သိုက်ဗာ ရုၚ်သၞောဝ်ဓဝ်ရာဇဝတ်ပၞာန် ICC ဒးဒုၚ်ကၠတ်ဖံက်လုပ်လဝ်

တဳဟုက်၊ သေပ်တေမ်ဗာ(၂၁)

စပ်ကဵုဂဗုတ်ရာဇဝတ်ပၞာန်တအ်တုဲ ဟိုတ်နူသိုက်ဗာရုၚ်ဂဗုတ်ရာဇဝတ်ပၞာန် (ICC) ရပ်စပ်ဒၟံၚ်တၚ်ဂၞၚ်သ္ကာတ်မြဟ် ဒဒှ်ရဒးဒုၚ်ကၠတ်ဖံက်လုပ်လဝ်ဂှ် သ္ပလဝ်ဒ္တန် ပ္ဍဲဂိတုသေပ်တေမ်ဗာ စၟတ်တ္ၚဲ (၁၉)ဂှ်ရ။

ပ္ဍဲသတ္တာတုဲကၠုၚ်ဏံအိုတ်ဂှ် ပ္ဍဲကဵုဇာနှိက်ကောန်ပျူတာ ICC ဂှ် ဒဒှ်ရဂွံဆဵုညာတ်ကေတ်လဝ် တၚ်ကၠောန်ရေၚ်တၠုၚ်ဒၟံၚ် အတိုၚ်ဗီုပြၚ်ပကတိဟွံသေၚ် ဟီုသ္ဂးလဝ်တုဲ ပရေၚ်ဒဒှ်ဟွံညိၚ်ဝတ် ကလိုက်ကၟဵုဒှ် က္တဵုဒှ်ဒၟံၚ် စဵုကဵုအခိၚ်လၟုဟ်ဖိုဟ်ဏီရဂှ် လလောၚ်တြးလဝ်ရ။

စပ်ကဵုအကာဲအရာကောန်ပျူတာ ဒးဒုၚ်ဟက်လဝ်တုဲ ပါလုပ်သီုအကာဲအရာသောၚ်ကလးအာစိုပ်ဒတုဲ သွက်ဂွံဟီုသှ် ကဵုတၚ်သမ္တီဂှ် လ္တူတၚ်သၟာန် လ္ပာ်လကြဴတေံ ညးလဵုနွံဒၟံၚ်ရောဂှ်မ္ဂး ညးမၞုံအခေါၚ်ဟီုဂး ICC တးပါဲလဝ်ရ။

“သွက်ဂွံကလေၚ်ပလန်တဲကဵုအကာဲအရာဟွံချပ်လဝ်ဏံဂှ် ညံၚ်ပရေၚ်ဇီုကပိုက်ဒးဂွံအောန်ယအ်စှ်ေဂှ် ဖျေံလဝ်အစဳမာန်ဗွဲမပြဟ်ရဂှ်” ဓမံက်ထ္ၜးလဝ်ပ္ဍဲတၚ်လလောၚ်တြး ICC ဗွဲခမ္ဍန်ဂှ်ရ။

ICC ဂှ် ဒှ်ရုၚ်ဂဗုတ်ရာဇဝတ်ပၞာန်မၞုံဍၚ်တဳဟုက် ကၟိန်ဍုၚ်နေဝ်တာလာန်ဒ္တန်မွဲတုဲ သွက်ဂွံစၟစၟတ်ဂဗုတ်ရာဇဝတ်ပၞာန်ကေုာံ ဂဗုတ်ရာဇဝတ်ကလိလောန်လဝ်လ္တူကောန်ဂကူမၞိဟ်တုဲ ဒက်ပ္တန်လဝ်ပ္ဍဲသၞာံ ၂၀၀၂ တေံရ။

ပ္ဍဲရုၚ်သၞောဝ်ဓဝ် ICC ဂှ် စပ်ကဵုအကာဲအရာကၟိန်ဍုၚ်ဂမၠိုၚ် ပါလုပ်သီုကၟိန်ဍုၚ်ယူကရုၚ်၊ ယူဂါန်ဒါ၊ ဗေန်နဳသောဲလာ၊ အာဖဂါန်နေဿတာန်ကေုာံကၟိန်ဍုၚ်ဖိလေတ်ပိုၚ်တအ်တုဲ နာဲဗ္စာအလဵုအသဳတအ် ကၠောန်သ္ပဒၟံၚ်ပရေၚ်ဂၠိုက်ဂၠာဲစၟဳစၟတ် (၁၇)ဂဗုတ်နွံဒၟံၚ်ရ။

ပ္ဍဲကဵုဂိတုမာတ်တုဲကၠုၚ်တေံ ရုၚ်သၞောဝ်ဓဝ်ဂှ် နကဵုသံသယထ္ဍေၚ်ပ္တိတ်လဝ်ကောန်ၚာ်သၟတ်တအ်နူကဵုဍုၚ်ယူကရုၚ်ဟွံလုပ်သၞောဝ်ဂှ် ဒဒှ်ရပ္တိတ်လဝ်ဝရာန်ရပ် သမ္မတရုယှာ ဗလာဒဳမာပူတေန်ဂှ် မံက်တိတ်ကၠုၚ်ပ္ဍဲက္ဍိုပ်ပရိုၚ်ဇၞော်တအ်တုဲ လ္ပာ်ကရေန်မလေန်လေဝ် နကဵုတၚ်စောတ်စောဲဂှ် ပါဲတးလဝ်နကဵုအခေါၚ်စဳရေၚ်သၞောဝ်ဓဝ်ရ။

ပၞောဝ်ကဵုလိက်တၞးသ္ကာတ်မြဟ် ဂိုၚ်ဒေပ်ထိၚ်ဒဝ်လဝ် ပ္ဍဲကဵု ICCဂှ် သ္ပတံနူကဵုသက်သဳသာဓကဆေၚ်ကဵုဒုဟ်ဒဏ်တအ်ဒှ်တမ် စဵုကဵုယၟုသက်သဳတအ်ဂှ် အရာလဵုဟွံဟီုပါလုပ်မာန်ဒၟံၚ်ရဂှ် ၜိုန်ရဟီုလဝ်ကီုလေဝ် ရုၚ်သၞောဝ်ဓဝ်ဂှ်မ္ဂး လုပ်စိုပ်လဝ်သွာၚ်မၞုံပ္ဍဲလစှ်ေကောန်ပျူတာညးတအ်သွာၚ်လဵုရောဂှ်မ္ဂး ဟီုပ္တိတ်ဟီုထ္ၜးလဝ်ဟၟဲရ။

နကဵုအရီုဗၚ်အလဵုအသဳနေဝ်တာလာန် ပါ်ပါဲသ္ၚဳဂၠိပ် ပရေၚ်ဇီုကပိုက် နူဒဒှ်ပရေၚ်ပရောဏံတုဲ ဒဒှ်ရကၠောန်ရေၚ်တၠုၚ်ဒၟံၚ် ညံၚ်သ္ဂောံသက်သာအောန်ယအ်စှ်ေဂှ် ရုၚ်သၞောဝ်ဓဝ် လလောၚ်တြးလဝ်တုဲ ကၠောန်ရေၚ်တၠုၚ်ဒၟံၚ် ညံၚ်ပရေၚ်ဂီုကၠီု သိုက်ဗာညးတအ် ဇြဟတ်ဂွံခိုဟ်ကၠုၚ်ဒၟံၚ်ရဂှ် ရုၚ်သၞောဝ်ဓဝ် ဟီုလဝ်ရ။

ညးမၞုံအခေါၚ်ဟီုဂှ် နူကဵုဌာနသၞောဝ်ဓဝ်နေဝ်တာလာန်ဂှ် ဇြေန်တာပရေၚ်ဂီုကၠီုသိုက်ဗာကောန်ဂကူကၟိန်ဍုၚ် အခိၚ်လၟုဟ်ဏံ ဒဒှ်ရထ္ၜလဘာ်ရီုဗၚ် ဂၠိုက်ဂၠာဲစၟဳစၟတ်ကဵုဒၟံၚ်ဂှ် ၜိုန်ရသ္ပလဝ်ဒ္တန်ကီုလေဝ် သွက်ဂွံဟီုကဵုတၚ်သမ္တီတၞဟ်သ္အာၚ်တအ်ဂှ် ဟီုတးပါဲလဝ်ရ။

ဥက္ကဋ္ဌဂကောံနာဲဗ္စာ ICC ဂှ်လေဝ် နာဲဗ္စာကောန်ဒုဟ်တအ်ကဵု နာဲဗ္စာတၠဂဗုတ်တအ်ဂှ် ဒးဇီုကပိုက်ဒး တုပ်သၟဟ်ကဵု ညးယိုက်ဝန်ရုၚ်သၞောဝ်ဓဝ်တအ် မွဲစွံရဂှ် ဟီုလဝ်တုဲ သောၚ်ကလးအာ အကာဲအရာဏံ ပြဟ်ဟ်ပြေဟ်ဟ်မာန်ရောၚ် ဒဒှ်ရစၟဳပတှ်ေလဝ်ဂှ် ဟီုသ္ဂးလဝ်ရ။

ICC ဂှ် ဟိုတ်နူဂၠိုက်ဂၠာဲစၟဳစၟတ်ဒၟံၚ် ဂဗုတ်ရာဇဝတ်ပၞာန် ဂျဝ်ဂျဳယာကဵု ဂဗုတ်ရာဇဝတ်ပၞာန်ရုယှာ က္တဵုဒှ်လဝ် ပ္ဍဲဍုၚ်ယူကရုၚ်မာန်ဒၟံၚ်တုဲ ရုယှာ စိုတ်လုပ်စဒၟံၚ် ကဵုတၚ်ဂၞၚ်တအ်ဏံ မာန်ဒၟံၚ်ရဂှ် အေဂျေန်ဇြဳထံၚ်ပရိုၚ်ဒေတ်ချ် (AIVD) ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် ပေၚ်သၞာံ 2022 ဂှ်ရ။

နာဲဗ္စာ ICC ကာရေမ်ခါမ်ဂှ်လေဝ် ပရေၚ်ဗတိုက်လဝ်သိုက်ဗာဏံဂှ် သွက်ဂွံလ္ၚတ်ဂၠိုက်ဂၠာဲ ဂဗုတ်ရာဇဝတ်ပၞာန် အနာဂတ်ဂတဏံ မွဲဒကုတ်မွဲဒကဴ ဒှ်မာန်ရဂှ် ဟီုလဝ်တုဲ အလဵု ICC ဂှ် ဟိုတ်နူဇီုကပိုက်ဒးလောဲဒၟံၚ်ဂှ်ရ အလဵုညးတအ် ညံၚ်ဇြဟတ်ပရေၚ်ဂီုကၠီု ဂွံခိုဟ်ကၠုၚ် ထေက်ကဵုဒးကၠောန်ရေၚ်တၠုၚ်ရောၚ်ဂှ် ဟီုကဵုလဝ်သတိရ။

Ref: CAN