတ်မ္ဂး ကၟာတ်သီအာမွဲချိုန်ခနရောၚ်ဂှ် ဖံၚ်ဒေယှေန်စွက်ဂြိုဟ်ကောန်တၟံမတ်မလီု လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၅)ရ။
ပ္ဍဲကဵုဇြေန်တာသ္အးဆီစွက်ဂြိုဟ်ကောန်ကၟံဂှ် ဟိုတ်နူညးမြိမြန်ယဲဆိုက်ဗ္ဒက်စဳကၠးတအ် စ္ဍးတိတ်အာကီု၊ ဟိုတ်နူထပ်ဂၠာဲ ညးမြိမြန်ဆိုက်ဗ္ဒက်စဳကၠးတၟိတအ်ဟွံဂွံကီုဂှ်ရ ဒးကၟာတ်သီလဝ် မွဲချိုန်ခနရဂှ် ညးတာလျိုၚ်ဖံၚ်ဒေယှေန်စွက်ဂြိုဟ်ကောန်ကၟံမွဲတၠ ဟီုလဝ်ရ။
ဆ္ဂးဂှ် ညးယဲကၠုၚ်ကြာတ်စွက်ဂြိုဟ်ကောန်ကၟံတအ်ဂှ် ဒုၚ်တဲရေၚ်တၠုၚ်ကဵုအာ စဵုကဵုဂိတုသေပ်တေမ်ဗာ စၟတ်တ္ၚဲ (၃၀)ရောၚ်ဒှ်တုဲ ယဝ်က္လေၚ်ခါန်ကၞက် ညးမြိမြန်ဆိုက်ဗ္ဒက်စဳကၠးတအ်မာန်ပၠန်မ္ဂး လလောၚ်တြးအာ တ္ၚဲက္လေၚ်ပံက်ပၠန်ရောၚ်ဂှ် ဟီုလဝ်ရ။
ဇြေန်တာသ္အးဆီကောန်ကၟံမတ်မလီုဂှ် စပံက်လဝ် ပ္ဍဲဂိတုဒဳဇြေမ်ဗာ သၞာံ ၂၀၁၈ ဒှ်တုဲ ဒှ်ဇြေန်တာကြဴကြာတ်သ္အးဇ္ၚးကဵုဒၟံၚ် ညးတၠဝေဒနာစွက်ဂြိုဟ်ကောန်ကၟံလီုတအ်မွဲရ။
ဟိုတ်နူဒးကၟာတ်ထောံဇြေန်တာသ္အးဆီစွက်ဂြိုဟ်ကောန်ကၟံဏံတုဲ သွက်တၠဝေဒနာစွက်ဂြိုဟ်ကောန်ကၟံတအ် အခက်ခုဲနွံကၠုၚ်မာန်တုဲ ယဝ်ရအာလွဳလွတ် ပ္ဍဲရုၚ်ဂဥုဲပုဂ္ဂလိကမ္ဂး ပရေၚ်သြန်အိုတ်ဗွဲမဂၠိုၚ် ဒှ်ကၠုၚ်မာန်ရဂှ် တၠဝေဒနာစွက်ဂြိုဟ်ကောန်ကၟံတအ် ဟီုလဝ်ရ။
ပ္ဍဲကဵုဇြေန်တာသ္အးဆီစွက်ဂြိုဟ်ကောန်တၟမတ်မလီုဂှ် ဇၟာပ်ဇၟာပ်ဂိတု တၠဝေဒနာစွက်ဂြိုဟ်ကောန်တၟံ ဗ္ဒာဲ ၂၀တၠ ကၠုၚ်စိုပ်လွဳလွတ်ဒၟံၚ်ရဂှ် ဂွံတီကေတ် အတိုၚ်လဟီုညးတာလျိုၚ်ဖံၚ်ဒေယှေန်စွက်ဂြိုဟ်ကောန်တၟံမတ်မလီုရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai