ပ္ဍဲကဵုပေါဲဗတိုက်အခၠဵုတခေါန်ဒေၚ် ဟိုတ်နူလွဟ်ဇၞော်တုဲ သ္ၚိဒၟံၚ် ဗ္ဒာဲ ၅၀ မ ဒးလီုလာ်လဝ်

လှာဒကှ်၊ သေပ်တေမ်ဗာ(၂၂)

တွဵုရးကရေၚ်၊ ပွိုၚ်ဍုၚ်လှာဒကှ်၊ ပ္ဍဲကဵုပေါဲဗတိုက်ၜါလ္ပာ်ဒှ်လဝ် ပ္ဍဲဂကောံကွာန်အခၠဵုတခေါန်ဒေၚ်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ကောန်အရာပ်ဒးချိုတ်လဝ်မွဲတၠ သ္ၚိဒၟံၚ် ဗ္ဒာဲ ၅၀ မ ဇီုကပိုက်ဒးလီုလာ်လဝ်ရဂှ် KNU ခရိုၚ်ဒူပလာယာ လလောၚ်တြးလဝ်ပရိုၚ်ရ။

အကြာဒပ်ကံၚ်ဇြဳပၞာန်၊ BGF ထ္ပက်ကၠုၚ်ကရောၚ်ပၞာန် သွက်ဂွံထပ်ပေၚ်ဇြဟတ်ဗဒိုပ်ဗၠာဲသၟိၚ်အခၠဵုတခေါန်ဒေၚ် သီုသွက်ဂွံထိၚ်ဒဝ်တိဍာ်ဂှ်ကဵု ဒပ်ပံၚ်ကောံဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက်စက္တဵုဒှ်လဝ် ပ္ဍဲဂိတုသေပ်တေမ်ဗာ စၟတ်တ္ၚဲ ၁၄ တေံတုဲ လ္ပာ်ကံၚ်ဇြဳပၞာန် သုၚ်စောဲလွဟ်ဇၞော်ကေုာံက္ၜၚ်ကျာပန်ရီုလဝ်တုဲ ဗတိုက်ပန်ပှော်လဝ်ရ။

ဂိတုသေပ်တေမ်ဗာ နူစၟတ်တ္ၚဲ ၁၄ စဵုကဵုစၟတ်တ္ၚဲ ၁၈ ဂှ် ဟိုတ်နူဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော်ကြာန်န်တုဲ သ္ၚိဒၟံၚ် မၞုံပ္ဍဲဂကောံကွာန်အခၠဵုတခေါန်ဒေၚ် ဗ္ဒာဲ ၅၀မ ဇီုကပိုက်ဒးလီုလာ်လဝ်တုဲ ညးဒေသမွဲတၠဂှ်လေဝ် ဟိုတ်ဇီုကပိုက်ဒးက ဝေက်မကမ်ကံၚ်ဇြဳပၞာန်တုဲ ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲတၚ်လ​လောၚ်တြးရ။

သ္အာၚ်နူဂှ်ပၠန် ဒပ်ကံၚ်ဇြဳပၞာန် ကေတ်လဝ်ဒၞာဲဖျေံလဝ်ဗဒိုပ် ပ္ဍဲကွာန်တုဲ လုပ်စိုပ်ပလီုပလာ်ဒၟံၚ် သ္ၚိဌာန်ညးဍုၚ်ကွာန်တအ်ကီု၊ ဂၟာဲဂၠာဲပလီုပလာ်လဝ် ကပေါတ်မၞုံပ္ဍဲသ္ၚိတအ်ကီု၊ ကေတ်ဏာလဝ် ကပေါတ်နွံၚုဟ်မးဇၞော်ဇၞော်တအ်ကီု ကၠောန်သ္ပဏာလဝ်ရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲဂကောံကွာန်အခၠဵုတခေါန်ဒေၚ်ဂှ် ပ္ဍဲကဵုဂိတုသေပ်တေမ်ဗာ စၟတ်တ္ၚဲ ၁၈ တုဲကၠုၚ်တေံ စိုပ်ကၠုၚ်ပ္ဍဲဗဒိုပ်ဗၠာဲသၟိၚ်တခေါန်ဒေၚ်တုဲ ပန်ဖျေံဒၟံၚ်လွဟ်ဇၞော်ဍောတ် ပ္ဍဲကွာန်ဂှ် နွံဒၟံၚ်ဖိုဟ်ဏီရဂှ် လလောၚ်တြးလဝ်ရ။

ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲဂကောံကွာန်အခၠဵုတခေါန်ဒေၚ် သီုဇြဟတ်ပေၚ်ၚ်တုဲ ဟိုတ်နူပေါဲဗတိုက်ၜါလ္ပာ် က္တဵုဒှ်လဝ် သ္ကာတ်မြဟ်တုဲ ညးဒေသကောန်ညးဍုၚ်ကွာန် မၞုံဒေသအခၠဵုတခေါန်ဒေၚ်ဂှ် မွဲလက်ပြၚ် ဒးဂြိပ်ဒဴပါဓလေတ်ဒၟံၚ်တုဲ နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ် မပ္တံကဵုဇွောံမစၞစ၊ ဂဥုဲဇဗ နဒဒှ်ကာတၟေၚ်ရဂှ် ဂွံတီကေတ်ရ။

ပ္ဍဲကဵုပေါဲဗတိုက်အခၠဵုတခေါန်ဒေၚ်ဂှ် ပရေၚ်ဇီုကပိုက်ဒးချိုတ်လဝ် နွံသီုဒပ်ၜါလ္ပာ်တုဲ ပြဟ်ဟ်ဏံ ပေါဲဗတိုက်ညိၚ်ဝတ်ဒၟံၚ်တုဲ ဟိုတ်နူဒပ်ကံၚ်ဇြဳပၞာန် နွံဒၟံၚ်ပ္ဍဲကွာန်ဏီဂှ်ရ ညးဍုၚ်ကွာန် ကောန်ဒေသပါဲဒဴဘဲပၞာန်တအ် ဟွံဂံၚ်ကလေၚ်စဴ ဌာန်ဒၟံၚ်ဏီရဂှ် ဂွံတီကေတ် အတိုၚ်ညးဒေသတအ် ဟီုရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU