ပေန်လံၚ် – သေပ်တေမ်ဗာ(၁၄)
တွဵုရးသေံသၠုၚ်ကျာ၊ သ္ၚိဒၟံၚ်က္ဍိုပ်သ္ကိုပ်ပွိုၚ်တိုက် သီုသ္ၚိဒၟံၚ်က္ဍိုပ်သ္ကိုပ်တိဍာ် ဂကောံဗော်သွးကောန်ဂကူပအိုဝ် မၞုံပွိုၚ်ဍုၚ်ပေန်လံၚ် တွဵုရးသေံသၠုၚ်ကျာဂှ် PDF လုပ်က္ဍိုက်တ္ၚီုဗတိုက်လဝ်ရဂှ် ဂကောံစဵုဒၞာညးဍုၚ်ကွာန်ဖေဝ်ခုမ် လလောၚ်တြး ပ္တိတ်လဝ်ပရိုၚ်ရ။
ပ္ဍဲဂိတုအဝ်ဂါတ် စၟတ်တ္ၚဲ (၂၀)တုဲကၠုၚ်တေံ လုပ်က္ဍိုက်တ္ၚီုဗတိုက်လဝ် သ္ၚိဒၟံၚ်က္ဍိုပ်သ္ကိုပ်ပွိုၚ်တိုက် ဂကောံဗော်သွးကောန်ဂကူပအိုဝ် PNO ခွောန်မောၚ်ဝေန် ပ္ဍဲကွာန်နဖာမူ ပွိုၚ်ဍုၚ်ပေန်လံၚ်တုဲ ၜိုန်ရသီဂွံလဝ်လွဟ်လက်နက်လ္ၚဵုကီုလေဝ် ဟိုတ်နူခွောန်မောၚ်ဝေန် အာစိုပ်ဒၟံၚ်ကောံဓရီုတုဲ မၞိဟ်ဂှ် ရပ်ကေတ်ဟွံဂွံလဝ်ရဂှ် ဂွံတီကေတ်ရ။
ပ္ဍဲသ္ၚိဒၟံၚ်ခွောန်မောၚ်ဝေန်ဂှ် ပါဲနူသြန်ကံက်ကေတ်လဝ် နူညးဒေသပအိုဝ် သွက်ဂွံရာန်လွဟ်လက်နက် ကိုတ် (၉၀)ပြၚ်တုဲ သီဂွံလဝ် သီုမကမ် (၄၀၀)ပြၚ်ရဂှ် ဓမံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲဂိတုအဝ်ဂါတ် စၟတ်တ္ၚဲ (၂၈)အခိၚ်ဇိုၚ်သဝ်တ္ၚဲဂှ်လေဝ် ဃောထပ်က္ဍိုက်တ္ၚီုဗတိုက်လဝ် သ္ၚိဒၟံၚ်အေဝ်ဝေ က္ဍိုပ်သ္ကိုပ်တိဍာ် PNO ဒၟံၚ်ကွာန်နတုက် ပွိုၚ်ဍုၚ်ပေန်လံၚ်ဂှ် ဟိုတ်နူက္လေၚ်ဒစဵုဒစးပၠန်ဂတးလဝ်ဂှ်ရ ဒှ်လဝ်ပရေၚ်ပန်ပှော်တုဲ ညးနွံယၟုအေဝ်ဝေဂှ် ဒးချိုတ်လဝ်ရဂှ် ဂွံတီကေတ်ရ။
နူကဵုသ္ၚိဒၟံၚ်က္ဍိုပ်သ္ကိုပ်တိဍာ် နွံယၟုအေဝ်ဝေဂှ် သီဂွံလဝ် လွဟ်ဂၠေံ မွဲဒကိုအ်၊ မကမ် 9-MM ညိညကီု သီုကဵုမွဲကရောံဂဥုဲမၜူမာဲ WY ဂှ် သီဂွံလဝ် သီုဗုမ်ကၠဟ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
စပ်ကဵုအကာဲအရာဏံတုဲ ၜိုန်ရဌာန်ပရိုၚ်သြၚ်လောန်တိုၚ်(မ်) ဆက်စၠောံသၟာန်လဝ်ကဵု ဂကောံဗော်သွးကောန်ဂကူပအိုဝ် (PNO)ကေုာံ PDF ဖေဝ်ခုမ် လုပ်က္ဍိုက်တ္ၚီုဗတိုက်လဝ်တအ်ဂှ်ကီုလေဝ် ဆက်စၠောံလဝ် ဟွံဂွံရ။
ဂကောံဗော်သွးကောန်ဂကူပအိုဝ် မဒှ်ဂကောံရပ်လွဟ်ကောန်ဍုၚ်အရၚ်မွဲဂကောံဂှ် ပ္ဍဲသၞာံ ၁၉၉၁ တေံ ထ္ပက်လဝ်စၟတ်တဲဒေါံပန်ပှော်ကဵု အလဵုအသဳပၞာန်တုဲဂှ် ပြံၚ်စၠောံလဝ်ဗီုပြၚ်နဒဒှ်ပၞာန်ညးဍုၚ်ကွာန်တုဲ ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ လကြဴဏံ က္ဍိုပ်သ္ကိုပ်ဂကောံဗော်သွး PNO ဥူအောၚ်ခါမ်ထဳ အာဆဵုဂဗဒၟံၚ်ကဵု က္ဍိုပ်သ္ကိုပ်ပၞာန်ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် မွဲခနမွဲခနရ။
သ္အာၚ်နူဂှ်ပၠန် ပ္ဍဲကဵုပေါဲဗတိုက် ပယျဵုသေံ -ကရေၚ်ဍာဲတအ်ဂှ် ဂကောံဗော်သွးကောန်ဂကူပအိုဝ် (PNO) ဘိုၚ်လုပ်ဗတိုက်ဒၟံၚ် လ္ပာ်ကံၚ်ဇြဳပၞာန်ရဂှ် လ္ပာ်ဂကောံပၠန်ဂတးတအ် စောတ်စောဲလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – ဖယ်ခုံ- PDF
sanlontai