ၜိုန်ရပရေၚ်ဘပဠ ကိုဝ်ရဳယျာသၟဝ်ကျာတံ နွံဒၟံၚ်ကီုလေဝ် အပ္ဍဲသဵုလ်ဂှ် ကၠောန်ဗဒှ်လဝ် အသေအဟာန်ပၠဒပ်ဇၞော်ဇၞော်

သဵုလ်၊ သေပ်တေမ်ဗာ (၂၇)

သွက်ဂွံဒစဵုဒစး ပရေၚ်ဘပဠ ကိုဝ်ရဳယျာသၟဝ်ကျာတံဂှ်တုဲ ပ္ဍဲဂိတုသေပ်တေမ်ဗာ (၂၆) တေံ ကၠောန်ဗဒှ်လဝ် ပေါဲပၠဒပ်ဇၞော်ဇၞော် ပါလုပ်သီုကဵု လွဟ်ကမ်လှောဝ်ထိၚ်သၞေဝ်တံရ။

သ္ဘၚ်ပၠဒပ် မထ္ၜးပျးလဝ် နကဵုတၚ်ရန်တၟံ သ္ဂောံပန်ဖျေံ က္ၜၚ်ကျာသၞေၚ်ဝဲ မတတ်ကၠုၚ်သဵု(လ်) ဂှ်ဝွံ အပ္ဍဲပွိုၚ်စှ်သၞာံဏံ ဒှ်လဝ်ဇၞော်အိုတ်ကဵု ကိုပ်ကၠာအိုတ်ရ။

ပ္ဍဲကဵုအသေအဟာန် မကၠောန်ဗဒှ်လဝ် ပ္ဍဲကဵုသဵု(လ်) ပွိုၚ်မွဲတ္ၚဲဂှ် ကရောံကောန်ဂကောံဒပ် ဂၠိုၚ်ကဵုလ္ၚီဂှ် ကွဳစၚ်ခြပ်ပသဲ ပ္တိတ်နူအပ္ဍဲဍုၚ် ကိုဝ်ရဳယျာသၠုၚ်ကျာတံ၊ ယာန်အမၠံက် မသက္ကုမၞိဟ်ဒဳတံသၟးဟွံက ဒဒှ်ရကောန်ပၞာန်အမေရိကာန် ဖျေံသ္ဇိုၚ်ကိုဝ်ရဳယျာသၠုၚ်ကျာတံ ဗ္ဒါဲ ၂၈၅၀၀ ပါလုပ်လဝ်ဂှ် ဌာနဝန်ဇၞော်ကာစဵုဒၞါ ဟီုဂးလဝ်ရ။

ပေါဲပၠဒပ်ဏံဂှ်ဝွံ တတ်အာလဝ် အရာပ်ဂြိုဟ်ဒတန်ပရေၚ်ပိုန်ဒြပ် ဍုၚ်သဵု(လ်) ဂှ် အဓိကတုဲ ဒှ်အာလဝ် ပေါဲဇက်ဂၠေါဲ မၞုံကဵုဇမ္ၚောဲ ၂ ကဳလောမဳတာ စဵုကဵုဒၞါဲပါၚ်တြၚ်နန် ဂေါန်ဟွာမန် မၞုံလဒေါဝ်ဍုၚ်သဵု(လ်) ဂှ်မွဲရ။

ပေါဲပၠန်ဒပ် လ္တူဍုၚ်ကိုဝ်ရဳယျာသၠုၚ်ကျာဂှ် ကၠောန်ဗဒှ်လဝ် ပ္ဍဲသၞာံ ၂၀၁၃ တေံ အလန်လက္ကရဴအိုတ်ရ။

သမ္မတကိုဝ်ရဳယျာသၠုၚ်ကျာ ယောန်သက်ယောဂှ် လစွံစိုတ် လ္တူကိုဝ်ရဳယျာသၟဝ်ကျာဂှ် ကြံၚ်မ္ၚိုဟ်ဒၟံၚ်တုဲ သွက်ဂွံကလေၚ်ခၠေဝ် ကုအစဳဇန်ကမ်လှောဝ် ကေုာံ နျူကလဳယျာကိုဝ်ရဳယျာသၟဝ်ကျာ မတောတက်ပြံၚ်လှာဲဒၟံၚ်တံဂှ်တုဲ ပလေဝ်ပလေတ်ဒၟံၚ် ပရေၚ်ကတ်လ္ၚတ်ပရေၚ်ပၞာန် ကေုာံ လွဟ်လက်နက်တံရ။

သမ္မတကိုဝ်ရဳယျာသၠုၚ်ကျာ ယောန်ဂှ်ဝွံ ကဵုလဝ်ကတိ သွက်ဂွံကလေၚ်ခၠေဝ်ပၠန် ကုပရေၚ်ဂၠါဲသၞ ပျုၚ်ယာန် ဇၞော်ဇၞော်ဂှ်တုဲ စနူသၞာံတုဲတေံ ညးဂွံအဝဵုတုဲဂှ် သွက်ဂွံဒက်မဟာမိတ်ပရေၚ်ပၞာန် ကုဝါယှေန်တာန်၊ တိုဝ်ကျိုဝ်တံဂှ် ကၠောန်ကၠုၚ်လဝ် ကတိုၚ်ၚ်ကၟဟ်ဟ်ရ။

ပေါဲပၠဒပ် ပ္ဍဲဂိတုသေပ်တေမ်ဗာ ၂၆ ဂှ် စလဝ် နူကဵုဗ္ဒိုပ်ဒပ်ကျာ သံၚ်နာမ် မၞုံမ္ၚးဍုၚ်သဵုလ်ဂှ်တုဲ ပ္တိတ်ထ္ၜးပျးလဝ် ကမ်လှောဝ် Hyunmoo တံ၊ ဒပ်တတ်ကၠောံ ကမ်လှောဝ်L-SAM တံ၊ က္ၜၚ်ကျာသၞေၚ်ဝဲ F-35 တံ ကေုာံ က္ၜၚ်ကျာဗ္တိုက် ပ္တိတ်နူအပ္ဍဲဍုၚ် ကိုဝ်ရဳယျာသၠုၚ်ကျာ အလန်ကိုပ်ကၠာအိုတ် KF-21 တံမဒှ်ရ။

အသေအဟာန် ပၠဒပ်ဏံဂှ်ဝွံ ကြဴနူလၟေၚ်တရဴရုယှာ က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အောန် မတုပ်လဝ်စိုတ် ကုသမ္မတရုယှာ ဗလာဒဳမာပူတေန် သွက်ဂွံသၠုၚ်ပ္တိုန် ပရေၚ်ရေၚ်တၠုၚ်ပံၚ်တောဲပရေၚ်ပၞာန် ဂွံမွဲသတ္တာဟတုဲဂှ် မံက်တိတ်ကၠုၚ်လဝ်ရ။

သွက်ပေါဲပၞာန်ယူကရုၚ်ဂှ် နကဵုကိုဝ်ရဳယျာသၟဝ်ကျာ ယဝ်ရသၠုၚ်ပ္တိုန်အသိၚ်ရီုဗၚ်ကဵု ရုယှာ လွဟ်လက်နက်တံဂှ်မ္ဂး အရာဏံဝွံ ဒှ်ကၠုၚ်ပရေၚ်ဂၠါဲသၞတိုက်ရိုက်မွဲရောၚ် သမ္မတကိုဝ်ရဳယျာသၠုၚ်ကျာ ယောန်သက်ယော ဟီုဂးကၠုၚ်ရ။

Ref: Reuters/Ik