ကၠောန်ဗဒှ်အခန်ကၞာပ္တိုန်ဂုဏ်စရာဲ PDF ကောန်ညးဍုၚ်ကွာန်ခိုဟ် (ပြည်သူ့သားကောင်း)

မတ်မလီု -သေပ်တေမ်ဗာ(၁၉)

ကၠောန်ဗဒှ်လဝ်အခန်ကၞာ ပ္တိုန်ဂုဏ်စရာဲကောန်ညးဍုၚ်ကွာန်ခိုဟ်(ပြည်သူ့သားကောင်း) ယိုက်ဂၠေၚ်ဒၟံၚ်တာလျိုၚ် ပ္ဍဲဒပ်ပၞာန်စဵုဒၞာညးဍုၚ်ကွာန် (PDF) ဌာနဝန်ဇၞော်ပရေၚ်စဵုဒၞာ အလဵုအသဳပရေၚ်ညဳသၟဟ်ကောန်ဂကူ ပေၚ် (၂)သၞာံရဂှ် MOD လလောၚ်တြးပ္တိတ်လဝ်ပရိုၚ်ရ။

တ္ၚဲဏံ ပ္ဍဲဂိတုသေပ်တေမ်ဗာ စၟတ်တ္ၚဲ (၈)အခိၚ်နူဂယးဂှ် ကၠောန်ဗဒှ်လဝ် အခန်ကၞာပ္တိုန်ဂုဏ်စရာဲ နူစၚ်ပလေတ်ဖောၚ် အောန်လာၚ်ရ။

ပ္ဍဲကဵုအခန်ကၞာဂှ် သ္ပရှ်ေသှ်ေလဝ် အလာံဒပ်ပၞာန်စဵုဒၞာညးဍုၚ်ကွာန် ကေုာံခမဳခရှ်၊ မိမညးဍုၚ်ကွာန်၊ ကွးဘာကီု သီုသ္ဂံၚ်အာဇာနဲပြဟ်လလုဲလဝ် ပ္ဍဲပၠန်ဂတးခေတ်အဆက်က်ကီု၊ ဝန်ဇၞော်ပရေၚ်စဵုဒၞာ ဟီုလဝ်ဂလာန်ဗ္ကန်ပ္တိုန်ဂုဏ်စရာဲကီု သီုသၟာအနုသုခုမတအ် လဟိၚ်လဝ်စိုတ် နကဵုဒွက်ပ္တိုန်ဂုဏ်စရာဲရဂှ် ဂွံတီကေတ်ရ။

စၞးကောန်ညးဍုၚ်ကွာန်ခိုဟ် ယိုက်ဂၠေၚ်ဒၟံၚ်တာလျိုၚ် ပ္ဍဲဒပ်ပၞာန်စဵုဒၞာညးဍုၚ်ကွာန်တအ်ဂှ် သ္ကိုပ်တံဒပ် သ္ဂံၚ်ဗဝ်သာန်လေန် (တံဒပ်တၟေၚ်ကိုဝ်မာန်ဒိုဝ်) ဟီုလဝ် ဂလာန်တၚ်ဂုဏ်ဗပေၚ်ဇြဟတ်ရဂှ် MOD ကဵုလဝ်သမ္တီရ။

အခိၚ်လၟုဟ်ဏံမ္ဂး ကောန်ညးဍုၚ်ကွာန်ခိုဟ် လုပ်ဇူဗ္ဒာဲကၠုၚ် ဇရေၚ်ဂၠံသြိုဟ်ညးဍုၚ်ကွာန် (၄၅၀)ပြၚ်တအ်ဂှ် ဒုၚ်ဂိုၚ်ကေတ်လဝ် နဒဒှ်သ္ဂံၚ် (PDF)တုဲ ယိုက်ဂၠေၚ်ဒၟံၚ်တာလျိုၚ် ပ္ဍဲရုၚ်ဂအုပ်ပၞာန် ကေုာံတံဒပ် ဒပ်ပၞာန်၊ ကရောၚ်ပၞာန် ကဏ္ဍမဆေၚ်စပ်တအ်ရဂှ် ဂွံတီကေတ်ရ။

အခန်ကၞာပ္တိုန်ဂုဏ်စရာဲ PDF ကောန်ညးဍုၚ်ကွာန်ခိုဟ်ဂှ် ဌာနဝန်ဇၞော်ပရေၚ်စဵုဒၞာ ဝန်ဇၞော်ကၟိန်ဍုၚ် ဥူယျဳမန်၊ ဒုတိယဝန်ဇၞော်ကၟိန်ဍုၚ် နာဲကောရတ်၊ ဝန်အပ္ဍဲ၊ ဒုဝန်အပ္ဍဲတအ်ကီု သီုကဵုညးတာလျိုၚ် သွာၚ်အရာပ်/သွာၚ်ပၞာန်တအ် ကေုာံကောန်ညးဍုၚ်ကွာန်ခိုဟ်တအ် တိုန်စိုပ်လဝ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – MOD