တၞၚ်သဳ၊ သေပ်တေမ်ဗာ (၂၆)
ပ္ဍဲကွာန်မဝ်တုၚ်ဗၟံက်၊ ပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳဂှ် ဟိုတ်နူမကမ်လွဟ်ဇၞော် နူကဵုဒပ်ကံၚ်ဇြဳပၞာန်တံ မပန်ပှော်လဝ်တံ ဒတုဲဗ္တိုဟ်ထ္ကးအာလဝ်ဂှ်ရ ညးဍုၚ်ကွာန်ကောန်အရာပ်မွဲတၠ ချိုတ်အာလဝ်ရောၚ် ဂွံတီကေတ် ဇရေၚ်ညးဒေသတံရ။
ဒပ်အမၠံက်ကံၚ်ဇြဳပၞာန် စၟတ် (၃၀၆) ဖျေံသ္ဇိုၚ်တၞၚ်သဳဂှ်ဝွံ တုဲကၠုၚ် ပ္ဍဲဂိတုသေပ်တေမ်ဗာ ၂၄ အခိၚ်နူဂယးဂှ် ပေါဲဗ္တိုက်ဟွံမွဲမွဲသာ် ပန်ပှော်စုတ်လဝ် လွဟ်ဇၞော် (၁၀) မ အပ္ဍဲကဵုကွာန်မဝ်တုၚ်ဗၟံက်ဂှ်ရ။
ဟိုတ်နူမကမ်လွဟ်ဇၞော် နူကဵုဒပ်ကံၚ်ဇြဳပၞာန်တံ မပန်ပှော်လဝ်ဂှ်တုဲ သ္ၚိဒၟံၚ်ညးဒေသ (၂) မ ဇီုကပိုက်လီုလာ်အာလဝ်တုဲ ကိုဝ်တဳၚါ အာယုက် (၃၀) သၞာံ ဒးမကမ်တုဲ ချိုတ်အာလဝ် ပ္ဍဲကဵုဒၞါဲဒှ်ပရူဂှ်ရ။
ဟိုတ်နူအန္တရာယ်လွဟ်ဇၞော်တုဲ ညးဒေသလ္ၚဵု နူကဵုကွာန်ဇြလုၚ် ပါလုပ်သီုကဵုကွာန်မဝ်တုၚ်ဗၟံက်၊ ထုၚ်နဲ၊ ဗာန်လမတ်တံ ဒးဂြိပ်ဒဴပါဲဒလေတ်ဒၟံၚ် နွံဒၟံၚ်ရောၚ် ညးဒေသတံ ဟီုဂးလဝ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၁၉) တေံဂှ်လေဝ် နူကဵုတမ်ဒပ် ခမရ ၅၅၆ ကံၚ်ဇြဳပၞာန် ဖျေံသ္ဇိုၚ်ကွာန်အံက်ကေန်ဂှ် ပန်ပှော်စုတ်လဝ် လွဟ်ဇၞော်တံဂှ်ရ ဒတုံဗ္တိုဟ်ထ္ကးအာလဝ် လ္တူဘာလကျာ် ကွာန်ဗဝ်ဓိကာန်ဂှ်တုဲ သၚ်ၜါဇကု ဇီုကပိုက်ကလိဂွံလဝ်ဝပ်ဏီရ။
ပ္ဍဲရးတၞၚ်သဳဂှ် အပ္ဍဲဂိတုအဝ်ဂါတ်တုဲကၠုၚ်တေံ မ္ၚးနူကဵုပေါဲဗ္တိုက်တံဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံဂှ်တုဲ ကောန်အရာပ် ဗ္ဒါဲ ၂၀ တၠ ချိုတ်အာလဝ်ရောၚ် ဂကောံသုတေသနအပ္ဍဲဒေသတံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai