ပ္ဍဲရေဝ် ညးဒေသ ဒပ်ပၞာန်ရပ်စပ်လဝ် (၁၀) တၠဂှ် အာတ်လှုဲတုဲ ကလေၚ်ဗလးကဵု

ရေဝ်၊ သေပ်တေမ်ဗာ (၇)

ညးဍုၚ်ကွာန်ကောန်အရာပ် (၁၀) တၠ နူကဵုကွာန်ကၞေၚ်တၟအ်ကဵု ကွာန်တၟိ ပွိုၚ်ဍုၚ်ရေဝ်၊ တွဵုရးဍုၚ်မန် နူကဵုဒပ်ကံၚ်ဇြဳပၞာန် မရပ်ဒက်ဏာလဝ် မသက္ကုဟိုတ်တံဂှ် အာတ်လှုဲတုဲ ကလေၚ်ဗလးကဵုလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကြဴနူပေါဲဗ္တိုက်က္တဵုဒှ် ဗ္ဒါဲကွာန် (သံကဒိုက်) ပွိုၚ်ဍုၚ်ရေဝ်တုဲဂှ် ဒပ်ကံၚ်ဇြဳပၞာန်ဝွံ ပ္ဍဲဂိတုသေပ်တေမ်ဗာတုဲကၠုၚ်တေံ ရပ်ဒက်ဏာလဝ် ကောန်ကလောန်ကၠအ် ကေုာံ ညးဒေသ ဒၟံၚ်ကွာန်ကၞေၚ်တၟအ်တံကဵု ကွာန်တၟိတံ (၁၀) တၠရ။

ကြဴနူဂှ်တုဲ ဒပ်ကံၚ်ဇြဳပၞာန်ဝွံ ထိၚ်ဒက်လဝ် ညးဒေသမရပ်နၚ်လဝ်တံ ပွိုၚ် (၃) တ္ၚဲတုဲ ပ္ဍဲဂိတုသေပ်တေမ်ဗာ (၄) ဂှ် မွဲတၠမ္ဂး အာတ်လှုဲ နူကဵု ၅ ကိုဋ်ဒ္ကေဝ် စဵုကဵု ၁၀ ကိုဋ်တုဲ ကလေၚ်ဗလးကဵုလဝ်ရ။

ညးဒေသဒးဒုၚ်ရပ်လ္ၚဵုတံဂှ် ကလေၚ်ဗလးကဵုလဝ် နကဵုလိက်ထံက်ဂလာန် သ္ကိုပ်အုပ်ဓုပ်ကွာန်တံဂှ်ကီုလေဝ် ဗွဲမဂၠိုၚ်ဂှ် ဒးကဵုလဝ်လှုဲ ဒပ်ကံၚ်ဇြဳပၞာန်တံ မအာတ်လဝ်ဂှ်ရောၚ် ညးဒေသမွဲတၠ ဟီုရ။

တုဲကၠုၚ် ပ္ဍဲဂိတုအဝ်ဂါတ် (၂၉) တေံ ပ္ဍဲကဵုဗ္ဒါဲကွာန်(သံကဒိုက်) ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် ပေါဲဗ္တိုက်တံ က္တဵုဒှ်လဝ်တုဲ လ္ပာ်ကံၚ်ဇြဳပၞာန် (၇) တၠ ချိုတ်တုဲ (၈) တၠ ကလိဂွံလဝ်ဝပ်ရောၚ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ လလောၚ်ပ္တိတ်လဝ်ရ။

ပ္ဍဲကဵုပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ယဝ်ရပေါဲဗ္တိုက်က္တဵုဒှ်မ္ဂး ဒပ်ကံၚ်ဇြဳပၞာန်ဝွံ ရပ်ဒက်ညးဍုၚ်ကွာန်ကောန်အရာပ်ဒေသတံဂှ်တုဲ ဘပဠအာတ်လှုဲတံဂှ် ကလိလောန်ကၠုၚ်ဒၟံၚ် အဆက်က်ရ။

ပရိုၚ်−သြၚ်လောန်တိုၚ်(မ်)

ဗီု−Social Media