ဂျာကာတာ၊ သေပ်တေမ်ဗာ ၂၆
အလဵုအသဳအေန်ဒိုဝ်နဳယှာ သွက်ဂွံပ္တိတ်အာ စေဝ်ပၞောန်တၟိ စပ်ကဵုပရေၚ်ရပ်စပ်သိုဝ်ယှေဝ်မဳဒဳယာ သွက်ဂွံသွံတြးကပေါတ်ဗၞိက်အပ္ဍဲဍုၚ်တံ နွံဂှ် ထ္မံက်ထ္ၜးဒၟံၚ် ပ္ဍဲကဵုမဳဒဳယျာပရိုၚ်အပ္ဍဲဒေသတံရ။
ပရေၚ်ချဳဒရာၚ်ဏံဝွံ ဒှ်ပြဝ ရန်တၟံလဝ် သွက်ဂွံဖအိုတ်ကၠေံ ပရေၚ်ဗွဝ်ဖျာအဖ်လာၚ် မဒှ်ပရေၚ်ပိုန်ဒြပ်အာယှဒိုဟ်အဂၞဲဇၞော်အိုတ် မဒးဒုၚ်ဘပဠကၠုၚ်ဒၟံၚ်တံဂှ်ရောၚ်ဂှ် သမ္မတဂျိုဝ်ကိုဝ်ဝဳဒိုဝ်ဝ် ဟီုဂးလဝ်ရ။
ညးတာလျိုၚ်နွံလ္ၚဵုတံဂှ် ကေတ်အစာံ ကု Tik Tok မဒှ်ပလက်ဝှမ်ဗဳဒဳယောဂှ်တုဲ သွံတြးဒၟံၚ် လ္တူပလက်ဝှမ် သဵုယှေဝ်မဳဒဳယျာတံ နကဵုၚုဟ်ဂၠိုၚ်ကဵုဆတံဂှ်ရောၚ် သ္ဂးရ။
ဟိုတ်နူညးသွံတြးအောန်လာၚ်သာ်ဏံတံတုဲ ဗွဝ်ဖျာအဖ်လာၚ် မၞုံပ္ဍဲအေန်ဒိုဝ်နဳယှာတံဝွံ ဒးဒုၚ်ဘပဠဒၟံၚ်ရောၚ်ဂှ်လေဝ် ဝန်ဇၞော်လ္ၚဵုတံ ဟီုဂးကၠုၚ်ဒၟံၚ် ဂၠိုၚ်ၚ်ကဵုဝါရ။
“ပိုယ်တံ သ္ဂုတ်သွာတ်ထောံ သွက်ဂွံရပ်စပ် သဵုယှေဝ်မဳဒဳယာ သွက်ပရေၚ်ကူသာန်သွံရာန်အောန်လာၚ်ဂှ်ဏောၚ် စွံထောံရ၊ တ္ၚဲယးဂတးတေံ စေဝ်ပၞောန်တၟိ မံက်တိတ်ကၠုၚ်မာန်ဏောၚ်” သာ်ဝွံ သမ္မတဂျိုဝ်ကိုဝ်ဝဳ ဟီုဂးလဝ် ပ္ဍဲကဵုဂလာန် မဗလးပ္တိတ်လဝ်တိုက်ရိုက် ပ္ဍဲဂိတုသေပ်တေမ်ဗာ ၂၅ တေံဂှ်ရ။
“မၞိဟ်ဂမၠိုၚ် စၟဳဒၟံၚ်ဂှ်တှ်ေ ပရေၚ်တောတက်နဲပညာဂှ်ဝွံ ပရေၚ်ပိုန်ဒြပ်နွံဒၟံၚ်ရရတံဂှ် ဟွံကဵုကၠေံအာမွဲသာ် သွက်ဂွံဖန်ဗဒှ်ကဵု ပရေၚ်ပိုန်ဒြပ်တၟိတၟိတံ မဒှ်ရ” သာ်ဝွံ ညးဆက်ဟီုလဝ်ရ။
ပ္ဍဲကဵုဂလာန်ဟီုမြော်လဝ်ဂှ် ဂျိုဝ်ကိုဝ်ဝဳဂှ် တၚ်နၚ်လစှ်ေ စပ်ကဵု ကမ္ပဏဳဂကူလဵု၊ စေဝ်ပၞောန်သာ်လဵုတံဂှ် ထ္မံက်ပ္တိတ်ဟီုဂးဏာလဝ် ဟွံမွဲရ။
Ref: CNA
sanlontai