ပရေၚ်ဒဒှ်ကံၚ်ဇြဳပၞာန်ဗတိုက်ပန်လဝ်ကဵုက္ၜၚ်ကျာ ဒဵုကဵု ၁၂၀၀ ဝါပြၚ်နွံကၠုၚ်

လဂုၚ်၊ သေပ်တေမ်ဗာ (၂၆)

ပ္ဍဲမွဲကာလသီအဝဵုဏံ ကံၚ်ဇြဳပၞာန် ပ္တဝ်လဝ်ကဵုဍုၚ်ကွာန် ဒၞာဲကောန်အရာပ်ညးဍုၚ်ကွာန်တအ် မံၚ်တန်တဴဒၟံၚ် သီုတၚ်ရန်တၟံနွံနွံတုဲ နူကဵုပၞာန်ကျာ ပရေၚ်ဒဒှ်ဗတိုက်ပန်လဝ် ၁၂၀၀ ဝါပြၚ် နွံရဂှ် အလဵုအသဳညဳသၟဟ်ကောန်ဂကူ NUG လလောၚ်တြးလဝ်ရ။

ဟိုတ်နူဗတိုက်လဝ်ကဵုက္ၜၚ်ကျာဗီုဏံတုဲ ဒဵုကဵုတ္ၚဲဏံ အပံၚ်လၟိဟ်သ္ၚိဒၟံၚ် ဒးလီုလာ်ဆောံလေၚ်လဝ် (၁၀၈၀) မ၊ ကောန်အရာပ်ညးဍုၚ်ကွာန် ဒးချိုတ်လဝ် (၅၄၁) တၠ၊ ကောန်အရာပ်ညးဍုၚ်ကွာန် ဇီုကပိုက်ဒးလဝ်ဘဲဝပ် (၄၃၃) တၠ၊ ဘာဗ္တောန်လိက် ဇီုကပိုက်ဒးလီုလာ်လဝ် (၃၉)ဘာ၊ ရုၚ်ဂဥုဲ (၂၂) ရုၚ် ကေုာံ စမြိုၚ်ပရေၚ်ဘာသာ စဵုကဵု (၅၄) မနွံရဂှ် ဓမံက်ထ္ၜးလဝ်ရ။

သ္အာၚ်နူဂှ်ပၠန် သ္ပတံနူကဵုပၞာန်ဒစဵုဒစးညးဍုၚ်ကွာန် စဒှ်တေံတုဲ စဵုကဵုကာလလၟုဟ်ဏံ ဟိုတ်နူပရေၚ်ပ္ကီုပရာပ်ကံၚ်ဇြဳပၞာန်တုဲ အပံၚ်လၟိဟ်သ္ၚိဒၟံၚ် (၇၅,၀၀၀) ပြၚ်၊ ညးဒးချိုတ်လဝ် (၄,၅၅၂) တၠ၊ မၞိဟ်ဇီုကပိုက်ဒးလဝ်ဘဲဝပ် (၃,၉၂၆) တၠ ကေုာံ ညးဒးဂြိပ်ဒဴထောံသ္ၚိဌာန် ၁ ဒသမ ၉ ပြကောဋိကိုတ်ပြၚ် နွံကၠုၚ်ရ။

ပရေၚ်ဒဒှ်ဏံဂှ် အလဵုဇကုက္ဍိုပ်သ္ကိုပ်ပၞာန် တိုန်စိုပ်တုပ်လဝ်စိုတ် ပ္ဍဲကဵုတၚ်တုပ်စိုတ်အာဇြဳယာန် ၅ တၚ်၊ တၚ်သ္ဂုတ်သွာတ် ပရေၚ်ဍုၚ်ဗၟာ စၟတ် ၂၆၆၉ ကံၚ်ဇြဳပရေၚ်ဂီုကၠီုကုလသမဂ္ဂမပ္တံသာ်ဏံတအ်ဂှ် ဟွံဒ္ဂေတ်ဗက်တုဲ သီုတၚ်ရန်တၟံနွံနွံ ဆက်က္လိလောန်ဒၟံၚ် ကမၠောန်ပ္ကီုပရာပ် လ္တူညးဍုၚ်ကွာန်တအ် အဆက်က်ရဂှ် NUG ဟီုလဝ်ရ။

ဟိုတ်နူကမၠောန်ပ္ကီုပရာပ်ကံၚ်ဇြဳပၞာန်တုဲ အလုံညးဍုၚ်ကွာန် ကောန်ကၟိန်ဍုၚ်ဗၟာမွဲ ဒးဆေၚ်ဒၟံၚ်ဒၟံၚ်မုက်ကဵု ဒဒိုက်သၞာပရေၚ်မၞိဟ် ဂၠိုၚ်ကဵုဂကူတုဲ လၟိဟ်မၞိဟ်ကောန်ဍုၚ် ဗ္ဒာဲပိဂအုံမွဲဂအုံ နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ်ရ။

သွက်ကၟိန်ဍုၚ်ဗၟာဂှ် အရီုဗၚ်ဗ္စာရဏာပရေၚ်မၞိဟ် ကၟိန်ဍုၚ်နနာနာဗွဲမဂၠိုၚ် ကံၚ်ဇြဳပၞာန်ထိၚ်ဒဝ်ဒၟံၚ်ကီု၊ အရီုဗၚ်တအ်ဂှ် ဟွံစိုပ်ဇရေၚ်ညးဍုၚ်ကွာန် နွံဒၟံၚ်ပၟိက် ဍာံဍာံဇေတ်တ်တအ်ကီု၊ တာဒၞာပလာပ်ပထုဲဒၟံၚ်တအ်ဂှ် လ္ၚတ်ဂွံဆဵုကေတ်ဒၟံၚ်ရဂှ် NUG ဟီုလဝ်ရ။

နကဵု NUG ဂှ် ပ္ဍဲကဵုတိဍာ်အုပ်ဓုပ်ဇကုတအ်ဂှ် မဏ္ဍိုၚ်စဳရေၚ်သၞောဝ်ဓဝ်ညးအရာပ်ဂှ် သ္အာၚ်နူဓမံက်ရုပ်ရဴ ဗ္ဂေတ်ဒၟံၚ်တုဲ နကဵုဌာနဝန်ဇၞော်ပရေၚ်စဵုဒၞာဂှ် ပ္ဍဲကဵုဒပ်ပၞာန် PDF ဂှ်လေဝ် ဓမံက်ဒၟံၚ်ရုပ်ရဴ သၞောတ်စဳရေၚ်သၞောဝ်ဓဝ် သွာၚ်ပၞာန်ရဂှ် ကဵုလဝ်သမ္တီရ။

သွက်ဂွံပလှ်ဖျေံကံၚ်ဇြဳပၞာန် က္လိလောန်ဒၟံၚ်ပွပ္ကီုပရာပ် လ္တူညးဍုၚ်ကွာန်လၟိုန် ဗွဲမပြဟ်မာန်ဂှ် NUG ပံၚ်တောဲကဵု ညးဍုၚ်ကွာန်တအ်တုဲ ဆက်ပ္တိတ်အာဇြဟတ်ရောၚ် ထပ်ဖျေံလဝ်သန္နိဌာန်ရဂှ် ဟီုလဝ်ရ။

နကဵုတွဳဗွိုၚ်ကၟိန်ဍုၚ်နာနာတအ်ဂှ် သွက်ဂွံပူဗိုၚ်ရီုဗၚ်ကဵု ပၠန်ဂတးက္ညၚ်ကၟိန်ဍုၚ်ဗၟာ ညံၚ်ဂွံစိုပ်တရဴ လ္တူနူဏံတုဲ ပရေၚ်ပၞာန်စှ်ေနတဲ၊ ပရေၚ်ဍုၚ်ကွာန်၊ ပရေၚ်ပိုန်ဒြပ်၊ အရီုဗၚ်ကလုတ်တမာန်တအ်ဂှ် NUG ဗတိုက်ဖ္အောဝ်လဝ် ဇြိုဟ်ဟ်နက်က်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – NUG