ပ္ဍဲဍုၚ်သဝ် ဒပ်ပၞာန်ကၠောန်သ္ပဒၟံၚ် ညံၚ်ဗၞိက်လုပ် ဂွံကၟာတ်ဒၞာအာ

သဝ် – သေပ်တေမ်ဗာ (၁၄)

ရးဒေသမဂွေ၊ ကွဳစက်လုပ်ကၠုၚ် ပ္ဍဲပွိုၚ်ဍုၚ်သဝ်တအ်ဂှ် ကၟာတ်ဒၞာဂၠံၚ်တုဲ ဟိုတ်နူကလေၚ်ဗလးပ္တိတ်ဒၟံၚ်ဂှ်ရ ကပေါတ်ဗၞိက်လုပ် ဒေါံဒေၚ်ဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္ပတံနူဂိတုသေပ်တေမ်ဗာ စၟတ်တ္ၚဲ (၁၁) တေံတုဲ ဟိုတ်နူက္လေၚ်ဗလးဒၟံၚ် ကွဳစက် ကွဳစက်တိုန်(ဇြုက်ဖျူ – သဝ်)တအ်တုဲ ပ္ဍဲလ္တူဍုၚ် ၚုဟ်မးကပေါတ်ဗၞိက် က္ဍၚ်တိုန်ကၠုၚ်ဒၟံၚ်ရ။

“ကွဳစက်တိုန်သဝ်၊ ကာန်ပါတ်လေတ်၊ ကျောက်ထုတအ်ဂှ် က္လေၚ်ဗလးနၚ်ဒၟံၚ် နူသၞေဟ်ကၚ် ကာန်ဇြောန်မရ။ ကွဳစက်စှ်ေကၠုၚ်ဂှ် ဒုၚ်ဒၟံၚ်တဲရ။ ဟိုတ်ဂၠံၚ်ဂွံကၟာတ်ဂှ်တှ်ေ ဟွံတီဏီ။ ဆေၚ်နွံလ္တူဍုၚ်လ္ၚဵုဂှ် ခ္ဍၚ်ပ္တိုန်ၚုဟ်ကပေါတ်ဗၞိက်တုဲ သွံဒၟံၚ်ယျ”ဂှ် ညးဒေသမွဲတၠဟီုရ။

ပြဟ်ဟ်ဏံဂှ် သၞေဟ်ကၚ်ကာန်ဇြောန်မ ကံၚ်ဇြဳပၞာန်ကၟာတ်လဝ်ဂှ် မွဲမွဲတ္ၚဲမ္ဂး အောန်အိုတ် သြန်လုပ် ဟိုတ်နူနွံဒၟံၚ် အကြာ (၅)ကိုတ်တုဲ ကၟာတ်လအ်အ်ဟွံသေၚ်ပုဟ်ဂှ် ကောန်ဒပ် PDF မွဲတၠဂှ် ဟီုရ။

“ကွဳစက်တိုန်ဂှ် ဟွံဒုၚ်တဲ။ မွဲလစုတ်ရ၊ ကၟာတ်လအ်အ် ဟွံသေၚ်ပုဟ်။ ဍေံတအ်ကၟာတ်ဂၠံၚ်တှ်ေ ကၠောဝ်ရ။ မွဲမွဲသၞေဟ်တှ်ေ အရိုဟ်ဟ် ဂွံဒၟံၚ် မသုန်ကိုတ်လ္ပာ်လ္တူတွဵုရ”ဂှ် ကောန်ဒပ် PDF မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပွိုၚ်ဍုၚ်သဝ်ကဵု ပွိုၚ်ဍုၚ်သုက်ဖျူတအ်ဂှ် သ္ၚောဲဒၟံၚ် ခရာ(၆၉)မိုၚ်တုဲ ဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲသၞေဟ် (၁၀)မိုၚ်အိုတ်ကဵု သၞေဟ်ကာန်ဇြောန်မ သ္ကုတ်ဂၠံၚ်ပခုက္ကူ၊ ကမ္မ၊ ပေါက်၊ ချောက်၊ ဇြုက်ဖျူ၊ သဝ်တအ်ရဂှ် ဂွံတီကေတ်ရ။

ပ္ဍဲဂိတုသေပ်တေမ်ဗာ ပထမသတ္တာဟတေံလေဝ် ပ္ဍဲလ္တူဍုၚ်သဝ်ဂှ် ဒပ်စဵုဒၞာညးဍုၚ်ကွာန်တအ်ကဵု ဒပ်ကံၚ်ဇြဳပၞာန်တအ် ပေါဲဗတိုက်ဆေၚ်မုက် ဒှ်လဝ်တုဲ စဵုကဵုအခိၚ်လၟုဟ်ဏံ အကာဲအရာပရေၚ်ပၞာန် ကြံၚ်မ္ၚိုဟ်ဒၟံၚ်ဖိုဟ်ဏီရဂှ် ဂွံတီကေတ်ရ။

ပရိုၚ် – သြၚ်လောနတိုၚ်(မ်)

ဗီုရုပ် – CJ (ဗီုဒပ်စဵုဒၞာညးဍုၚ်ကွာန် ပွိုၚ်ဍုၚ်သဝ်)