မဂွေ၊ သေပ်တေမ်ဗာ (၂၇)
ရးဒေသဇၞော်မဂွေ၊ ပွိုၚ်ဍုၚ်မေန်လှသ္ကုတ်လ္တူ၊ ဗဒိုပ်ဗၠာဲသၟိၚ်တိဍာ်ကံၚ်ဇြဳပၞာန် မၞုံကွာန်လေတ်ပတခါဂှ် တ္ၚဲဏံ ပ္ဍဲဂိတုသေပ်တေမ်ဗာ စၟတ်တ္ၚဲ (၂၆) အခိၚ်နူဂယးပြဟ် လုပ်က္ဍိုက်ဗတိုက်လဝ်ရဂှ် ဂွံတီကေတ်နူဇရေၚ်ဒပ်စဵုဒၞာဒေသတအ်ရ။
ဗဒိုပ်ဗၠာဲသၟိၚ်လေတ်ပတခါ ဒပ်ကံၚ်ဇြဳပၞာန် သီုကောန်ဒပ်ဗၠာဲသၟိၚ်တအ် ဗ္ဒာဲ (၃၀)တၠ ဖျေံလဝ်ဗဒိုပ် မံၚ်တန်တဴဒၟံၚ်ဂှ် ဒပ်ပံၚ်ကောံဒပ်စဵုဒၞာဒေသတအ် လုပ်စိုပ်က္ဍိုက်ဗတိုက်လဝ်ရ။
နူကဵုအခိၚ် ၜိုတ် (၁)နာဍဳကဝက် နူဂယး စဵုကဵု (၂) နာဍဳ (၁၅) မိနေတ် ပေါဲဗတိုက်ဒှ်လဝ် လအ်ပွိုၚ် (၄၅) မိနေတ်ဂှ် ပ္ဍဲကဵုပရေၚ်က္ဍိုက်ဗတိုက်လဝ်ဏံ လ္ပာ်ကံၚ်ဇြဳပၞာန် ဒးချိုတ်လဝ် (၅)တၠတုဲ လ္ပာ်ဂကောံဇြဟတ်ပၠန်ဂတးတအ် ဇီုကပိုက်ဒးဟၟဲမွဲသာ် ကလေၚ်ဆုတ်တိတ်မာန်လဝ်ရ။
“လုပ်ဗတိုက်လဝ် ဒဵုကဵုပ္ဍဲဗဒိုပ်မာန်လဝ်ရ။ ဒဵုသီကေတ်ဗဒိုပ်ဏောၚ် ၜိုန်ရန်လဝ်လေဝ် ဟိုတ်နူတန်ဍိုန်လျ ပ္ဍဲဗလးမုက်တိနွံတုဲ ကလေၚ်ဆုတ်တိတ်လဝ်ရ” ဂှ် ဂအုပ်က္ဍိုက်က္ဍိုပ်ပၞာန် PRA Magway ဟာကျူလဳ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရေၚ်က္ဍိုက်ဗတိုက်လဝ် ဗဒိုပ်ဗၠာဲသၟိၚ်ဂှ် ဂကောံဇြဟတ်မဟာမိတ် ပၠန်ဂတးညးဍုၚ်ကွာန် (PRA Magway) ၊ ပကဖမေန်လှ လ္တူ၊ ဒပ်ပၞာန်စဵုဒၞာညးဍုၚ်ကွာန် ရးမဂွေ သ္ကုတ်သၠုၚ်ကျာ (ပကဖမဂွေ)၊ ဒပ်စဵုဒၞာအယှိုဝ်ချေၚ် (ACDF) ကေုာံ ဒပ်ဒမၠုက် Key Of Revolution တအ် ပံၚ်တောဲဗတိုက်လဝ်ရ။
နကဵုဒပ်မဟာမိတ်တအ်ဂှ် သွက်ပရေၚ်ရိုဟ်ကၞက်တၠအဝဵုပၞာန် ဂွံပိုတ်သ္ကုတ်ကီု သီုသွက်ပရေၚ်ဗၠးၜး ရးဒေသမဂွေ လ္ပာ်သ္ကုတ်ပလိုတ် ၜဳဨရာဝတဳဂှ် သၠုၚ်ပ္တိုန်ပရေၚ်ပၞာန် ဗတိုက်အာ ဗွဲမညဳသၟဟ်ရောၚ်ဂှ် ဒပ်ပံၚ်ကောံတအ် လလောၚ်တြးလဝ်ပရိုၚ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – PRA Magway (ဗီု – ကောန်ဒပ် PRA Magway ပါလုပ်ဒၟံၚ် ပ္ဍဲဒပ်မဟာမိတ်ပံၚ်ကောံ ဃောလုပ်ကၠုၚ်ဒၟံၚ် ဗဒိုပ်ဌာန်ဂအုပ်)
sanlontai