ညးထံက်ဂလာန်ဒပ်ပၞာန်တံ ကဵုရပ်ဒက်တုဲ သမ္ဘာတၠသ္ၚိညးဒေသသဓီု(၂)တၠ ဒးဒုၚ်ရပ်ဒက်

သဓီု၊ သေပ်တေမ်ဗာ(၉)

တွဵုရးဍုၚ်မန်၊ ဍုၚ်သဓီု၊ ညးဒေသသမ္ဘာတၠသ္ၚိ ဒၟံၚ်အရာပ်ဒုၚ်ကုန် (၂)တၠဂှ် ပ္ဍဲချာန်နာထလဳဂရာမ်တံဂှ် ဟိုတ်နူညးထံက်ဂလာန်ဒပ်ပၞာန်တံ ကဵုရပ်ဒက်လဝ်တုဲ ဒပ်ပၞာန်တံ ကၠုၚ်စပ်ရပ်ဒက်ဏာလဝ်ရဂှ် ညးစုက်လုက်ကဵု ဂကောံသ္ၚိကၟိန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

ဒပ်ကံၚ်ဇြဳပၞာန် ကေုာံ ဂကောံဒပ်ဗၠာဲသၟိၚ်တံဂှ် ပ္ဍဲဂိတုသေပ်တေမ်ဗာ စၟတ်တ္ၚဲ(၆)တုဲကၠုၚ်တေံဂှ် လုပ်စိုပ်ရပ်ဒက်ဏာလဝ် ကိုမေန်ဇြေယျာချဵု အာယုက်(၃၁)သၞာံကဵု မဟာန်တိတ်ကျဝ် အာယုက်(၃၄)သၞာံ ဒၟံၚ်အရာပ်ဒုၚ်ကုန်တံ နကဵုဇြဟတ်လၟိဟ်ဗွဲမဂၠိုၚ်ဂၠၚ်ရ။

ပ္ဍဲလၟေၚ်ဒဒှ်ဏံဂှ် လ္တူညးမဒှ်သမ္ဘာ မဟာန်တိတ်ကျဝ် လုပ်ချူcomment သၟဝ်ပသ်(ထ်) မပါန်ဇြေဝ်လိုဝ် ညးမဒှ်ထံက်ပလံၚ် NUGဂှ်တုဲ ညးထံက်ဂလာန်ဒပ်ပၞာန်တံဂှ် တမ်၊ လဒေါဝ်၊ကၞောတ် ဒှ်မံၚ်ဍာဲဂြၚ်ၚ်ရသ္ဂးတုဲ ဆဝ်မ္ၚုဟ်လဝ်သွက်ဂွံရပ်ဒက်ဂှ်ရ ဒပ်ကံၚ်ဇြဳပၞာန်ဂှ် ကၠုၚ်စိုပ်ရပ်ဒက်ဏာလဝ်ရ။

ညးဒေသသမ္ဘာတၠသ္ၚိ ရပ်ဒက်ဏာလဝ်(၂)တၠတံဂှ် ပလံၚ်ဏာလဝ် ဒၞါဲစၟဳတ်တံတုဲ စဵုကဵုဂိတု သေပ်တေမ်ဗာ စၟတ်တ္ၚဲ (၈)ဂှ် ဟွံဂွံအဆက် ကုကောန်ဂကောံသ္ၚိကၟိန်တံဏီပုဟ်ဂှ် သ္ဂးရ။

သမ္ဘာတၠသ္ၚိ ဒးဒုၚ်ရပ်ဒက်ဏာ(၂)တၠတံဂှ် ဒှ်ညးပံက်လဝ်ဆေၚ် “လေန်လက် ဆေၚ်သွံကောန်ရုပ်ကေုာံ ကပေါတ်ချူချာဲလိက်နာနာ” ပ္ဍဲဖျာၝောံဍုၚ်သဓီုရဂှ် ဂွံတီကေတ်ရ။

ပ္ဍဲထလဳဂရာမ်ချာန်နာ ထံက်ဂလာန်ဒပ်ပၞာန်တံဂှ် သမ္ဘာတၠသ္ၚိ ဒးဒုၚ်ရပ်ဒက်လဝ် (၂)တၠတံဂှ် မၚ်ရံၚ်ကျောဝ်မံၚ် ဒပ်ပၞာန်၊ ဗၠာဲသၟိၚ်တံကဵု ဂကောံသ္ၚိကၟိန်ညးယိုက်ဝန်တံတုဲ ကေတ်ပရိုၚ်တုဲ ကဵုမံၚ်ပရိုၚ်ဇရေၚ် PDF တံရဂှ် ပရေၚ်တြးဝါဒတံ နွံမံၚ်ရ။

ပရိုၚ်-သြၚ်လောန်တိုၚ်မ်

ဗီု-CJ