ဗ္ဒိုပ် PDF ဍာ်ဗုမွဲ ဒးဒုၚ်လုပ်ဍိုက်ဗ္တိုက်

ဍာ်ဗု၊ သေပ်တေမ်ဗာ (၂၈)

ပ္ဍဲဂိတုသေပ်တေမ်ဗာ (၂၆) ပယျာံနူဂယး ဗ္ဒိုပ် PDF ဂကောံဒပ်စဵုဒၞါညးဍုၚ်ကွာန်မွဲ မၞုံဗ္ဒါဲကွာန်ဝဇြောန်တဝ်၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳဂှ် ဒးဒုၚ်လုပ်ဍိုက်ဗ္တိုက်လဝ်ရောၚ် ညးမစုက်လုက်ကဵု PDF တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲကဵုတ္ၚဲဂှ် အခိၚ်နူဂယး ၜိုတ် (၁၀) နာဍဳဂှ် ဒပ်ကံၚ်ဇြဳပၞာန်ဝွံ လုပ်စိုပ်ဍိုက်ဗ္တိုက်လဝ် ဗ္ဒိုပ်ဇြေန်ယဝ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗု မၞုံဗ္ဒါဲကွာန် ဝဇြောန်တဝ်ဂှ်ရ။

အတိုၚ်ဂလာန် ညးမစုက်လုက်ကဵု PDF တံဂှ်မ္ဂး ကောန်ဂကောံဒပ် PDF တံ ဂွံပရိုၚ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ သွက်ဂွံဗ္တိုက် အခိၚ်မအာမၚ်ဒၟံၚ် ပ္ဍဲကဵုဂၠံၚ်ဂှ် ဒပ်ကံၚ်ဇြဳပၞာန်ဂှ် ဂတးဂၠံၚ်တုဲ လုပ်စိုပ်ကၠုၚ် အပ္ဍဲကဵုဗ္ဒိုပ်ရောၚ် သ္ဂးရ။

ဒပ်ကံၚ်ဇြဳပၞာန် ဟိုတ်နူလုပ်စိုပ်ကၠုၚ် အပ္ဍဲဗ္ဒိုပ် နကဵုဇြဟတ်ဗွဲမဂၠိုၚ်ဂၠေၚ်ဂှ်ရ ကောန်သ္ဂံၚ်မသှ်ေဒၟံၚ်တံဂှ် ဟွံဗ္တိုက်မွဲသာ် ဟိုတ်နူဗလးထောံဗ္ဒိုပ်ဂှ်ရ ပေါဲဗ္တိုက်ဆေၚ်မုက်ဂှ် က္တဵုဒှ်လဝ် ဟွံမွဲရ။

ဟိုတ်နူဒးဒုၚ်လုပ်ဍိုက်ဗ္တိုက်လဝ် ဗ္ဒိုပ်ဂှ်ရ သေနာတ်တဲ သှ်ေဒၟံၚ်ပ္ဍဲကဵုဗ္ဒိုပ်ဂှ်ကီု၊ ကမ်လှောဝ် (ရှော့တိုက်) ၊ ဖျေဲလွဟ်၊ စက်ဟီုအရေဝ်၊ မာၚ်၊ ဇွောံမစၞစ၊ ကပေါတ်ဂဥုဲ ကေုာံ ယူနဳဝှမ်တံ ဒးဒုၚ်သီဂိုၚ်လဝ်ရ။

ကရောၚ်ပၞာန် ကံၚ်ဇြဳပၞာန်ဏံဂှ်ဝွံ စနူဂိတုသေပ်တေမ်ဗာ (၂၅) တုဲ နူကဵုသၞေဟ်က္ၜၚ်ဍာ်ဒမျိုဟ်ထဝါဲဂှ် ဒှ်ကရောၚ်ပၞာန် ဂေတ်ကွာန်ထ္ပက်ဒၟံၚ်ကရောၚ်ပၞာန် လ္ပာ်ကွာန်ဝဇြောန်တဝ်၊ ဨကနိ၊ ခမံက်ချံၚ်တံမွဲရ။

ဟိုတ်နူဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန် အပ္ဍဲပွိုၚ်ဍုၚ်ဍာ်ဗုဂှ်ရ ညးဒေသ နူကဵုကွာန်ဝဇြောန်တဝ်၊ ဨကနိ၊ ခမံက်ချံၚ်၊ ယၚေဝ်၊ ဝက်ချံၚ်တံ (၅၀၀) ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−PAN