သွက်ဂွံကေတ်ကဵုဒုဟ် ကုဒပ်ပၞာန်ဗၟာ မဗ္တိုက်ဒၟံၚ်လ္တူကောန်အရာပ်တံ ညံၚ်ရဴသၞဂှ် ခရိုၚ်ဘာပန် KNU အာတ်မိက်

ဘာပန်၊ သေပ်တေမ်ဗာ (၁၅)

လ္တူကံၚ်ဇြဳပၞာန် မဗက်ပန်ပှော်ဂစိုတ်ဂယိုၚ်ဒၟံၚ် လ္တူညးဍုၚ်ကွာန်တံ ညံၚ်ရဴသၞ နကဵုတၚ်ရန်တၟံနွံနွံဂှ် နကဵုဍုၚ်ဒဳမဝ်ကရေဇြဳဍုၚ်ဇၞော်ဂမၠိုၚ် ပါလုပ်သီုကဵုကုလသမဂ္ဂတံ သွက်ဂွံရေၚ်တၠုၚ်ကေတ်ကဵုဒုဟ် ဗွဲမပြဟ်ဂှ် ကမ္မတဳကေၚ်ကာ ခရိုၚ်ဘာပန် KNU ပ္တိတ်လလောၚ်တြးတုဲ အာတ်မိက်လဝ်ရ။

ဒပ်ကံၚ်ဇြဳပၞာန်ဝွံ ပ္ဍဲကဵုကွာန်ဂမၠိုၚ်ကဵု ပ္ဍဲကဵုဒၞါဲကောန်ကွာန်တံ မသ္ပဒတဴတံဂှ် ပန်ပှော်ကဵု က္ၜၚ်ကျာဗ္တိုက်ကီု၊ ပန်ပှော်ကဵု နကဵုလွဟ်ဇၞော်ကီုတံဂှ် နူကဵုဒပ်မဟာ (၅) ခရိုၚ်ဘာပန် KNU ဒဒှ်ရဒစဵုဒစးဂှ် လလောၚ်ပ္တိတ်လဝ် နကဵုစၟတ်တ္ၚဲ ဂိတုသေပ်တေမ်ဗာ (၁၃) တေံတုဲ ပ္ဍဲကဵုတၚ်လလောၚ်တြးဏံဂှ် အာတ်မိက်လဝ် သွက်ဂွံကေတ်ကဵုအရေဝ် ကုကံၚ်ဇြဳပၞာန်ရ။

တုဲကၠုၚ် ပ္ဍဲဂိတုသေပ်တေမ်ဗာ (၆) တေံ ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်သီလဝ် ဗ္ဒိုပ်ဒပ် သာလဝ်ကျိုဝ် ခေပူ ကံၚ်ဇြဳပၞာန် နူကဵုခရိုၚ်ဘာပန် KNU တံဂှ်တုဲ ပ္ဍဲဂိတုသေပ်တေမ်ဗာ (၇) ဂှ် စွံပွန်လ္တူညးဍုၚ်ကွာန်ကောန်အရာပ်တံတုဲ ဗ္တိုက်ဂြာတ်လဝ်ဗုမ် နကဵုက္ၜၚ်ကျာ ပ္ဍဲကဵုကွာန်တံဂှ်ရ။

ဟိုတ်နူပရေၚ်ဗ္တိုက်ဂြာတ်ဗုမ်ဂှ်တုဲ ကမ္မတဳဘာတံကဵု ကွးဘာ ဒးချိုတ်အာလဝ် ၄ တၠတုဲ အ္စာၝောံတံကဵု ကွးဘာတံပါလုပ်ဂှ် ၆ တၠ ချိုတ်အာလဝ်ရ။

ကံၚ်ဇြဳပၞာန်ဝွံ ယဝ်ရဒှ်ပေါဲဗ္တိုက်ဆေၚ်မုက် ကုဂကောံဇြဟတ်ပၠန်ဂတးတၞဟ်ဟ်တံကီု ပါလုပ်သီုကဵုဂကောံဇြဟတ်ရပ်လွဟ်ကောန်ဍုၚ်အရၚ်တံဂှ်မ္ဂး ပွမပန်ပှော်ဒၟံၚ် နကဵုက္ၜၚ်ကျာဗ္တိုက်တံ၊ လွဟ်ဇၞော်တံ အပ္ဍဲကဵုကွာန်ဒၞါဲညးဍုၚ်ကွာန်တံ သ္ပဒတဴတံဂှ်ကဵု ဝၚ်ကမၠောန်ဂူယာဝါဗ္ၚတံဂှ် ကၠောန်သ္ပဒၟံၚ် မွဲဏှမွဲဏှရောၚ် ခရိုၚ်ဘာပန် KNU သ္ဂးလဝ်ရ။

ကြဴနူဗ္ဒိုပ်ခေပူ သာလဝ်ကျိုဝ် ဒးဒုၚ်သီတုဲဂှ် ကွာန်ဒပ်ကံၚ်ဇြဳပၞာန်တံ မဗက်ပန်ပှော်ဒၟံၚ်ဂှ်ဝွံ ဒှ်ဒၞါဲစမြိုၚ် ကေုာံ ရုၚ်ဌာန KNU/KNLA တံ မၞုံဂှ်ဟွံသေၚ်မွဲသာ် နကဵုတၚ်ရန်တၟံနွံနွံ ဗက်ပန်ပှော်ပသောၚ်လဝ် ကုညးဍုၚ်ကွာန်ဒေသတံဂှ်ရောၚ်ဂှ် သ္ဂးလဝ် ပ္ဍဲကဵုတၚ်လလောၚ်တြးဂှ်ရ။

ဂအုပ်ဗဟဵု KNU ဂှ်လေဝ် စွံပွန်လ္တူညးဍုၚ်ကွာန်ကောန်အရာပ် အပ္ဍဲခရိုၚ်ဘာပန်တံဂှ်တုဲ ကံၚ်ဇြဳပၞာန် မဝးပ္ကဝ်ဒၟံၚ် အမှုရာဇဝတ်ပၞာန်တံ မံက်မံက်ထေၚ်ၚ်ဂှ် သွက်ဂွံကေတ်ကဵုအရေဝ် ကၟာတ်လဒဵု နကဵုနဲကဲ မစှ်ေကဵုနတဲတံဂှ် ပ္ဍဲဂိတုသေပ်တေမ်ဗာ (၁၁) တေံ အာတ်မိက်လဝ် ဇရေၚ်ဍုၚ်သ္အာၚ်တံရ။

ပရိုၚ်−သြၚ်လောန်တိုၚ်(မ်)

ဗီု−KNU