ဝန်ဇၞော်ကောန်ဍုၚ်အရၚ် ကၟိန်ဍုၚ်တြေံ နာဲသိုက်လောန် ပြဟ်လလုဲ

မတ်မလီု၊ သေပ်တေမ်ဗာ (၂၂)

နာဲသိုက်လောန် ဝန်ဇၞော်ကောန်ဍုၚ်အရၚ်ကၟိန်ဍုၚ် တြေံဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၀)တ္ၚဲ တုဲကၠုၚ်တေံ အခိၚ်ဗ္တံဂှ် ဒးပြဟ်လလုဲလဝ် ပ္ဍဲရုၚ်ဂဥုဲကာန်တာယာ နကဵုယဲကောန်ကၟံရဂှ် ဂွံတီကေတ် နူညးစုက်လုက်ကဵု ဂကောံသ္ၚိကၟိန်ညးရ။

နာဲသိုက်လောန်ဂှ် ပ္ဍဲလက်ထက်အလဵုအသဳ ဗော်ဒဳမဝ်ကရေဇြဳကောန်ဂကူ (NLD) နူကဵုသၞာံ ၂၀၁၆ စဵုကဵု ၂၀၂၁ ကၠာဟွံဂွံသီအဝဵုဏီ ဒှ်ညးယိုက်ဂၠေၚ်လဝ်တာလျိုၚ် နဒဒှ်ဝန်ဇၞော်ကောန်ဍုၚ်အရၚ်တုဲ အခိၚ်ပြဟ်လလုဲဏံ က္လိဂွံအယုက် ၈၃ သၞာံရ။

ညးဂှ် ပ္ဍဲသၞာံ ၁၉၄၀ ဂှ်က္တဵုဒှ်မၞိဟ် ပ္ဍဲဇရေၚ်မအံက် ဥူလုမ်တေန် မိအံက်ဒဝ်ကရောတ် ပ္ဍဲကွာန်ကအ်ကြိက် ပွိုၚ်ဍုၚ်ကျာ်မြဟ်၊ တွဵုရးဍုၚ်မန်တုဲ ပ္ဍဲကဵုတက္ကသိုလ်မတ်မလီုဂှ် ပါလုပ်လဝ် ပ္ဍဲဂကောံလိက်ပတ်ယေန်သၞာၚ်မန်တုဲ ဒှ်ညးက္လိဂွံလဝ်တဆိပ်ကြာ ဘဳအေ နဘာသာ (ဒဿနိကဗေဒ) ကေုာံ တဆိပ်ကြာဝိဇ္ဇာရ။

နာဲသိုက်လောန် လုပ်ကၠုၚ်စိုပ်ကၠုၚ် ပ္ဍဲလောကပရေၚ်ဍုၚ်ကွာန် ပ္ဍဲသၞာံ ၁၉၅၈ ဃောအယုက် ၁၈ သၞာံဂှ် ပ္ဍဲသၞာံ ၁၉၈၈ ပၠန်ဂတး ၈ ပန်မ က္တဵုဒှ်ဂှ် ပ္ဍဲအရာဒက်ပ္တန်ဗော်ဒဳမဝ်ကရေဇြဳဂကူမန် (MNDF) ဂှ်လေဝ် ဒှ်ညးပါလုပ်လဝ်ရ။

ပ္ဍဲလက်ထက်အလဵုအသဳဒဳမဝ်ကရေဇြဳ ဥူတုၚ်ဇြုၚ်က္ဍိုက်လဝ်က္ဍိုပ် ပ္ဍဲသၞာံ ၂၀၁၂ ဂှ်မ္ဂး ဗော်ဒဳမဝ်ကရေဇြဳမန် (MDP) ကေုာံ ပ္ဍဲသၞာံ ၂၀၁၄ ဂှ် အခိၚ်ဗော် MDP ပြံၚ်သၠာဲယၟု နဒဒှ်ဗော်ကောန်ဂကူမန် (MNP) ဂှ် နာဲသိုက်လောန် ယိုက်ဂၠေၚ်လဝ်တာလျိုၚ် ဒုတိယဥက္ကဋ္ဌရ။

ရုပ်ကလာပ်ဝန်ဇၞော်ကၟိန်ဍုၚ်တြေံ နာဲသိုက်လောန်ဂှ် တ္ၚဲယး ဂိတုသေပ်တေမ်ဗာ စၟတ်တ္ၚဲ ၂၂ တေံမ္ဂး ပလံၚ်ဗစိုပ် သုဿာန်ပုၚ်နေဝ်ကုမ် မၞုံဍုၚ်မတ်မလီု စံၚ်ဇွဂြးဇုတ်ရောၚ်ဂှ် ဂွံတီကေတ်တုဲ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media