ပံၚ်၊ သေပ်တေမ်ဗာ (၁၅)
ညးဒေသ (၁၂) တၠ နူကဵုကွာန် ( ဥတ္တံတား) ပွိုၚ်ဍုၚ်ပံၚ်၊ တွဵုရးဍုၚ်မန် နူကဵုဒပ်ကံၚ်ဇြဳပၞာန်တံ မရပ်ဒက်ဏာဂှ်ဝွံ စဵုကဵုလအ်ဂွံမွဲသတ္တာဟဂှ် ဟွံဂွံအဆက်ကဵုဂြောဝ်ဂတာတံဏီပုဟ်ဂှ် ဂွံတီကေတ် အတိုၚ်ဂလာန် ညးဒေသတံရ။
ပ္ဍဲဂိတုသေပ်တေမ်ဗာ (၆) တေံ ကြဴနူကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ် အပ္ဍဲကဵုကွာန် ( ဥတ္တံတား) ဒၞါဲကောန်ဂကောံဒပ်ဗၠာဲသၟိၚ်တံ ဒးဒုၚ်ပန်ပှော်ပသောၚ်ဒၟံၚ်မွဲဏှမွဲဏှဂှ်တုဲဂှ် ရပ်ဒက်ဏာလဝ် ညးဍုၚ်ကွာန်ဒေသ (၁၅) တၠရ။
ပၞောဝ်ကဵုညးဒေသ (၁၅) တၠ မရပ်ဒက်ဏာတံဂှ် (၃) တၠဂှ် ဂွံမွဲတ္ၚဲတုဲ နူကဵုကံၚ်ဇြဳပၞာန်တံ ကလေၚ်ဗလးကဵုလဝ်ကီုလေဝ် ညးဒေသသှ်ေတံဂှ် ဆက်ရပ်ဒက်လဝ်ဖိုဟ်ရ။
ဂြောဝ်ဂတာ ညးဒေသမဒးဒုၚ်ရပ်ဒက်တံဂှ် သွက်ဂွံဂွံအခေါၚ်ဆဵုဂဗဂှ် အာစိုပ်အာတ်မိက်လဝ် ဇရေၚ်ဂကောံဒပ်ဗၠာဲသၟိၚ်တံကဵု ဒပ်ကံၚ်ဇြဳပၞာန်တံကီုလေဝ် ဒဵုကဵုအခိၚ်လၟုဟ် ဟွံကဵုအခေါၚ်ဆဵုဂဗဏီတုဲ ထိၚ်ဒက်လဝ်ဒၞါဲလဵုရောဟီုဂှ် လဴထ္ၜးကဵုဟွံမွဲပုဟ်ဂှ် ညးမစုက်လုက်ကဵု ဂြောဝ်ဂတာညးတံမွဲတၠ ဟီုရ။
ရဲသ္ၚိ ညးမဒးဒုၚ်ရပ်လဝ် ကုဒပ်ကံၚ်ဇြဳပၞာန်တံဂှ် ပရေၚ်ဒှ်ဓဝိၚ်ဂွိၚ်ဂွါဲ သွက်ဂီုကၠီုညးတံကဵု အန္တရာယ်လမျီုညးတံ နွံဒၟံၚ်ရ။
အတိုၚ်ဂလာန် ညးမစုက်လုက်ကဵု ကံၚ်ဇြဳပၞာန်တံဂှ်မ္ဂး ညးဒေသပံၚ် (၁၂) တၠ မရပ်ဒက်လဝ်ဂှ် ပလံၚ်ဗစိုပ်ကဵုလဝ် ဇရေၚ်ဒၞါဲစၟဳတ် ကေုာံ ဗ္ဒိုပ်ဗၠာဲသၟိၚ်တိဍာ်ဇိုၚ်ကျာ်တံရောၚ်ဂှ် ဂွံတီကေတ်ရ။
အပ္ဍဲကဵုပွိုၚ်ဍုၚ်ပံၚ်ဂှ် အပ္ဍဲပွိုၚ်ၜါဂိတုတုဲကၠုၚ်တေံ ကောန်ဂကောံဒပ်ကံၚ်ဇြဳပၞာန် ၅ တၠ ဒးဒုၚ်ပန်ပှော်ပသောၚ်လဝ်တုဲ ရုၚ်ဌာနက္ဍိုက်ပ်အုပ်ဓုပ်ကာနာနာပွိုၚ်ဍုၚ်တံကဵု ဗ္ဒိုပ်ဗၠာဲသၟိၚ်တံလေဝ် ဒးဒုၚ်ဗ္တိုက်လဝ် ဟွံအောန်နူကဵု (၃) ဝါရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai