ပ္ဍဲခရိုၚ်ညံၚ်လေဝ်ပေန် KNU ဂှ် လွဟ်ဇၞော်စှ်ေတုဲ ကောန်အရာပ် (၄) တၠ ချိုတ်တုဲ ၁၆ တၠ ကလိဂွံဝပ်

ညံၚ်လေဝ်ပေန်၊ သေပ်တေမ်ဗာ (၇)

ပ္ဍဲခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် အပ္ဍဲတ္ၚဲအကြာတံဏံ ဟိုတ်နူပရေၚ်ဗ္တိုက်ပန်ပှော် လွဟ်ဇၞော် ဒပ်ကံၚ်ဇြဳပၞာန် မစွံပွန်လဝ် လ္တူညးဍုၚ်ကွာန်ကောန်အရာပ်တံဂှ်တုဲ ကောန်အရာပ် (၄) တၠ ချိုတ်တုဲ (၁၆) တၠ ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံမှာဇန်ကရေၚ် ကေုာံ KNU ဗဟဵုရ။

ပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန် KNU ဂှ် ဗ္ဒိုပ်ဒပ်ကံၚ်ဇြဳပၞာန်လ္ၚဵု ဒးဒုၚ်ဗ္တိုက်သီလဝ်တုဲ ဒပ်ကံၚ်ဇြဳပၞာန် မဇီုကပိုက်ချိုတ်ဂၠိုၚ်လဝ် အပ္ဍဲပေါဲဗ္တိုက်တံဂှ်ဝွံ ကၠောန်ကၠုၚ်ပရေၚ်ဗ္တိုက် လ္တူညးဍုၚ်ကွာန်ဒေသတံရ။

ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံဂှ်တုဲ ပ္ဍဲဂိတုသေပ်တေမ်ဗာ (၁) စဵုကဵု (၄) ဂှ် နူကဵုပွိုၚ်ဍုၚ်မုၚ် ကေုာံ ပွိုၚ်ဍုၚ်ကျံက်ကျဳ ကောန်ၚာ်အာယုက် (၁၂) သၞာံမွဲတၠ၊ မိဇၞော်ဗျု အာယုက် (၈၃) သၞာံမွဲတၠတံပါလုပ်ဂှ် ကောန်အရာပ် (၄) တၠ ချိုတ်အာလဝ်တုဲ ကောန်ၚာ်သၟတ်၊ ညးဗြဴ ကေုာံ ညးဒေသကောန်အရာပ် (၁၆) တၠ ကလိဂွံလဝ်ဝပ်ရ။

ဒပ်ကံၚ်ဇြဳပၞာန်ဝွံ ကြဴနူဒးဒုၚ်သီ ဗ္ဒိုပ်တေတ်ချသုက် မဒှ်ဗ္ဒိုပ်ဖျေံသ္ဇိုၚ်ကံၚ်ဇြဳပၞာန်မွဲ မၞုံပ္ဍဲပွိုၚ်ဍုၚ်မုၚ် ခရိုၚ်ညံၚ်လေဝ်ပေန် KNU ဂှ်တုဲဂှ် သာတုဲကလိလောန်ကၠုၚ် ပရေၚ်ပန်ပှော်လွဟ်ဇၞော် အပ္ဍဲကဵုကွာန် ဒၞါဲညးဍုၚ်ကွာန်ကောန်အရာပ်တံ မသ္ပဒတဴဒၟံၚ်တံဂှ်ရောၚ်ဂှ် ဂကောံမှာဇန်ကရေၚ်တံ သ္ဂးအိုတ်ရ။

“ပ္ဍဲခရိုၚ်ညံၚ်လေဝ်ပေန်ဟီုတှ်ေ အခိၚ်လၟုဟ် ဗ္ဒိုပ်ဖျေံသ္ဇိုၚ်ကံၚ်ဇြဳပၞာန်တံ ဗွဲမဂၠိုၚ်ဂှ် ဆောံလေၚ်အာယျ။ ဟိုတ်နူပရေၚ်ဗ္တိုက် ဂကောံပံၚ်ကောံ ကေုာံ KNU တံရ။ ဟိုတ်နူဗ္ဒိုပ်ဖျေံသ္ဇိုၚ်တံ ဆောံလေၚ်အာသာ်ဏံဂှ်ရ နကဵုဍေံတံ ကလေၚ်ခၠေဝ်ပၠန်ဒၟံၚ် နကဵုက္ၜၚ်ကျာ၊ လွဟ်ဇၞော်တံဂှ် ဂွံဆဵုကေတ်ရ။ က္ၜၚ်ကျာတံဂှ်လေဝ် ဒၞါဲကွာန်နွံ၊ ဒၞါဲညးဍုၚ်ကွာန်တံနွံဂှ် စွံပွန်ဗ္တိုက်ဒၟံၚ်ဂှ် ပိုယ်တံ ဂွံဆဵုကေတ်ရ။ လွဟ်ဇၞော်လေဝ် သာ်ဏံကီုရ။ ဟိုတ်နူဂြာတ်ဖျေံဒၟံၚ်ဗုမ် အပ္ဍဲကဵုကွာန်တံ ညံၚ်ကဵုအရိုဟ်တ္ၚဲဂှ်ရ ညးဍုၚ်ကွာန်တံ ဇီုကပိုက်ကလိဂွံဝပ်ချိုတ်အာတံ ဂၠိုၚ်အိုတ်ဂှ် ပိုယ်တံဂွံဆဵုကေတ်ရ” သာ်ဝွံ ညးမၞုံအခေါၚ်ဟီုဂး ဇာဇၞိက်အထံက်အရီုပရေၚ်ၜိုဟ်လလမ်ကရေၚ် KPSN သဝ်လေဝ်ကပဝ် ဟီုရ။

ဒပ်ကံၚ်ဇြဳပၞာန် ဒးဒုၚ်သီဒၟံၚ်ဗ္ဒိုပ်တံတုဲ ဇီုကပိုက်ချိုတ် ကလိဂွံဝပ်တံ ဂၠိုၚ်ဒၟံၚ်ဂှ်ဝွံ စွံပွန်လ္တူညးဍုၚ်ကွာန်ကောန်အရာပ်တံတုဲ ပန်ပှော်လွဟ်ဇၞော် အပ္ဍဲကွာန်တံကဵု အပ္ဍဲကဵုဝၚ်ကမၠောန်ဝါဗ္ၚတံဂှ်ကီု၊ ဗ္တိုက်ဂြာတ်မခတိုဟ် နကဵုက္ၜၚ်ကျာကီု၊ ဗ္တိုက်ပန်ဖျေံ ကဵုဒရုၚ်ကီုတံဂှ် လၟေၚ်ဒဒှ်တ္ၚဲ ကၠောန်ၜိုတ်ဒၟံၚ်တုဲ ဆက်ဝးပ္ကဝ်ကလိလောန်ဒၟံၚ် အခေါၚ်အရာမၞိဟ်တံရ။

သ္အာၚ်နူဂှ်ပၠန် တုဲကၠုၚ်ပ္ဍဲဂိတုသေပ်တေမ်ဗာ (၅) အခိၚ်နူဂယး ၜိုတ် ၉ နာဍဳဂှ် ဒပ်ကံၚ်ဇြဳပၞာန် ဟိုတ်နူဗ္တိုက်ဂြာတ်လဝ်မခတိုဟ် နကဵုက္ၜၚ်ကျာ ပ္ဍဲကဵုကွာန်လဝ်မူတဝ် ပွိုၚ်ဍုၚ်ကျံက်ကျဳ KNU ဂှ်ကဵု ဗ္ဒါဲဘာလကျာ် (ဘုရားလေးကုန်း) တံဂှ်တုဲ ဘာလကျာ်မွဲမကဵု သ္ၚိဒၟံၚ်မွဲမ ဇီုကပိုက်လီုလာ်အာလဝ်တုဲ ညးဍုၚ်ကွာန်ဒေသ ဗ္ဒါဲ ၇၀၀ ပြၚ် ဒးဂြိပ်ဒဴပါဲဒလေတ်လဝ်ရောၚ် KNU ဗဟဵု လလောၚ်ပ္တိတ်လဝ်ပရိုၚ်ရ။

ဟိုတ်နူပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ဒေသ နူအပ္ဍဲခရိုၚ်ညံၚ်လေဝ်ပေန် KNU တံ ၜါကိုဋ်ပြၚ် ဒးဂြိပ်ဒဴပါဲဒလေတ်လဝ်တုဲ အရီုဗၚ်ပရေၚ်ဗ္စာရဏာမၞိဟ် သွက်ညးဍုၚ်ကွာန်ပါဲဒဴဘဲပၞာန်တံဂှ်လေဝ် နွံပၟိက်ဒၟံၚ်ဖိုဟ်ရောၚ်ဂှ် ဂွံတီကေတ် အတိုၚ်တၚ်လလောၚ်တြး ဇာဇၞိက်အထံက်အရီုပရေၚ်ၜိုဟ်လလမ်ကရေၚ် KPSN ရ။

ပရိုၚ်−သြၚ်လောန်တိုၚ်(မ်)

ဗီု−KNU