မတ်မလီု၊ သေပ်တေမ်ဗာ (၉)
ရုၚ်ဗော်သွးကောန်ဂကူပအိုဝ် (PNO)မၞုံကွာန်နံၚ်ကုလာ ပွိုၚ်ဍုၚ်သဓီု စဳဇန်လဝ် သွက်ဂွံကၠောန်ဗဒှ်ပေါဲဆဵုဂဗ ဂကောသ္ကိုပ်ဝန်ဇၞော် တွဵုရးဍုၚ်မန် ဥူအောၚ်ကျဳတုၚ် ကံၚ်ဇြဳပၞာန်ခါန်ကၞက်လဝ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၈)အခိၚ်နူဂယး ၜိုတ် (၅)နာဍဳ ဒးဒုၚ်ဖံက်ခတိုဟ်လဝ်မာၚ်ရဂှ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြန်လောန်တိုၚ်(မ်)ရ။
ပ္ဍဲကဵုရုၚ်ဗော်သွးကောန်ဂကူပအိုဝ် (PNO) စဳဇန်လဝ် သွက်ဂွံကၠောန်ဗဒှ်ပေါဲဆဵုဂဗဂှ် ဃောကောန်ဒပ်ကံၚ်ဇြဳပၞာန်တအ် ကေတ်ဒၟံၚ်ဂီုကၠီု ဒပ်စဵုဒၞာဲညးဍုၚ်ကွာန်ပွိုၚ်ဍုၚ်သဓီုတအ် ဖံက်ခတိုဟ်လဝ်မာၚ်ရ။
ပ္ဍဲပရေၚ်ဖံက်ခတိုဟ်ဏံ ကောန်ဒပ်ကံၚ်ဇြဳပၞာန် ဇီုကပိုက်ဒးလဝ်လဝ်ဘဲဝပ် (၅)တၠရဂှ် ၜိုန်ရလ္ပာ် PDF တအ် ဟီုလဝ်ကီုလေဝ် အကာဲအရာဇီုကပိုက်ဒးလဝ်ဂှ် နကဵုသြန်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ဏီရ။
ညးတာလျိုၚ် PDF ခရိုၚ်သဓီုဂှ်မ္ဂး ယဝ်ရဖံက်ခတိုဟ် အခိၚ်ကောံဓရီုဒၟံၚ်မ္ဂး ဟိုတ်နူဂွိၚ်ဖေက်ညးဒေသတအ် ဇီုကပိုက်ဒးတုဲ နဒဒှ်ကဵုသတိ ဖံက်ခတိုဟ်လဝ် အခိၚ်နူဂယးပြဟ်ရဂှ် ဟီုလဝ်ရ။
အတိုၚ်လဟီုညးဒေသတအ်မ္ဂး အခိၚ်နူဂယးပြဟ်ဂှ် ၜိုန်ရမိၚ်လဝ်ရမျှာၚ်ဖံက်ခတိုဟ် ဗ္ဒာဲရုၚ် PNO ကီုလေဝ် အကာဲအရာပရေၚ်ဇီုကပိုက်ဒးလဝ် ဟွံတီကေတ်ရဂှ် ဟီုလဝ်ရ။
ဟိုတ်နူပရောဒဒှ်ဏံတုဲ ဂကောံသ္ကိုပ်ဝန်ဇၞော်တွဵုရးဍုၚ်မန် ဥူအောၚ်ကျဳတုၚ် ကံၚ်ဇြဳပၞာန်ခါန်ကၞက်လဝ်တအ်ဂှ် စၞးရုၚ် PNO ဂှ် ကၠောန်ဗဒှ်လဝ် ပေါဲဆဵုဂဗ ပ္ဍဲရုၚ်အုပ်ဓုပ်ကွာန်နံၚ်ကုလာတုဲ အခိၚ်ဒေါဝ်တ္ၚဲ ၜိုတ် (၁၂)နာဍဳ က္လေၚ်တိတ်အာလဝ်ရဂှ် ဂွံတီကေတ် နူညးဒေသတအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – MOI/Social Media
sanlontai