ဒဒှ်ရထပ်ဆဵုဂဗလဝ် သၟာပ္ကီုပရာပ်သံသယ ဂြိပ်ဗၠးတိတ်အာလဝ်ဂှ် ဂကောံဒပ်ဗၠာဲသၟိၚ်ဗျိတိၚ် သ္ပဒ္တန်

လာန်ဒါန် – သေပ်တေမ်ဗာ (၁၀)

ဂကောံဒပ်ဗၠာဲသၟိၚ်ရပ်လဝ်တုဲ သၟာပ္ကီုပရာပ်သံသယကောန်သ္ဂံၚ်တြေံ ဂြိပ်ဗၠးတိတ်အာ နူထံၚ်စာတ်မွဲတၠဂှ် ဃောဂၠိုက်ဂၠာဲဒၟံၚ် ပ္ဍဲအလုံဍုၚ်လာန်ဒါန်ဂှ် ထပ်ဆဵုဂဗလဝ် ပ္ဍဲခရိုၚ်ချေတ်ဝှေတ်ရဂှ် ဂကောံဒပ်ဗၠာဲသၟိၚ် ဟီုလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၉)ရ။

ဒါန်နဳရာ အေယ်ဘာတ်ခါလဳဖိ အယုက် (၂၁)သၞာံဂှ် ပ္ဍဲတ္ၚဲ ဗုဒ္ဓဝါတုဲကၠုၚ်တေံ အခိၚ်နူဂယး ဃောကၠောန်ဒၟံၚ်ကမၠောန် ပ္ဍဲထံၚ်စာတ် HMP ဝါမ်ပအ်ထ်ဂှ် ဓလေတ်တိတ်အာ နူကဵုကၟေၚ်ဖဴထံၚ်မွဲကဆံၚ်တုဲ ဍိုက်ပါဗက်လဝ်သၟဝ်ကွဳစက်ထရာပ်ပလံၚ်စၞစဂှ်တုဲ ဗၠးတိတ်လဝ်ရ။

“ဗၠာဲသၟိၚ် ပါလုပ်ဒၟံၚ် ပ္ဍဲပရေၚ်ဂၠိုက်ဂၠာဲ ဒါန်နဳခါလဳဖ်တအ်ဂှ် နူဂယးဏံ ဒဒှ်ရပ္တိတ်ဒၟံၚ်ဇြဟတ် ကၠေံစိုတ်ဂၠာဲဒၟံၚ် ပ္ဍဲဨရိယာချေတ်ဝှေတ်ကဵု ပ္ဍဲမွဲဗွိုၚ်ဂှ် သ္ပလဝ်ဒ္တန်မာန်လဝ်ရ”ဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဂကောံဒပ်ဗၠာဲသၟိၚ်မေက်ထရိုဝ်ပိုဝ်လဳတာန်ရ။

သ္အာၚ်နူဂှ်ပၠန် “အကာဲအရာဏံဂှ် နူကဵုပရေၚ်ချဳဒရာၚ်က္ဍိုက်က္ဍိုပ် ပရေၚ်ထံၚ်ပရိုၚ် ကေုာံ ဂကောံညးဍုၚ်ကွာန်တအ် ပါလုပ်သီုပရေၚ်ကော်လဝ်ဖုၚ်ဗွဲမဂၠိုၚ် ပ္ဍဲကဵုဒေသဂှ် ပွိုၚ်မွဲဗ္တံ တၚ်ဂွံညာတ်ကေတ် သ္ပလဝ်ဒ္တန်လ္ၚဵု မံက်တိတ်ကၠုၚ်ရ”ဂှ် ဟီုသ္ဂးလဝ်ဏီရ။

ခါလဳဖ်ဂှ် ဗိုက်လ္တက်ကျိုၚ်လဝ် ခပေဲဗေတ်သဗဝ် အရံၚ်လမ္စံက်၊ တဳယှာတ် အရံၚ်လမ္စံက် ကေုာံပံၚ်မဳပ္ဍဲ အရံၚ်လမ္စံက်တုဲ ရပ်လဝ်ထိုၚ်ခွက် မွဲမရဂှ် ဂကောံဒပ်ဗၠာဲသၟိၚ်တအ် ဟီုလဝ်ရ။

ဗျိတိၚ်ဂှ် ကၠာဟွံဂွံစောဲဂဗုတ် နကဵုသၞောဝ်အေက်ဥပဒေ ဝါဒဳပ္ကီုပရာပ် ကေုာံ တၚ်ပၞုက်ဓလုက်ကၟိန်ဍုၚ်ဏီဂှ် ထိၚ်ဒဝ်လဝ် ပ္ဍဲထံၚ်စာတ်ရ။

အမာတ်ဒစဵုဒစးကၠတ်ထဝ်တအ်ဂှ် အာတ်မိက်ဒၟံၚ်သွဟ် ဗီုပြၚ်လဵု ညးဂွံဗၠးတိတ်အာဂှ်ကီု မုဟိုတ်ဟွံဂွံချုက်ဒက်လဝ် ပ္ဍဲထံၚ်ပရေၚ်ဂီုကၠီုသၠုၚ်အိုတ်ကီုရောဂှ်တုဲ ကုညးယိုက်ဝန်ထံၚ်စာတ် ကေုာံလၟေၚ်ကမၠောန်ပရေၚ်ဂီုကၠီုတအ်ဂှ်လေဝ် ပ္တိတ်ဒၟံၚ်တၚ်သၟာန်အိုတ်ရဂှ် ဂွံတီကေတ်ရ။

ပ္ဍဲအရာဗက်ဒၞာဲဇိုၚ်ခါလဳဖ်ဂှ် ပ္ဍဲကဵုသၞေဟ်က္ၜၚ် သီုကဵုသၞေဟ်က္ၜၚ်ကျာတအ်ဂှ် ဟိုတ်နူသၠုၚ်ပ္တိုန်လဝ် ပရေၚ်ဂီုကၠီုတုဲ သ္ပကဵုညးအာတရဴတအ် လဇုဲလဇမာန်ဒၟံၚ်ရဂှ်လေဝ် ဟီုသ္ဂးလဝ်ရ။

Ref,Reuters