လၟိဟ်မၞိဟ်ဗ္ဒါဲၜါပြကောဋိကိုတ် ထောံလသာဌာန်ဒၟံၚ်တုဲ ဒးပါဲဓလေတ်မံၚ်ဘဲပၞာန် နကဵုအကာဲအရာဟွံချိုတ်ပၠိုတ်ဂမၠိုၚ်

သေတ်ကိုၚ်၊ သေပ်တေမ်ဗာ(၁၀)

ကိုပ်ကၠာနူဂွိုအ်သီအဝဵုဏီကဵု ကြဴနူသီအဝဵုတုဲဂှ် အလုံမွဲကၟိန်ဍုၚ် လၟိဟ်မၞိဟ် ၁ ဒဿမ ၉ ပြကောဋိကိုတ်ပြၚ်တံ နကဵုအကာဲအရာဟွံချိုတ်ပၠိတ်ဏီတံဂှ် ထောံလသာဌာန်ဒၟံၚ်တုဲ ဒးပါဲဓလေတ်မံၚ်ဘဲပၞာန်ရဂှ် ရုၚ်သ္ကိုပ်ပရေၚ်ပညဳပညပ်ပံၚ်ဗ္စပ် ဆေၚ်စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA ဂှ် လလောၚ်ပ္တိတ်လဝ် ပ္ဍဲဂိတုသေပ်တေမ်ဗာ စၟတ်တ္ၚဲ(၈)ဂှ်ရ။

အတိုၚ်တၚ်လလောၚ်တြး UNOCHAဂှ်မ္ဂး ဟိုတ်နူဘဲအန္တရာယ်သဘာဝကေုာံ ပဋိပက္ခက္တဵုဒှ်မံၚ်ဖိုဟ်တံဂှ်တုဲ ညးဒးထောံလသာသ္ၚိဌာန်ဒးဂြိပ်ဒဴမံၚ်တံ၊ ပရေၚ်ကောန်အရာပ်ချိုတ်တံကဵု ပရေၚ်ကပေါတ်ကောန်အရာပ်ပိုၚ်တံလီုလာ်ဆောံလေၚ်တံ က္တဵုဒှ်မံၚ်အဆက်က်တုဲ သ္ကဵုအကာဲအရာပရေၚ်ဗ္စာရဏာမၞိဟ်ကၟိန်ဍုၚ်တံ သာတုဲပရေံကၠုၚ်ရဂှ် သ္ဂးရ။

နူစဒပ်ပၞာန်သီအဝဵု သၞာံ ၂၀၂၁၊ ဂိတုဖေဖဝ်ဝါရဳဂှ်တုဲ ဟိုတ်နူပေါဲဗတိုက်တံကဵု ပရေၚ်ဟွံဂီုကၠီုတံတုဲ လၟိဟ်မၞိဟ် ၁ ဒဿမ ၆ ပြကောဋိကိုတ်တံ ထောံလသာသ္ၚိဌာန် ဒးဂြိပ်ဒဴလဝ်တုဲ စမြိုၚ်သ္ၚိဒၟံၚ်ညးအရာပ်ပိုၚ်တံ ဗ္ဒါဲ ၇၅၀၀၀ ပၟတ်တူဒးလီုလာ်လဝ်ဂှ် UNOCHA ချိၚ်ခယျလဝ်ရ။

သ္အာၚ်နူဂှ်ပၠန် ပ္ဍဲဍုၚ်ဗၟာသ္ကုတ်ဗၟံက်ကေုာံ တွဵုရးကချေၚ်တံဂှ်လေဝ် ဟိုတ်နူတၚ်သၞောတ်ဗ္ၜတ် အခေါၚ်ရီုဗၚ်ဆေၚ်စပ်ကဵုပရေၚ်ဗ္စာရဏာမၞိဟ်တံ သၠုၚ်တိုန်ကၠုၚ်တုဲ သွက်ဂွံကဵုအရီုဗၚ် ဗွဲမစိုပ်တရဴဂှ် သ္ကဵုဒှ်ကၠေံပလာပ်ပထုဲရဂှ် သ္ဂးလဝ်ရ။

ညးကဵုမံၚ်အရီုဗၚ်ဗလးတိ ကုညးပါဲဒဴဘဲပၞာန် နူရးသေတ်ကိုၚ်ကေုာံ ရးမဂွဵု၊ သ္ကုတ်လ္ဒေါဝ်ကၟိန်ဍုၚ် ပရေၚ်ပၞာန်ကြံၚ်မ္ၚိုဟ်မံၚ်တံ မွဲတၠဂှ်တှ်ေ ဟွံဂွံအရီုဗၚ်နူဂကောံဍုၚ်သ္အာၚ်တံ ရုမ်မ်ဂပ်ပ်မွဲသာ် နကဵုဇြဟတ်ညးဍုၚ်ကွာန်တံကဵု ညးဍုၚ်ကွာန်တံရ ဒးကၠောန်သ္ပမံၚ်ရဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

“အရီုဗၚ် ပရေၚ်ဗ္စာရဏာမၞိဟ်ဂှ်လေဝ် ၜိုန်ရဂွံဒဝ်ဠာအမေရိကာန် မူစိကိုဋ်၊ မူစိပြကောဋိကိုတ်ကီုလေဝ် ရမျာၚ်ရတိတ်မံၚ်၊ ပ္ဍဲဗလးတိဏံဂှ် ဂွံၜိုတ်စရိတ်ကမၠောန်ပိုဲဟွံဒှ်ပုဟ်။ ညးတံကၠောန်ကဵုတံ၊ ပရေၚ်ရီုဗၚ်ဟံၚ်ပြာ်တံဂှ် အောန်မံၚ်ကွေံကွေံဏီရ။ သွက်ညးပါဲဒဴဘဲပၞာန်တံဂှ် မုမှကၠောန်ကဵု စဵုကဵုပမာဏရုမ်မ်ဂပ်ပ် ဟွံမွဲဏီပုဟ်ဂှ် ပိုဲတံဒးသ္ပတၚ်စၟတ်ရ။ မုဟိုတ်ရောတှ်ေ နအလဵုပိုဲကၠောန်မံၚ်နတဲဂှ်ရ ဒးအာမံၚ်ကဵုဇြဟတ်ညးဍုၚ်ကွာန်တံရ။ ပြဟ်ဟ်ဏံဂှ်တှ်ေ နူကဵုဂကောံတံဂှ် ဂၠာဲကဵုကိုဋ်ကဵုလ္ၚီတံလေဝ် ပိုဲတံ ဟွံကေၚ်ဂဗပုဟ်။ အကာဲအရာဂှ်တှ်ေ မုဍေံတံကၠောန်မံၚ်ဗီုလဵုဂှ် ဟွံတီရ။ ဟွံစိုပ်ကၠုၚ်သၟဝ်ပိုဲဂှ် ချိုတ်ပၠိုတ်ရ” သာ်ဝွံ ညးသ္ဂးရ။

UNOCHA ဂှ်တှ်ေ ဖအောန်ဖျေံကဵုတၚ်သၞောတ်ဗ္ၜတ် ပရေၚ်လုပ်စိုပ်ကဵုအရီုဗၚ်တံဗက် ပရေၚ်သ္ဂောံဂွံသြန်ဂအုံဂှ် သွက်ဂကောံ ဆေၚ်စပ်ကဵုပရေၚ်ဗ္စာရဏာမၞိဟ် ရီုဗၚ်ကဵုတၚ်နွံပၟိက်ကာမံက်တိုန်တံဂှ် ဟွံမွဲဟွံဂွံ နွံပၟိက်မံၚ်တုဲ နကဵုသြန်ဂအုံဂှ်တှ်ေ ပ္ဍဲကဵုတၚ်နွံပၟိက်သီုဖအိုတ်ဂှ် ဂွံလဝ် ၂၅ တၟံကၠံညိကီုဂှ် လလောၚ်ပ္တိတ်လဝ်ရ။

ပ္ဍဲဂိတုအဝ်ဂါတ်မံက်တေံဂှ် ဟိုတ်နူဗြဲမုဟ်သုန် ဂူလဝ်ဗွဲမသ္ကာတ်မြဟ်တုဲ ပ္ဍဲရးရခေၚ်ကဵု သ္ကုတ်နေရတိကၟိန်ဍုၚ်တံဂှ် ဍာ်ဇၞော်က္တဵုဒှ်လဝ်တုဲ အပံၚ်မၞိဟ် ၈၀၀၀၀ ပြၚ် ဒးလဝ်ဘဲဍာ်ဂှ်ရ သာတုဲဂွံကဵုအာအရီုဗၚ်ဂှ် နွံပၟိက်မံၚ်ဖိုဟ်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး UNOCHA ရ။

ပရိုၚ်-သြၚ်လောန်တိုၚ်မ်

ဗီု-UNOCHA