ဟိုတ်နူကရောၚ်ပၞာန်လုပ်ကၠုၚ် ပ္ဍဲခလေဝ်တခေါန်ဒေၚ်တုဲ ညးဒေသတအ် ဒးထပ်ဂြိပ်ဒဴဒၟံၚ်

လှာဒကှ်၊ သေပ်တေမ်ဗာ(၁၄)

တွဵုရးကရေၚ်၊ ပွိုၚ်ဍုၚ်လှာဒကှ်၊ ပ္ဍဲဂကောံကွာန်ခလေဝ်တခေါန်ဒေၚ်ဂှ် ဟိုတ်နူကရောၚ်ပၞာန်ကံၚ်ဇြဳပၞာန်ထ္ပက်လုပ်ကၠုၚ်တုဲ ညးဍုၚ်ကွာန် ကောန်ဒေသတအ် ဒးထပ်ဂြိပ်ဒဴဒၟံၚ်ရဂှ် ဂွံတီကေတ် အတိုၚ်လဟီုညးဒေသတအ်ရ။

ကရောၚ်ပၞာန်ကံၚ်ဇြဳပၞာန်ဂှ် နူကဵုရေၚ်ဒဵုတံၚ်ညော ကွာန်ဒဵုတၟံဗြဴ ပွိုၚ်ဍုၚ်ကျာ်မြဟ် တွဵုရးဍုၚ်မန် ကေုာံ ပွိုၚ်ဍုၚ်မုဟ်ဍုၚ်မွဲကဆံၚ် သ္ပတံနူဂိတုသေပ်တေမ်ဗာ စၟတ်တ္ၚဲ (၁၂)တေံတုဲ ထ္ပက်လုပ်ကၠုၚ်ဒၟံၚ်ကရောၚ်ပၞာန် လ္ပာ်ဂကောံကွာန်ခလေဝ်တခေါန်ဒေၚ် ပွိုၚ်ဍုၚ်လှာဒကှ် တွဵုရးကရေၚ်ရ။

ကရောၚ်ပၞာန်ကံၚ်ဇြဳပၞာန်ဂှ် ဖျေံလဝ်ဗဒိုပ် ပ္ဍဲသ္ၚိ ကေုာံဘာဗ္တောန်လိက် ကွာန်ဍုၚ်တြေံ၊ ကွာန်ခလေဝ်ဍောတ် ကေုာံကွာန်ခလေဝ်တုဲ ပ္တဝ်လဝ်က္ဍိုပ် သွက်ဂွံတိတ်အာ လ္ပာ်ဗဒိုပ်ဗၠာဲသၟိၚ် မၞုံကွာန်တခေါန်ဒေၚ် ဇွောံမစၞစ ပိုတ်သ္ကုတ်ဒၟံၚ်ဂှ်နွံရ။

ဒၟာနူကရောၚ်ပၞာန်လုပ်ကၠုၚ်တုဲ ဟိုတ်နူဂွိၚ်ဖေက်ထပ်ဒှ်ပေါဲဗတိုက်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA သ္ဇိုၚ်တိဍာ်တအ်ဂှ်ရ ညးဒေသကောန်ဍုၚ်ကွာန်တအ် ဒးဂြိပ်ဒဴပါဲဓလေတ်ဒၟံၚ်တုဲ ဘာဗ္တောန်လိက်တအ်လေဝ် ဒးကၟာတ်လဝ်ရဂှ် ညးဒေသမွဲတၠဂှ်ဟီုရ။

ဂကောံကွာန်ခလေဝ်တခေါန်ဒေၚ် ပွိုၚ်ဍုၚ်လှာဒကှ်ဂှ် နွံဒၟံၚ်ပ္ဍဲပွိုၚ်ဍုၚ်ဝၚ်ရော ခရိုၚ်ဒူပလာယာ KNU ဒပ်မဟာ (၆) တုဲ ပ္ဍဲကဵုဂကောံကွာန်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန် KNLA တအ် ပေါဲဗတိုက်ဆေၚ်မုက်ဒှ်ဒၟံၚ် မွဲခနမွဲခနရ။

ပ္ဍဲဂိတုဂျူလာၚ် တုဲကၠုၚ်တေံလေဝ် အကြာကရောၚ်ပၞာန်ကံၚ်ဇြဳပၞာန် ထ္ပက်လုပ်ဒၟံၚ်ပၞာန် ပ္ဍဲဂကောံကွာန်ခလေဝ်တခေါန်ဒေၚ်ဂှ်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက်သ္ကာတ်မြဟ် က္တဵုဒှ်လဝ်တုဲ ဟိုတ်နူဒပ်ကံၚ်ဇြဳပၞာန် ဗတိုက်ကဵုက္ၜၚ်ကျာ ပန်ဖျေံလွဟ်ဇၞော်ပ္ဍဲကွာန်ဂမၠိုၚ်တုဲ ညးဒေသ ဂၠိုၚ်ကဵုလ္ၚီ ဒးဂြိပ်ဒဴပါဲဓလေတ်လဝ်ရ။

ပ္ဍဲပေါဲဗတိုက်ဂှ် ဟိုတ်နူဒပ်ကံၚ်ဇြဳပၞာန် ပန်ပှ်ောလဝ်တုဲ ကောန်အရာပ်ညးဍုၚ်ကွာန်လ္ၚဵု ဇီုကပိုက်ချိုတ် ဒးလဝ်ဘဲဝပ်နွံတုဲ ကောန်အရာပ်ဟွံအောန်နူ (၁၀)တၠ ဒးဒုၚ်ရပ်ဒက်လဝ်ကဵုဒပ်ကံၚ်ဇြဳပၞာန်ရဂှ် ဂွံတီကေတ် နူညးဒေသတအ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KHRG