တံဒပ်ကံၚ်ဇြဳပၞာန် ဖျေံသ္ဇိုၚ်ဍုုၚ်ရေဝ် ဒးဒုၚ်ဗတိုက်ဒၟံၚ် ဆက်ကၠုၚ်

ရေဝ်၊ သေပ်တေမ်ဗာ(၂၇)

တံဒပ်ဖျေံသ္ဇိုၚ်ကံၚ်ဇြဳပၞာန် မၞုံပွိုၚ်ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်တအ်ဂှ် ပ္ဍဲကဵုဂိတုဏံ ဒပ်ပံၚ်ကောံ ဂကောံဇြဟတ်ပၠန်ဂတးတအ် ဗတိုက်လဝ် ဆက်ကၠုၚ်ရ။

ပ္ဍဲဂိတုသေပ်တေမ်ဗာ နူစၟတ်တ္ၚဲ (၂၃)စဵုကဵုစၟတ်တ္ၚဲ (၂၅)တုဲကၠုၚ်တေံ ပ္ဍဲကဵုပွိုၚ် (၃)တ္ၚဲဏံ အာစိုပ်ဗတိုက်လဝ် တံဒပ်ပၞာန်တိုက် စၟတ်(၁၀၆)၊ တံဒပ် စၟတ်(၅၈၈) ကေုာံ တံဒပ် စၟတ် (၅၈၆) မဒှ်တံဒပ်ကံၚ်ဇြဳပၞာန် ဖျေံသ္ဇိုၚ်ရေဝ်တအ် အရိုဟ်တ္ၚဲဆက်က်ရ။

ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်စဵုဒၞာညးဍုၚ်ကွာန် PDF ကေုာံ ဒပ်ရပ်လွဟ်ပၠန်ဂတးမန်တအ် မ္ၚးနူလွဟ်ဇၞော်တုဲ ပ္ဍဲအရာသုၚ်စောဲဗတိုက်လဝ် ​ဒပ်ကံၚ်ဇြဳပၞာန် နကဵုက္ၜၚ်ကျာမသက္ကုမၞိဟ်ဒဳ အဇြာဍောတ်တအ်ဂှ် လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် ဟွံအောန်နူ (၅)တၠနွံရ။

နဒဒှ်တ္ၚဲကြပ်ညောန်အိုတ်ဂှ် ပ္ဍဲကဵုဂိတုသေပ်တေမ်ဗာ စၟတ်တ္ၚဲ (၂၅) ပ္ဍဲကဵုပရေၚ်အာစိုပ်ဗတိုက်လဝ် တံဒပ် ကံၚ်ဇြဳပၞာန် စၟတ်(၁၀၆) ဖျေံသ္ဇိုၚ်တၟံကၞေၚ်ဂှ် ပရေၚ်ပန်ပှော်ၜါလ္ပာ် က္တဵုဒှ်လဝ်ရ။

အတိုၚ်ညးဒေသတအ်ဟီုလဝ်မ္ဂး ကြဴနူတံဒပ်ဖျေံသ္ဇိုၚ်ကံၚ်ဇြဳပၞာန်တအ် ဒးဒုၚ်ဗတိုက်လဝ်တုဲ ဒပ်ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီု ပ္ဍဲဒၞာဲလုပ်တိတ်ဍုၚ်တအ်တုဲ ပ္ဍဲကဵုကွာန်လ္ၚဵုဂှ်လေဝ် ထ္ပက်လုပ်လဝ်ကရောၚ်ပၞာန်ရဂှ် ဟီုလဝ်ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၁၂) တုဲကၠုၚ်တေံလေဝ် တံဒပ်ခမရ ၅၈၃၊ ခမရ ၅၉၀ ဖျေံသ္ဇိုၚ်ရေဝ် ၜါတံဒပ်ဂှ်လေဝ် ဒပ်ပံၚ်ကောံ KNLA တအ် အာစိုပ်ဗတိုက်လဝ် နကဵုလွဟ်ဇၞော်ဂှ် လ္ပာ်ကံၚ်ဇြဳပၞာန် ဒးချိုတ်လဝ် (၄)တၠတုဲ ဒးလဝ်ဘဲဝပ် (၇) တၠရဂှ် ဂွံတီကေတ် အတိုၚ်တၚ်လလောၚ်တြး ဒပ်ပံၚ်ကောံတအ်ရ။

ပ္ဍဲကဵုပွိုၚ်ဍုၚ်ရေဝ် ပရေၚ်ချဳဒရာၚ်ဂကောံဇြဟတ်ပၠန်ဂတးတအ် ဇြဟတ်ခိုဟ်ဒၟံၚ်ဂှ်မ္ဂး ပ္ဍဲကဵုဂိတုဖေဖဝ်ဝါရဳ စၟတ်တ္ၚဲ (၂) ဂှ် ကံၚ်ဇြဳပၞာန် ပိုၚ်ခြာစၟတ်သမ္တီလဝ် နဒဒှ်ပရေၚ်အုပ်ဓုပ်ပၞာန်တုဲ လလောၚ်တြးပ္တိတ်လဝ် အမိၚ်ဒေသန္တရနာနာသာ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် -Reuters