ဒေသသ္ကုတ်သၠုၚ်ကျာကၟိန်ဍုၚ်ဂှ် ပရေၚ်ပၞာန်သာသ္ကာတ်မြဟ်ကၠုၚ်မာန်

ထဝါဲ၊ သေပ်တေမ်ဗာ (၁၀)

ပ္ဍဲရာသဳဗြဲကျာတၟး ခြာဟွံလအ်ဏံ အပ္ဍဲဒေသသ္ကုတ်သၠုၚ်ကျာကၟိန်ဍုၚ်တံ ပရေၚ်ပြုပြေၚ်ပၞာန် သွက်ဂွံထပိုတ်ရိုဟ်ကၞက် ဗ္တိုက်ဖလှေက် သၞောတ်တၠအဝဵုပၞာန်တံ သာတုဲသ္ကာတ်မြဟ်ကၠုၚ်မာန်ရောၚ် ဂကောံဒပ်ပၠန်ဂတးရပ်လွဟ်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သ္ကုတ်သၠုၚ်ကျာကၟိန်ဍုၚ် တွဵုရးမန်၊ တွဵုရးကရေၚ် ကေုာံ ရးတၞၚ်သဳတံဝွံ အပ္ဍဲကာလဒပ်ပၞာန်သီအဝဵုတုဲ ဂွံၜါသၞာံဘာ်ပြၚ်ဂှ် ဒှ်တိဍာ် ပေါဲဗ္တိုက် အကြာဒပ်ကံၚ်ဇြဳပၞာန်ကဵု ဂကောံဒပ်ပၠန်ဂတးရပ်လွဟ်အပ္ဍဲဒေသတံ လေပ်က္တဵုဒှ်ဒၟံၚ် မွဲဏှမွဲဏှတံရ။ 

နကဵုဒပ်ပၞာန် သၟဝ်ပၠတရဴ က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် ဇြဟတ်မဍိုန်စှ်ေကၠုၚ်ဒၟံၚ်သိုက်က် ပ္ဍဲပရေၚ်ပၞာန်၊ ပရေၚ်ဍုၚ်ကွာန်၊ ပရေၚ်ကလုတ်တမာန်တံဂှ် ညံၚ်ဂွံကၠောန်ဗဒှ်ပေါဲရုဲမာဲမာန် မဒှ်တၚ်ရန်တၟံသၠုၚ်အိုတ်ဂှ်တုဲ သွက်ဂွံထိၚ်ဒက်အလုံကၟိန်ဍုၚ်မွဲ ညံၚ်ဂွံညိၚ်ဝတ်ဂှ် ဒးရုန်ဂ္စါန်ဒၟံၚ် နကဵုဇြဟတ်ပၞာန်ရ။

ပ္ဍဲကဵုအကာဲအရာသာ်ဏံဂှ် ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန်ခရိုၚ်သဓီု (PDF) ကိုဝ်အေမေန်ထောန်ဂှ် စိုပ်ကၠုၚ်ရာသဳဗြဲကျာတၟးဗက် ပရေၚ်ပၞာန်တံ သာသ္ကာတ်မြဟ်ကၠုၚ်မာန်ဂှ်ရ ညးဍုၚ်ကွာန်တံ မံၚ်စံၚ်ကဵု သတိဝိရိယတံအိုတ်ညိဂှ် ဖ္တိုက်ဖ္အောဝ်လဝ်ရ။

“လ္ပာ်ခရိုၚ်သဓီုပိုယ်တံ လ္ပာ်ဏံဂှ် စိုပ်ရာသဳဗြဲကျာတၟးဗက် ပရေၚ်ပၞာန်တံ ဂွံသ္ကာတ်မြဟ်ကၠုၚ်ရနွံ။ ဂွံသ္ကာတ်မြဟ်နူဏံရ နွံ။ မိက်ဂွံအာတ်ဒုၚ်ဂုဏ်ညးဍုၚ်ကွာန်တံဗွဲတၟေၚ်ဂှ်တှ်ေ ညံၚ်ဂွံမံၚ်သ္ၚောဲသ္ၚောဲကဵု ကောန်ဒပ်ကံၚ်ဇြဳပၞာန်တံ၊ ညံၚ်ဂွံမံၚ် သ္ၚောဲသ္ၚောဲကဵု ကွဳစက်ကံၚ်ဇြဳပၞာန်တံကဵု ယာန်တၞဟ်ဟ်တံ ညံၚ်ဂွိုအ်မံၚ်ဒး ကြပ်ဍေံတံဂှ် ပိုယ်တံ မိက်ဂွံဗ္ကန်ရ။ တုဲပၠန် ညံၚ်ဂွံမံၚ်ကဵုသတိဝဳရိယတံဂှ်လေဝ် မိက်ဂွံဗ္ကန်ဗွဲတၟေၚ်ရ “ သာ်ဝွံ ညးသ္ဂးရ။

ပ္ဍဲကဵုခရိုၚ်သဓီု၊ တွဵုရးဍုၚ်မန်ဂှ်တှ်ေ ကၞောတ်ဂိတုအဝ်ဂါတ်တေံကဵု အပ္ဍဲဂိတုဏံမံက်တေံ ဂကောံဒပ်ပံၚ်ကောံပၠန်ဂတးတံ ကၠောန်သ္ပဗ္တိုက်လဝ်နကဵုဒရုၚ် ကုရုၚ်အုပ်ဓုပ်ကာနာနာ ကောန်ဒပ်ကံၚ်ဇြဳပၞာန်တံ မဖျေံလဝ်ဒပ်တံဂှ်ကီု၊ ဗ္ဒိုပ်ကၚ်ဗၠာဲသၟိၚ် ကေုာံ ဗ္ဒိုပ်ဗၠာဲသၟိၚ်ၝောံဍုၚ်တံဂှ်တုဲ ပေါဲဗ္တိုက်ဆေၚ်မုက်ၜါလ္ပာ်တံလေဝ် က္တဵုဒှ်ဒၟံၚ် အတေံညိအဏံညိရ။

ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် (MSRF) နာဲနဂါဂှ်လေဝ် အကြာပွိုၚ်ဍုၚ်ရေဝ်ကဵု ပွိုၚ်ဍုၚ်ဇြပ်ဗုဂှ် ကရောၚ်ပၞာန်ကၠဗုကဵု ကရောၚ်ပၞာန်ဒံၚ်ညဵုတံ နွံဒၟံၚ်တုဲ လ္ပာ်ရေဝ်သၠုၚ်ကျာဂှ် ချဳဒရာၚ်ဒၟံၚ် အဖဝ်ကရောၚ်ပၞာန်ဒဝ်ဏတံမွဲစွံဂှ်ရ ပရေၚ်ပၞာန်တံ ခြာဟွံလအ် သာဂၠိုၚ်ကၠုၚ်မာန်ရောၚ် ဟီုရ။

“ကၠုၚ်စိုပ်ရာသဳဗြဲကျာတၟးဏံ ပ္ဍဲကဵုသ္ကုတ်သၠုၚ်ကျာတွဵုရးဍုၚ်မန်ပိုယ်တံဏံ သၠုၚ်ပ္တိုန်ကဆံၚ် ပရေၚ်ပၞာန်တံတုဲ အရာမတောတက်ကၠုၚ်တံ နွံကၠုၚ်ဏောၚ်။ ပေါဲဗ္တိုက်တံ ပရေၚ်ပြုပြေၚ်ပၞာန်တံ သာတုဲချဳဒရာၚ်ကၠုၚ်မာန်ဏောၚ်။ ယိုက်ဏာနၚ် လွဟ်လက်နက်ကိရိယာတံ၊ ဂၠံၚ်တရဴပရေၚ်ပၞာန်တံဂှ်လေဝ် ဒၟါနူပြေပြံၚ်ဒၟံၚ်ဂှ်ရ ထ္မံက်အာရုပ်ရဴမာန်ဏောၚ်။ အခိၚ်ကံၚ်ဇြဳပၞာန်တံ ဇြဟတ်ဍိုန်လျဒၟံၚ်လၟုဟ်ဂှ် ညံၚ်ဂွိုအ်ယာက္ဍိုပ်မာန် ပိုယ်တံ သာတုဲဒးချဳဒရာၚ်ကၠုၚ် ပရေၚ်ပၞာန်ပိုယ်တံဂှ် နွံပၟိက်ရ။ ပံၚ်တောဲရေၚ်တၠုၚ်အာ အကြာဂကောံဇြဟတ်ပၠန်ဂတးတံတုဲ ထ္မံက်အာရုပ်ရဴ ပရေၚ်ပြုပြေၚ်ပၞာန်တံမာန်ဂှ်ရ ပ္ဍဲကဵုသ္ကုတ်သၠုၚ်ကျာတွဵုရးဍုၚ်မန်ဏံ ပေါဲဗ္တိုက်တံ၊ ပရေၚ်ပြုပြေၚ်ပၞာန်တံ ပ္ဍဲရာသဳဗြဲကျာတၟးဇးဏံ သာတုဲဒှ်ကၠုၚ်မာန်ဏောၚ် “ သာ်ဝွံ ညးသ္ဂးရ။

ပွိုၚ်ဍုၚ်ရေဝ်ဝွံ ဒှ်ဒေသအပ္ဍဲတွဵုရးဍုၚ်မန်မွဲ မဒးဒုၚ်စၟတ်သမ္တီ လလောၚ်တြးလဝ် လ္ပာ်ကံၚ်ဇြဳပၞာန်သီအဝဵုတံ သွက်ဂွံရပ်စပ်အာပရေၚ်အုပ်ဓုပ်ပၞာန်မွဲတုဲ သီုကဵုဒှ်တိဍာ် ပရေၚ်ချဳဒရာၚ် ဂကောံဒပ်ရပ်လွဟ်ကောန်ဍုၚ်အရၚ်တံကဵု ဂကောံဒပ်ပၠန်ဂတးတံ ဇြဟတ်ခိုဟ်မွဲရောၚ် မဒှ်ရ။

အခိၚ်လၟုဟ်ဂှ်လေဝ် လ္ပာ်ကံၚ်ဇြဳပၞာန်တံ အကာဲအရာကၠောန်ၜိုတ် ပရေၚ်ချဳဒရာၚ်ၚးတးတိဍာ် အပ္ဍဲပွိုၚ်ဍုၚ်ရေဝ်တံမာန်ဂှ် ဟွံမွဲတုဲ ဗ္ဒိုပ်ဒပ်ဍေံတံကဵု ပရေၚ်စဵုဒၞါ၊ ပရေၚ်အုပ်ဓုပ် အပ္ဍဲဍုၚ်တံသၟးရ နွံဂှ် နာဲနဂါ ဟီုလဴထ္ၜးလဝ်ရ။

ပ္ဍဲတွဵုရးကရေၚ်ဂှ်လေဝ် ပြဟ်ဟ်ဏံ လၟေၚ်ဒဒှ်ရုၚ်ဌာနက္ဍိုက်ပ် ပရေၚ်အုပ်ဓုပ်ကာနာနာ မၞုံအပ္ဍဲဒေသလ္တူဍုၚ်လ္ၚဵုတံ ပါလုပ်သီုကဵုဍုၚ်ဗြဝတဳ ပယျဵုသေံ−ဗၟာ ဒးဒုၚ်ဗ္တိုက်နကဵုဒရုၚ်ဂှ် က္တဵုဒှ်ဒၟံၚ်အဆက်က်တုဲ လ္ပာ်ကံၚ်ဇြဳပၞာန်ဂှ် ပါလုပ်သီုကဵုသ္ကိုပ်တမ်ဒပ်တံဂှ် ညးယိုက်ဝန်လ္ၚဵုတံလေဝ် ချိုတ်အာလဝ်တံ နွံဒၟံၚ်ရ။

ကေၚ်ကာဗဟဵု ဗော်သွးကောန်ဂကူကရေၚ် KNU ပဒိုဝ်သဝ်တဝ်နဳဂှ် ပရေၚ်သီအဝဵု စိုပ်ကၠုၚ်ပ္ဍဲပိသၞာံယျဂှ်တုဲ လ္ပာ်ဂကောံဇြဟတ်ပၠန်ဂတးတံဂှ် နဒဒှ်ပၞာန်ဒုၚ်သၟး ကၠောန်မာန်ဟွံသေၚ်တုဲ သွက်သၞောတ်တၠအဝဵုပၞာန် ဂွံသရိုဟ်စှ်ေ ဂှ် သ္ဇက်ဒးကၠောန်နွံတံဂှ် ဆက်ကၠောန်အာဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

 “လၟုဟ်ဂှ်စိုပ်ကၠုၚ် အပ္ဍဲပိသၞာံယျဟီုတှ်ေ ပိုယ်တံပြံၚ်အာဗီုပြၚ်ပၞာန်တဝ်စၞေဟ်ယျလေဝ်။ လ္ပာ်တၠအဝဵုပၞာန်ဂှ် ဒးဟီုတပ်ပ်မ္ဂး ဍေံတံစိုပ်အာ အကာဲအရာပၞာန်ဒုၚ်ယျဟီုဂှ် ချိုတ်ပၠိုတ်ယျ။ ဇၟာပ်ပ်ဒၞါဲဂှ် ဒးကလေၚ်ကၠောန်ဒၟံၚ် ဂဒုက်ဒုၚ်တံရ။ ဒှ်အာ စဵုကဵုဍုၚ်ဇၞော်ကွာန်လှဲတံယျ။ တုဲပၠန် ဂၠံၚ်ဍေံတံဖံက်လဝ်ကၠာတေံ ဗွဲမဂၠိုၚ်ဂှ်တှ်ေ ကလေၚ်ပလီုထောံဖအိုတ်ရ။ ညအ်ဂှ်တှ်ေ နူကဵုလ္ပာ်ပိုယ်တံ အာဗ္တိုက်ဍေံတံဂှ် ဍေံဖေက်ဒၟံၚ်ကွေံကွေံဏောၚ်။ ဟိုတ်ဂှ်ရ အခိၚ်လဵုဗ္တိုက်ဏောၚ်ဟီုဂှ် ပိုယ်တံ ဟွံဒးဟီုပုဟ်။ သွက်ဂွံဆက်အာ နကဵုဇြဟတ်ညးဍုၚ်ကွာန်တံ သိုက်က်ရနွံ။ မုအစဳဇန်သာ်လဵုနွံရောဟီုဂှ်လေဝ် ဟွံဒးဟီုပုဟ်။ ဆ္ဂး ချိုတ်ပၠိုတ်မွဲဂှ် မွဲအာယုက်ဂှ် ပိုယ်တံ ပၞာန်ဒုၚ်သၟးဂှ် ကၠောန်ဟွံမာန်ပုဟ်။ ညံၚ်တၠအဝဵုပၞာန်ဏံ ဂွံသရိုဟ်အာဂှ် သ္ဇက်ဒးကၠောန်နွံတံဂှ် ဆက်ကၠောန်အာဏောၚ်“ သာ်ဝွံ ညးသ္ဂးရ။

မွဲလ္ပာ်တေံပၠန် အပ္ဍဲကဵုသ္ကုတ်သၠုၚ်ကျာကၟိန်ဍုၚ်တံဂှ် လ္ပာ်ကံၚ်ဇြဳပၞာန် ပွမကၠောန်သ္ပဗပေၚ်ဇြဟတ်ဒပ်၊ အာကၠုၚ်တရဴ၊ ပလံၚ်ဗစိုပ်ဇွောံမစၞစ ပါလုပ်သီုကဵု ကပေါတ်လွဟ်လက်နက်တံ နူကဵုဂၠံၚ်ကုန်တံဂှ် ဟွံသ္ပရတုဲ ရပ်စပ်စကာကၠုၚ် နူကဵုတရဴဍာ်တံ ဂၠိုၚ်ကၠုၚ်ဂှ် ဂကောံပၠန်ဂတးအပ္ဍဲဒေသတံ သ္ဂးအိုတ်ရ။

မွဲဒမြိပ်ဂၠံၚ်ဇၞော်ဗျဳထံၚ်သု စၟတ် (၈) လ္တူဂၠံၚ်ကာ မတ်မလီု−ရေဝ်−ထဝါဲ−ဗိက်တံဂှ် ဂကောံဒပ်ပံၚ်ကောံပၠန်ဂတးဂမၠိုၚ် ပါလုပ်သီုကဵုဗော်သွးကောန်ဂကူကရေၚ် KNU တံဂှ် ပပ္တံနူဂိတုဂျောန်သတ္တာဟတတိယတေံတုဲ ပရေၚ်ထိၚ်ဒက်စၟဳတ်တံဂှ် ကၠောန်ကၠုၚ်ဒၟံၚ်အဆက်က်ရ။

သ္ကုတ်သၠုၚ်ကျာကၟိန်ဍုၚ် ​ဒေသတၞုၚ်တၞောတ်အိုတ် ပ္ဍဲရးတၞၚ်သဳ ပွိုၚ်ဍုၚ်ထဝါဲ၊ ပဠဝ်၊ တၞၚ်သဳ ကေုာံ ပွိုၚ်ဍုၚ်ဗိက်တံဂှ်လေဝ် အကြာဒပ်ကံၚ်ဇြဳပၞာန်ကဵု ဂကောံဒပ်ရပ်လွဟ်စဵုဒၞါဒေသတံဂှ် ပရေၚ်ကြတ်ဗ္တိုက်တံကဵု ပေါဲဗ္တိုတ်တံ က္တဵုဒှ်ဒၟံၚ် မွဲဏှမွဲဏှရ။

ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် ရးတၞၚ်သဳဂှ် ကၠုၚ်စိုပ်ပ္ဍဲရာသဳဗြဲကျာတၟးဏံ ရးတၞၚ်သဳမွဲဓဝ်ဟွံသေၚ် ပ္ဍဲကဵုရးဒေသ ကေုာံ တွဵုရးနာနာတံဂှ်လေဝ် ပရေၚ်ပၞာန်ဂွံကြံၚ်မ္ၚိုဟ်ကၠုၚ်နွံဒၟံၚ်တုဲ သွက်ဏံဂှ်လေဝ် ပလေဝ်ပလေတ်ဒၟံၚ်တံ နွံဒၟံၚ်ရောၚ် သ္ဂးရ။

“ရာသဳဗြဲကျာတၟးဇးဂှ်တှ်ေ ပ္ဍဲရးတၞၚ်သဳပိုယ်တံမွဲဓဝ်ဟွံသေၚ်ပုဟ်။ ပ္ဍဲကဵုရးဒေသဇၞော် ကေုာံ တွဵုရးနာနာတံလေဝ် ပရေၚ်ပၞာန်ဂွံကြံၚ်မ္ၚိုဟ်ကၠုၚ်ဂှ် နွံရ။ အဓိကဂှ်တှ်ေ လ္တူဂၠံၚ်ဇၞော်ပျဳထံၚ်သုဂှ် ပေါဲဗ္တိုက်တံ သ္ကာတ်မြဟ်ကၠုၚ်မာန်ဏောၚ်။ သွက်ဏံဂှ် ဗွဲမဂၠိုၚ်ဂှ်လေဝ် ပလေဝ်ပလေတ်တုဲ ချဳဒရာၚ်ဒၟံၚ်တံလေဝ် နွံဒၟံၚ်ရ“ သာ်ဝွံ ညးဟီုရ။

လ္ပာ်ကံၚ်ဇြဳပၞာန်ဂှ် အလုံဍုၚ်မွဲ ပံက်လဝ်မုက်ပၞာန် ကုဂကောံဒပ်ပၠန်ဂတးရပ်လွဟ်ဂမၠိုၚ် ပါလုပ်သီုကဵုဂကောံရပ်လွဟ်ကောန်ဍုၚ်အရၚ်လ္ၚဵုတံ လ္ဂောံကဵုပရေၚ်ပၞာန်မ္ဂး နကဵုအရီုဗၚ်လွဟ်ဇၞော်တံ၊ အရီုဗၚ်တရဴကျာတံဂှ်တုဲ ဒးဆေၚ်ဒၟံၚ်မုက်ဖိုဟ်ရ။

အတိုၚ်တၚ်လလောၚ်တြး ဂကောံသုတေသန ISP Myanmar ဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ပေါဲဗ္တိုက်အပံၚ် မွဲဠက်ပြၚ် က္တဵုဒှ်လဝ်ရောၚ် ပ္ဍဲဂိတုအဝ်ဂါတ် (၁၈) တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု− S.O.F