ကအ်ကြိက်၊ သေပ်တေမ်ဗာ (၂၉)
တွဵုရးကရေၚ်၊ ရုၚ်ဌာနက္ဍိုက်က္ဍိုပ်ပရေၚ်မၞိဟ်လုပ်တိတ် (လဝက)ပွိုၚ်ဍုၚ် မၞုံအရာပ် စၟတ် (၇) ဍုၚ်ကအ်ကြိက်ဂှ် ဒးဒုၚ်စံၚ်ပလီုလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၇) အခိၚ်ဗ္တံရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူညးယိုက်ဝန်တအ်ဟၟဲတုဲ ရုၚ်လဝကဂှ် တ္ၚဲတနေံတေံ အခိၚ်ဗ္တံ ၜိုတ် (၁၁) နာဍဳ စဝ်စုတ်ကၠေၚ်ဓာတ်တုဲ စံၚ်ပလီုဏာလဝ်ရ။
ဟိုတ်နူဒးဒုၚ်စံၚ်ပလီုလဝ်တုဲ ဒးတူပၟတ်လီုလာ်လဝ် ကြပ်ဒှ် သီုအလုံစမြိုၚ်မွဲတုဲ ကပေါတ်ပရိဘောဂ မၞုံပ္ဍဲရုၚ်တအ်ဂှ်လေဝ် ဒးတူပၟတ် လီုလာ်ဆောံလေၚ်လဝ်ရ။
ရုၚ်လဝကပၟတ်တူလဝ်ဂှ် ဂကောံပလိုတ်ပၟတ်တအ် ၜိုန်ရကၠုၚ်ပလိုလဝ်ပၟတ်ကီုလေဝ် အခိၚ်နူဂယး ၜိုတ် (၁)နာဍဳမှ ဂွံပလိုတ်လဝ်ပၟတ် မာန်ရဂှ် ဂွံတီကေတ်ရ။
အတိုၚ်ညးစုက်လုက်ကဵုကံၚ်ဇြဳပၞာန်တအ် ဟီုလဝ်မ္ဂး ရုၚ်လဝက ပွိုၚ်ဍုၚ်ကအ်ကြိက်ဂှ် ဟိုတ်နူအကာဲအရာပရေၚ်ဂီုကၠီုတုဲ ပဆုဲပြံၚ်လဝ် ပ္ဍဲဍုၚ်ကအ်ကြိက် ၝောံခန်ဒဝ်နဂှ်ရ ညးယိုက်ဝန်တအ်ကီု သီုကဵုတၞးလိက်ပၟိက်ကိစ္စဇၞော်တအ် ဇီုကပိုက်ဒးဆောံလေၚ်လဝ်ဟၟဲရဂှ် ဟီုရ။
ရုၚ်ဌာနမဆေၚ်စပ် မၞုံပ္ဍဲပွိုၚ်ဍုၚ်ကအ်ကြိက် ယန္တရာဗ္ဂေတ်ပရေၚ်အုပ်ဓုပ်ကံၚ်ဇြဳပၞာန် ဇြဟတ်ဍိုန်လျဒၟံၚ်ဗွဲမဂၠိုၚ်တအ်ဂှ် ဟိုတ်နူအကာဲအရာပရေၚ်ဂီုကၠီုတုဲ ကံၚ်ဇြဳပၞာန်ဒးဗလးထောံလဝ်တဲရ။
ပရိုၚ်- သြၚ်လောန်တိုၚ်(မ်)
ဗီု – CJ
sanlontai