လ္ဂုၚ်၊ သေပ်တေမ်ဗာ (၁၀)
ဂကောံရပ်လွဟ်မွဲဂကောံ ပန်ပှော်လဝ်လွဟ်ဇၞော် အပ္ဍဲကဵုဗွိုၚ်ကၠတ်ထဝ်ရးလ္ဂုၚ် ဒၞါဲဂကောံအလဵုအသဳရးလ္ဂုၚ် မဖျေံလဝ်သ္ဇိုၚ်ဂှ်ရောၚ် ညးမစုက်လုက်ကဵု ဂကောံဒပ်ဗၠာဲသၟိၚ်ရးမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လၟေၚ်ဒဒှ်ဍာံဂှ် ပ္ဍဲဂိတုသေပ်တေမ်ဗာ (၉) အခိၚ်နူဂယး (၄) နာဍဳပြၚ်တေံ ဒးဒုၚ်ပန်ပှော်လဝ်ရောၚ် ဂွံတီကေတ်ရ။
“ဒးဒုၚ်ပန်ဂှ် ဒးဒၟံၚ်ရ။ ချိုတ်အာဂှ် ဟွံမွဲလဝ်ပုဟ်။ အကာဲအရာဇီုကပိုက်ဂှ် နွံလဝ်ညိညရ” သာ်ဝွံ ညးမစုက်လုက်ကဵု ဂကောံဒပ်ဗၠာဲသၟိၚ်ရးလ္ဂုၚ်မွဲတၠ ဟီုရ။
မၞိဟ်ကလိဂွံဝပ်တံ နွံဒၟံၚ်ရောၚ် ဟီုဂးဒၟံၚ်ကီုလေဝ် သွက်ဂွံသှ်ကဵု အကာဲအရာဗွဲလစှ်ေဂှ် ညးကယျာန်ပါဲလဝ်ရ။
ဂကောံဇြဟတ်ပၠန်ဂတးတံဂှ် ရပ်စပ်အာနဲကဲနာနာတုဲ ညံၚ်သွာၚ်အုပ်ဓုပ်၊ သွာၚ်ပၞာန်၊ သွာၚ်ပရေၚ်ပိုန်ဒြပ် ကံၚ်ဇြဳပၞာန် မၞုံအပ္ဍဲရးလ္ဂုၚ်တံ ဂေတ်ဂြိပ်ဟွံဂွံဂှ် ဗ္တိုက်အာရောၚ် သ္ဂးလဝ်ရ။
ကြဴနူအပ္ဍဲဗွိုၚ်ကၠတ်ထဝ်ရး ဒးဒုၚ်ပန်ကဵုလွဟ်ဇၞော်တုဲဂှ် လ္ပာ်ကံၚ်ဇြဳပၞာန် လုပ်စိုပ်စၟဳတ်လဝ်တံ နွံလဝ်ဂှ်လေဝ် ဂွံတီကေတ်ရ။
ဗွိုၚ်ကၠတ်ထဝ် ရုၚ်အလဵုအသဳရးလ္ဂုၚ် မဖျေံလဝ်သ္ဇိုၚ်ဂှ် လောန်ကၠုၚ် သၞာံ ၂၀၂၂ ဂိတုနဝ်ဝေမ်ဗာတေံဂှ်မွဲဝါ၊ သၞာံ ၂၀၂၃ ဂိတုမေဂှ် မွဲဝါ ဒးဒုၚ်ဗ္တိုက်လဝ်တုဲ ဒးဒုၚ်ဗ္တိုက်အလန်ဏံဂှ်ဝွံ ဒှ်အလန်တတိယရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai