ဘာဗ္တောန်လိက်ကံၚ်ဇြဳပၞာန် ဂၠိုၚ်ကဵုကၠံ လုပ်စိုပ်ကၠုၚ် ဇရေၚ်သၟဝ် ပရေၚ်အုပ်ဓုပ် KNU

ကအ်ကြိက်၊ သေပ်တေမ်ဗာ (၂၈)

ကြဴနူဒပ်ပၞာန်သီအဝဵုတုဲ ဘာဗ္တောန်လိက်ကံၚ်ဇြဳပၞာန် မၞုံပ္ဍဲတိဍာ်ဗော်သွးကောန်ဂကူကရေၚ် KNU အပံၚ်လၟိဟ် ၃၇၀ ဘာပြၚ်တအ်ဂှ် လုပ်စိုပ်ဒၟံၚ် သၟဝ်ပရေၚ်အုပ်ဓုပ်စဳမာန် ဌာနပရေၚ်ပညာ KNU ရဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် ဇာနှိက်အထံက်အရီုပရေၚ်ၜိုဟ်လလံကရေၚ် KPSN ရ။

KPSN ဂှ် လလောၚ်တြးပ္တိတ်လဝ်လိက်စံၚ်မ္ဂး “အပြံၚ်သၠာဲ သၠဒကေဝ်အလိုန်လပှ်အဝဵုအာဏာ ပ္ဍဲသ္ကုတ်ဒိုဟ်အဂၞဲကၟိန်ဍုၚ်ဗၟာ ပရေၚ်ထိၚ်ဒဝ်အုပ်ဓုပ်ပၞာန် ဍန်ဂြက်စှ်ေကၠုၚ်” ပ္ဍဲကဵုဂိတုသေပ်တေမ်ဗာ စၟတ်တ္ၚဲ (၂၆)ဂှ်ရ။

ပ္ဍဲကဵုလိက်ဒုၚ်စဳရေၚ်ဂှ် ကြဴနူဒပ်ပၞာန်သီအဝဵု ဂိတုဖေဖဝ်ဝါရဳ သၞာံ ၂၀၂၁ တုဲ သ္ကုတ်လကြဴဏံ ပ္ဍဲကဵုသ္ကုတ်ဒိုဟ်အဂၞဲကၟိန်ဍုၚ်ဗၟာဂှ် အစောန်စရာဲထိၚ်ဒဝ် ပရေၚ်ပၞာန် ကေုာံပရေၚ်အုပ်ဓုပ်ကံၚ်ဇြဳပၞာန် အေဲဇြစှ်ေကၠုၚ်ဒၟံၚ်ရဂှ် ဓမံက်ထ္ၜးလဝ်ရ။

နကဵုကံၚ်ဇြဳပၞာန်လေဝ် ပရေၚ်ထိၚ်ဒဝ်လဝ် လ္တူဘာဗ္တောန်လိက် သၟဝ်တဲဍေံတအ် အပံၚ်လၟိဟ် ၃၇၀ ဘာ ဒးဗလးတဲ ဆောံလေၚ်လဝ်တုဲ အခိၚ်လၟုဟ်ဏံမ္ဂး လုပ်နွံဒၟံၚ် သၟဝ်အုပ်ဓုပ်ဌာနပရေၚ်ပညာ KNU ရဂှ် ဓမံက်ထ္ၜးပါလုပ်ဒၟံၚ်ရ။

ပ္ဍဲသၞာံဗ္တောန်ပညာ သၞာံ ၂၀၁၉ -၂၀၂၀ တုဲကၠုၚ်တေံဂှ် လၟိဟ်ဘာဗ္တောန်လိက် KECD ဌာနပရေၚ်ပညာ ကေုာံ ပရေၚ်ယေန်သၞာၚ်ကရေၚ် မၞုံသၟဝ်တဲ KNU ဂှ် ၃၈၂ ဘာဟေၚ် နူကဵုမၞုံဒၟံၚ်ဂှ် ကြဴနူဒပ်ပၞာန်သီအဝဵုတုဲ သ္ကုတ်လကြဴ စဵုကဵု သၞာံ ၂၀၂၃ ဏံဂှ် လၟိဟ်ဘာဗ္တောန်လိက် KECD ဂၠိုၚ်တိုန်ကၠုၚ်ဒၟံၚ် ဗ္ဒာဲ ၃ ဂအုံတုဲ အပံၚ်လၟိဟ်ဘာ စဵုကဵု (၉၀၀) ဘာ နွံကၠုၚ်ရဂှ် ဓမံက်ထ္ၜးလဝ်ရ။

လၟိဟ်ဘာဗ္တောန်လိက် KNU ဂၠိုၚ်တိုန်ကၠုၚ်ဒၟံၚ်ဇၞော်ကဵုဇြဟတ် ကေုာံလၟိဟ်ဘာဗ္တောန်လိက် သၟဝ်တဲကံၚ်ဇြဳပၞာန် ခရိုဟ်လီုအောန်ယအ်စှ်ေဒၟံၚ်တအ်ဂှ် သ္ပတံနူဒပ်ပၞာန်သီအဝဵုတုဲ ပရေၚ် KNU ထိၚ်ဒဝ်တိဍာ်မာန်သၠဲလးကၠုၚ်ဒၟံၚ်ရဂှ် သ္ပပြာကတ်ပျးထ္ၜးဒၟံၚ်တိုက်ရိုက်ရဂှ် KPSN ဟီုလဝ်ရ။

ဗဒိုပ်ကံၚ်ဇြဳပၞာန် ဒးဆောံလေၚ်ကၠုၚ်လဝ် ဗွဲမဂၠိုၚ်ကီု၊ မွဲကရောံကဵု ပရေၚ်ထိၚ်ဒဝ် နူနေပျဳဒဝ်အောန်ယအ်စှ်ေကၠုၚ်ဂှ် ဘာဗ္တောန်လိက် သၟဝ်တဲကံၚ်ဇြဳပၞာန် ဗွဲမဂၠိုၚ်တအ်ဂှ် စိုပ်ကၠုၚ်သၟဝ်ပရေၚ်အုပ်ဓုပ် KNU တုဲ အခိၚ်လၟုဟ်ဏံမ္ဂး နဒဒှ်ဘာ KECD ဂေတ်အာဒၟံၚ်ဖိုဟ်ရဂှ် ဟီုလဝ်ရ။

သ္အာၚ်နူဂှ်ပၠန် အ္စာဘာသၟဝ်ဌာနပရေၚ်ပညာကံၚ်ဇြဳပၞာန် ဗွဲမဂၠိုၚ်တအ်ဂှ် ပါလုပ်ပံၚ်တောဲကၠုၚ် ပ္ဍဲပရေၚ်ချဳဒရာၚ် CDM တုဲ ပြံၚ်ကၠောန်ၜိုတ်ကၠုၚ် ပ္ဍဲဘာ KECD တအ်တုဲ ဘာပုဂ္ဂလိက ကေုာံဘာညးဍုၚ်ကွာန် ဗွဲမဂၠိုၚ်တအ်ဂှ်လေဝ် စိုပ်ကၠုၚ်ဒၟံၚ်သၟဝ်တဲ KNU ရဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် KPSN ရ။

မွဲအခိၚ်ဓဝ်ဂှ် ဟိုတ်နူကံၚ်ဇြဳပၞာန် သၠုၚ်ပ္တိုန်အသိၚ်ပရေၚ်ဗတိုက်ပန်ကဵုလွဟ်ဇၞော် သီုကဵုက္ၜၚ်ကျာ ပ္ဍဲကဵုကွာန်ဂမၠိုၚ်တုဲ သွက်ကောန်ၚာ်စိုပ်ကၠုၚ် သွက်ဂွံဇူဗ္ဒာဲတအ်ဂှ် ဒးပံက်ကဵုလဝ် ဘာဗ္တောန်လိက် KECD ပ္ဍဲဒၞာဲလ္ၚဵုတၟိတအ်ရဂှ် ဓမံက်ထ္ၜးလဝ် နွံရ။

ပ္ဍဲတိဍာ်ကဝ်ဒူလေဝ် KNU ဂှ် သွက်ဘာဗ္တောန်လိက် လၟိဟ်ဂၠိုၚ်တိုန်ကၠုၚ်ဒၟံၚ်တအ်ဂှ် စရိတ်သွက်မွဲသတ္တာဟသၟးဟေၚ်ဟွံသေၚ် ဟိုတ်နူပရေၚ်ကံၚ်ဇြဳပၞာန် ဗတိုက်ပန်လဝ်ကဵုက္ၜၚ်ကျာတုဲ သွက်ဂွံကလေၚ်ပလေဝ်ပလေတ် ဘာဗ္တောန်လိက် ဒးခရိုဟ်လီုလာ်လဝ်တအ်မာန်ဂှ်လေဝ် KECD ဌာနပရေၚ်ပညာ KNU ကေုာံ ဂကောံညးတၠုၚ်ကေၚ်ကာ အ္စာဘာကရေၚ်တအ် ဂၠာဲကဵုဒၟံၚ်အရီုဗၚ် ကၟိန်ဍုၚ်နာနာဖိုဟ်ရဂှ် ကဵုလဝ်သမ္တီရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ