ပ္ဍဲခလေဝ်တခေါန်ဒေၚ် ဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်ဒှ်ဒၟံၚ်

လှာဒကှ်၊ သေပ်တေမ်ဗာ(၁၅)

တွဵုရးကရေၚ်၊ ပွိုၚ်ဍုၚ်လှာဒကှ်၊ ပ္ဍဲဂကောံကွာန်ခလေဝ်တခေါန်ဒေၚ်ဂှ် သ္ပတံနူဂိတုသေပ်တေမ်ဗာ စၟတ်တ္ၚဲ (၁၄)အခိၚ်နူဂယးတေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက်က္တဵုဒှ်ဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကရောၚ်ပၞာန်ကံၚ်ဇြဳပၞာန်ဂှ် နူရေၚ်ဒဵုတံၚ်ညော ပွိုၚ်ဍုၚ်မုဟ်ဍုၚ် ကေုာံကွာန်တၟံဗြဴ ပွိုၚ်ဍုၚ်ကျာ်မြဟ်မွဲကဆံၚ် ထ္ပက်လုပ်ကၠုၚ်ကရောၚ်ပၞာန် ပ္ဍဲဂကောံကွာန်ခလေဝ်တခေါန်ဒေၚ် နူဂိတုသေပ်တေမ်ဗာ စၟတ်တ္ၚဲ (၁၂)တေံတုဲ ဖျေံဗဒိုပ် မံၚ်တန်တဴဒၟံၚ် ပ္ဍဲသ္ၚိ ကေုာံဘာဗ္တောန်လိက် မၞုံပ္ဍဲကွာန်တအ်ဂှ်ရ။

ကရောၚ်ပၞာန်ဂှ်ကဵု ဒပ်ပံၚ်ကောံ KNLA တအ်ဂှ် သ္ပတံနူအခိၚ်နူဂယး တ္ၚဲဏံတုဲ ပေါဲဗတိုက်ဒှ်ဒၟံၚ်တုဲ လ္ပာ်ကံၚ်ဇြဳပၞာန်လေဝ် ကၠုၚ်ပန်ရီုကဵုလဝ် နက္ၜၚ်ကျာရဂှ် ညးဒေသတအ် ဟီုလဝ်ရ။

ပ္ဍဲပေါဲဗတိုက်ဏံ ညးဒေသလ္ၚဵုတအ် ဒးဒုၚ်ကၟာတ်ဂွံလဝ်နွံတုဲ သ္ၚိဌာန်ဇီုကပိုက်ဒးလီုလာ်လဝ် ၜိုန်နွံကီုလေဝ် အခိၚ်လၟုဟ်ပြဟ်ဟ်ဏံ ဟွံဂွံတီကေတ် ပရေၚ်ဇီုကပိုက်ဒးလဝ်ဂှ်ဏီရ။

ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲဂကောံကွာန်ခလေဝ်တခေါန်ဒေၚ်ဂှ် သွက်ဂွံဗပေၚ်ဇြဟတ် ဗဒိုပ်ဗၠာဲသၟိၚ် သၟဝ်တဲကံၚ်ဇြဳပၞာန် မၞုံကွာန်ဂှ်ကီု သီုသွက်ဂွံပလံၚ်ဗစိုပ်ဇွောံမရဂှ် ဂွံတီကေတ် နူညးစုက်လုက်ကဵု ဒပ်ကံၚ်ဇြဳပၞာန်တအ်ရ။

ကၠာဟွံဂွံဒှ်ပေါဲဗတိုက်ဏီ ဟိုတ်နူကရောၚ်ပၞာန်လုပ်ကၠုၚ်ကွာန်တုဲ ညးဒေသ ကောန်ညးဍုၚ်ကွာန် နူမပ္တံကဵု ကွာန်ဍုၚ်တြေံ၊ ခလေဝ်၊ ခလေဝ်ဍောတ် မၞုံဂကောံကွာန်ခလေဝ်တခေါန်ဒေၚ်တအ် ဒးဂြိပ်ဒဴပါဲဓလေတ်ဒၟံၚ်ရ။

ပ္ဍဲကဵုဂိတုဂျူလာၚ် တုဲကၠုၚ်တေံလေဝ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲဂကောံကွာန်လေဝ်တခေါန်ဒေၚ်ဂှ်ကဵု ဒပ်ပံၚ်ကောံ KNLA တအ် ပေါဲဗတိုက်သ္ကာတ်မြဟ် က္တဵုဒှ်လဝ်တုဲ ဟိုတ်နူကံၚ်ဇြဳပၞာန် သုၚ်စောဲလွဟ်ဇၞော် ပန်ရီုကဵုက္ၜၚ်ကျာတုဲ ညးဒေသဂၠိုၚ်ကဵုလ္ၚီု ဒးဂြိပ်ဒဴပါဲဓလေတ်လဝ် နွံရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNLA