ဍာ်ဗု၊ သေပ်တေမ်ဗာ(၂၇)
ရးဒေသတၞၚ်သြဳ၊ ပွိုၚ်ဍုၚ်ဍာ်ဗု၊ ပ္ဍဲကဵုဂၠံၚ်လုပ်ဒေသကာန်ပေါက်ဂှ် သ္ပတံနူဂိတုသေပ်တေမ်ဗာ စၟတ်တ္ၚဲ ၂၆ အခိၚ်နူဂယးဂှ် ဟိုတ်နူဒပ်ကံၚ်ဇြဳပၞာန် ကၟာတ်ဒၞာလဝ် အခေါၚ်တတ်ကၠောံအာကၠုၚ်တုဲ ဒးဆဵုဂဗဒၟံၚ်ကဵု အခက်ခုဲပရေၚ်အာကၠုၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၂၅) အခိၚ်ဗ္တံဂှ် ကြဴနူသၞေဟ်ကၚ်စၟဳစၟတ်ကံၚ်ဇြဳပၞာန် မၞုံပ္ဍဲဂကောံကွာန်ကာန်ပေါက် လၟိဟ်မၞိဟ်မွဲလက်ပြၚ် အတိုၚ်စရၚ်သ္ဂာဗ္တံ သၞာံ ၂၀၁၄ မၞုံတန်တဴဒၟံၚ်ဂှ် ဒးဒုၚ်ဗတိုက်လဝ်တုဲ လ္ပာ်ကံဇြဳပၞာန် ကၟာတ်လဝ်ဂၠံၚ်လ္ပာ်လုပ်ရ။
ဒပ်ကံၚ်ဇြဳပၞာန်ဂှ် သ္ပတံနူကဵုတ္ၚဲဏံ အခိၚ်နူဂယးတေံတုဲ ကၟာတ်လဝ် ဂၠံၚ်လုပ်ဒေသကာန်ပေါက်တုဲ ညးတတ်ကၠောံအာကၠုၚ် ဇရေၚ်ဒေသတၞဟ်သ္အာၚ်တအ်ဂှ်လေဝ် ပိုၚ်ခြာလဝ် အခေါၚ်တတ်ကၠောံအာကၠုၚ်ရ။
ဟိုတ်နူလ္ပာ်ကံၚ်ဇြဳပၞာန် ကၟာတ်လဝ်ဂၠံၚ်တုဲ ပါဲနူညးအာသွံဖျာပ္ဍဲဒေသတၞဟ် ပါလုပ်သီုပ္ဍဲဒေသဍာ်ဗု ကေုာံညးအာတရဴတအ်တုဲ သွက်ညးအာလွဳယဲ ဟိုတ်နူပြဿနာပရေၚ်ထတ်ယိုတ်တအ် စိုပ်ဒၟံၚ်ဒဒိုက်ညးသ္ကအ်ရဂှ် ဂွံတီကေတ် အတိုၚ်ညးဒေသတအ်ဟီုလဝ်ရ။
ညးဒေသတအ်ဂှ်မ္ဂး ယဝ်ရကၟာတ်လဝ် ဂၠံၚ်လုပ်ကာန်ပေါက် အခိၚ်လအ်လကၠုၚ်မ္ဂး ပရေၚ်စသုၚ်မံၚ်စံၚ်ဂကောံသ္ၚိကၟိန်တအ်လေဝ် ဟိုတ်နူဇီုကပိုက် ဒးကၠုၚ်မာန်ဒၟံၚ်ဂှ်ရ ပရေၚ်ဒှ်ဓဝိၚ် ဂွိၚ်စံၚ်တူ ဂၠိုၚ်တိုန်ဒၟံၚ်ရ။
ဒပ်ကံၚ်ဇြဳပၞာန် ဒးဒုၚ်ဗတိုက်လဝ်သၞေဟ်ကၚ်စၟဳစၟတ်ဂှ် ထပ်ဗပေၚ်လဝ် ဇြဟတ်ဒပ် ဗ္ဒာဲ (၃၀) တုဲ ပတေၚ်ဂြတ်လဝ် ပရေၚ်ဂီုကၠီု ဗွဲတၟေၚ်ရ။
ဒေသကာန်ပေါက်ဂှ် ကြဴနူဒပ်ပၞာန်သီအဝဵုတုဲ ဒှ်ဒေသထ္ၜးဆန္ဒဟွံပ္ကီုပရာပ် ၜိုဟ်ဟ်သြိုဟ်ဟ် ဇြဟတ်ခိုဟ်ဒၟံၚ် မွဲဒေသတုဲ ပ္ဍဲမွဲကာလဒပ်ပၞာန်သီအဝဵုဏံ ညးဒေသဂၠိုၚ်ကဵုကၠံ ဒးဒုၚ်ရပ်ဒက်လဝ်ရဂှ် ဂွံတီကေတ် နူညးဒေသတအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် -CJ
sanlontai