ပ္ဍဲကျာ်ထဝ် လိုန်ဒးမာၚ်တိုပ်တိတုဲ ကောန်အရာပ်မွဲတၠ ကလိဂွံဝပ်သ္ကာတ်မြဟ်

ကျာ်ထဝ်၊ သေပ်တေမ်ဗာ (၉)

ပ္ဍဲတွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ဂကောံကွာန်ငှါတ်ပျဝ်တဝ်၊ ဗ္ဒါဲကွာန်ဆာန်မျေအ်ဂှ် မၞိဟ်တြုံမွဲတၠ လိုန်ဒးမာၚ်တိုပ်တိဂှ်ရ ကလိဂွံဝပ်သ္ကာတ်မြဟ်ဂှ် ပ္ဍဲဂိတုသေပ်တေမ်ဗာ (၇) တေံ ခရိုၚ်သဓီု KNU လလောၚ်ပ္တိတ်လဝ်ရ။

ဥူအံၚ်ထာန် အာယုက် ၄၃ သၞာံ ကောန်ကွာန်(ခက်တိုၚ်း) ပွိုၚ်ဍုၚ်ဒိုက်ဥူ၊ ရးဗဂေါဂှ် ဟိုတ်နူအခက်အခုဲပရေၚ်စသုၚ်မံၚ်စံၚ်တုဲ အခိၚ်ကၠုၚ်ကၠောန်ဒၟံၚ်ကလောန် ပ္ဍဲကွာန်ငှါတ်ပျဝ်တဝ် နဒဒှ်ကောန်ကလောန်လိၚ်စဂှ် တုဲကၠုၚ် ပ္ဍဲဂိတုအဝ်ဂါတ် ၂၉ တေံ လိုန်ဒးလဝ်မာၚ်တိုပ်တိရ။

ဟိုတ်နူလိုန်ဒးမာၚ်တိုပ်တိဂှ်ရ ဥူအံၚ်ထာန်ဝွံ ဇိုၚ်သီုၜါလ္ပာ် ဇီုကပိုက်ဒးတုဲ ကလိဂွံဝပ်သ္ကာတ်မြဟ်ဂှ်ရ ဒးပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန်ခရိုၚ်သဓီု ကာမံက်တိုန်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ဥူအံၚ်ထာန်ဝွံ လိုန်ဒးမာၚ်တိုပ်တိ နူကဵုဗ္ဒိုပ်ဒပ် ခလရ(၈) သၟဝ်တဲၝောံဒပ်ကံၚ်ဇြဳပၞာန် (၄၄) တံ မပစူလဝ်ဂှ်ရောၚ် ခရိုၚ်သဓီု KNU ဟီုဂးလဝ်ရ။

တုဲကၠုၚ် ပ္ဍဲဂိတုဂျူလာၚ် ၁၃ တေံဂှ်လေဝ် ပ္ဍဲပွိုၚ်ဍုၚ်ကျာ်ထဝ် ဍုၚ်ဒုၚ်ဇြယိတ် ဗ္ဒါဲကွာန်ဝါဒါတ်ကွေန်ဂှ် ကောန်ၚာ်အာယုက် ၁၃ သၞာံမွဲတၠ လိုန်ဒးမာၚ်တိုပ်တိတုဲ ဒးချိုတ်အာလဝ် ပ္ဍဲဒၞါဲဒှ်ပရူဂှ်လွာဲဂှ်ဂှ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။

ပရိုၚ်−သြၚ်လောန်တိုၚ်(မ်)

ဗီု−KNU