သဓီု၊ သေပ်တေမ်ဗာ(၂၈)
တွဵုရးဍုၚ်မန် ပ္ဍဲအရာပ်မၞုံလ္တူဍုၚ်သဓီု ကေုာံဒၞာဲညးဍုၚ်ကွာန်တအ် အာကၠုၚ်ဒၟံၚ်တအ်ဂှ် ပ္ဍဲကာလကြဴလၟုဟ်ဏံ ဒက်ဂကောံ ပၠံၚ်ၜးကၠတ်ဂၠံက်တုဲ ဟိုတ်နူသီုဂၠာဲကၠုၚ်အန္တရာယ်လမျီုတုဲ ပရေၚ်ဒးဒှ်ဓဝိၚ်တအ် သၠုၚ်ဂၠိုၚ်တိုန်ကၠုၚ်ဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးဒက်ဂကောံပၠံၚ်ၜးကၠတ်ဂၠံက်တအ်ဂှ် အခိၚ်ဗ္တံ အခိၚ်ဇိုၚ်မၞိဟ်သ္ၚိတ်ဇြသၟးဟေၚ် ဟွံသေၚ် ပ္ဍဲအခိၚ်နူဂယးကဵု အခိၚ်ဒေါဝ်တ္ၚဲလေဝ် ပၠံၚ်ၜးကေတ်ဒၟံၚ် မံက်က်ထေၚ်ၚ် နွံကၠုၚ်တုဲ စဵုကဵုပရေၚ်ပရော သ္ပကၠုၚ်အန္တရာယ်လမျီု ကုညးတၠဂြပ်တအ် နွံကၠုၚ်ဒၟံၚ်ရ။
“မွဲအံၚ်ဏံ အကာဲအရာပရေံကၠုၚ် ကွေံကွေံရ၊ တုဲကၠုၚ်မွဲၜါတ္ၚဲတေံဂှ်တှ်ေ မၞိဟ်အဲတီမွဲ ဃောရာန်ဒၟံၚ်ဖျာ ကလေၚ်ဂတးရံၚ်ဂှ် မၞိဟ်တြုံမွဲတၠ ဒဳဓရိပ်ကေတ်ဏာ ကွဳလိုန်ဓာတ်ညးတေံရ။ အေဂှ် ညးဗက်ဗဒေါံ၊ စိုပ်အာဒၞာဲမၞိဟ်ပိုတ်ဂှ်တှ်ေ မၞိဟ်မသုန်တြဴတၠ စိုပ်ကၠုၚ်ကဵုကွဳလိုန်ဓာတ်တုဲ ဒၟာနူသ္ပကၠုၚ်သၞတုဲ ဒးဂြိပ်လဝ် ညံၚ်ဇကုဂွံဗၠးရ။ ဒဵုကဆံၚ်ဏံ အကာဲအရာပရေံဒၟံၚ်ရ”ဂှ် ညးဒေသမွဲတၠ ဟီုလဝ်ရ။
ညးဒက်ဂကောံပၠံၚ်ၜးဒၟံၚ်တအ်ဂှ် ပ္ဍဲကဵုဂၠံၚ်တိုန်ဒဵုမျတပုက်ကီု၊ သၞေဟ်က္ၜၚ်ကျာတြေံကီု၊ ပါဝါသေဝ်ကီု၊ လ္တူဂၠံၚ်သဓီုပံၚ်ကီု ဆက်က္လိလောန်ဒၟံၚ် ဂဗုတ်ဒက်ဂကောံ ပၠံၚ်ၜးကၠတ်ဂၠံက် အဆက်က်ရ။
သ္အာၚ်နူဂှ်ပၠန် အကြာဗွဳပွူဖျာလ္တူဍုၚ်ကီု သီုကဵုဒၞာဲအရာပ် လ္တူဍုၚ်တအ်ဂှ် ပရေၚ်ပၠံၚ်ၜးကေတ်ဒၟံၚ် ဖုၚ်၊ ထိုၚ်စၞာံ၊ ကွဳလိုန်ဓာတ် သီုထဝ်တအ် ကြပ်ဒှ်ဒၟံၚ် အရိုဟ်ရိုဟ်တ္ၚဲရ။
“တ္ၚဲကၠာတေံဂှ်တှ်ေ ပ္ဍဲအရာပ်တုၚ်ကုမ်ဂှ် နူကဵုပ္ဍဲကၠအ် ကမၠတ်တအ်ကဵုသ္ကအ် ထ္ၜၚ်ပ္တိတ်ဏာကွဳလိုန်ဓာတ်သၠာပိ စိုပ်မံၚ်မ္ၚးကၠအ်ယျ ဒၟာနူမၞိဟ်ပ္ဍဲအရာပ်တအ် က္ညာၚ်ကရေဲတိုန်တုဲ ဂြိပ်အာအိုတ်ရ”ဂှ် ညးဒေသမွဲတၠဂှ် ဟီုရ။
ညးကၠတ်ဂၠံက်ပၠံၚ်ၜးဒၟံၚ်တအ်ဂှ် ပါဲနူကဵုကၠောန်သ္ပညးမွဲမွဲတၠဂှ် ဒက်ဂကောံကၠောန်ဒၟံၚ်တုဲ ပ္ဍဲကဵုဍေံတအ် ၜုန်၊ သကေဗာ သီုကဵုလေံဒုက် လွဟ်လက်နက်က္တဵုဗဒှ်ကဵုအန္တရာယ်လမျီု မပ္တံဗီုဏံတအ်လေဝ် ရပ်လဝ်ညးသ္ကအ်ရဂှ် ညးဒေသတအ်ဟီုလဴလဝ်ရ။
ဟိုတ်နူပရေၚ်ကၠတ်ဂၠံက်ပၠံၚ်ၜးတုဲ ညးဍုၚ်ကွာန်ကောန်ဒေသ ဒးဒုၚ်ဆောံလေၚ်လဝ် ကပေါတ်ကညောတ်တအ်ဂှ် ၜိုန်ရအာတေၚ်စိုပ်လဝ် ဇရေၚ်ဗဒိုပ်ဗၠာဲသၟိၚ်တအ်ကီုလေဝ် ပရေၚ်ရေၚ်တၠုၚ်ကေတ်ကဵုလဝ်အရေဝ် ဒဵုကဵုဟၟဲ အောန်ဒၟံၚ်ရ။
တွဵုရးဍုၚ်မန်ဂှ် ပ္ဍဲမွဲကာလဒပ်ပၞာန်သီအဝဵုဏံ ဟိုတ်နူပရေၚ်အုပ်ဓုပ်ထိၚ်ဒဝ် သၞောဝ်ဥပဒေဇြဟတ်ဍိုန်စှ်ေကၠုၚ်တုဲ ဒၞာဲဒေသဗွဲမဂၠိုၚ်ဂှ် ဒက်ဂကောံပၠံၚ်ၜးကီု၊ ပါဲနူပၠံၚ်ၜးကေတ်ကပေါတ်တုဲ သီုပြိုက်ဂစိုတ်ဏာမၞိဟ်တုဲ အရိုဟ်ရိုဟ်တ္ၚဲ ဂဗုတ်ပၠံၚ်ၜးကၠတ်ဂၠံက်တအ် ဂၠိုၚ်တိုန်ကၠုၚ်ဒၟံၚ်ရဂှ် ဂွံတီကေတ် အတိုၚ်တၚ်ညးဒေသတအ် ဟီုထ္ၜးလဝ်ရ။
ဂဗုတ်ကၠတ်ဂၠံက်ပၠံၚ်ၜးတအ် ဟိုတ်နူဂၠိုၚ်ကၠုၚ်တုဲ ပ္ဍဲကဵုဒေသလ္ၚဵုဂှ် ညးဍုၚ်ကွာန်တအ် နကဵုအစဳဇန်ဇကုကဵုဇကု ဒးမၚ်ဒၟံၚ်ကၚ်ဘဲသၞကမၠတ် ပ္ဍဲအခိၚ်ဗ္တံရ။
ပရိုၚ် – သြၚ်လောန်တိုၚ်(မ်)
ဗီုရုပ် -TLT
sanlontai