နဳနာဗာ၊ သေပ်တေမ်ဗာ (၂၈)
ပ္ဍဲခရိုၚ်ဟာမ်ဒါနဳယျာ မၞုံတွဵုရးနဳနာဗာ ဍုၚ်အဳရာတ်ဂှ် အပ္ဍဲပေါဲမ္ၚဵုထပ်တဲမွဲ ဟိုတ်နူပၟတ်တူက္တဵုဒှ်လဝ်တုဲ မၞိဟ် (၁၀၀) ပြၚ် ချိုတ်တုဲ (၁၅၀) ပြၚ် ကလိဂွံလဝ်ဝပ်ရောၚ် ဂွံတီကေတ်ရ။
ပ္ဍဲဂိတုသေပ်တေမ်ဗာ (၂၇) အခိၚ်နူဂယးပြဟ်ဟ်ဂှ် နူကဵုလ္ပာ်ပရေၚ်စဵုဒၞါမှာဇန်တံ ရီုဗၚ်ဂွံလဝ် မၞိဟ်သှ်ေဂျိုၚ်တဴတံရောၚ်ဂှ် ဟီုဂးလဝ်ရ။
သ္ကိုပ်အုပ်ဓုပ်အထံက်တွဵုရးဂှ် သ္ပဒတန်လဝ် ကုဌာန်ပရိုၚ်ရိုက်တာ ဒဒှ်ရမၞိဟ် ၁၁၃ တၠ ချိုတ်အာလဝ်တုဲ မဳဒဳယျာကၟိန်ဍုၚ်ပိုၚ်ဂှ်လေဝ် မၞိဟ်ချိုတ်အာ ဟွံအောန်နူကဵု (၁၀၀) ပြၚ် နွံတုဲ မၞိဟ် (၁၅၀) ပြၚ် ကလိဂွံလဝ်ဝပ်ရောၚ် ထ္မံက်ထ္ၜးလဝ်ရ။
ဟိုတ်နူဖံက်ပန်လဝ်ပၟတ်(မီးပန်း) တံဂှ်တုဲ အတိုၚ်ၝောံခန်မွဲ ပၟတ်တူက္တဵုဒှ်လဝ်ရောၚ်ဂှ် ဂကောံစဵုဒၞါမှာဇန်ဒေသတံ ဟီုလဝ်ဂှ် မဳဒဳယျာကၟိန်ဍုၚ်ပိုၚ် ထ္မံက်ထ္ၜးလဝ်ရ။
ဒဒှ်ရပ္တိတ်လဝ် ဝါရာန်ရပ်စပ် (၄) ကုတၠၝောံခန်ပေါဲမ္ၚဵုထပ်တုဲဂှ် ဌာနဝန်ဇၞော်ကာအပ္ဍဲဍုၚ်အဳရာတ် ဟီုဂးလဝ်တုဲ သမ္မတ အာဒူလာတဳ ရာတ်(ယှ်)ယှဳ အာတ်မိက်လဝ် သွက်ဂွံဂၠိုက်ဂၠါဲစၟဳတ်ကဵု ပရေၚ်ဒဒှ်ဏံဂှ် ဂွံတီကေတ်ရ။
“နူကဵုၝောံခန်ဂှ် ပၟတ်ဂဵုကၠုၚ်ကဵုအသိၚ်ဂှ် ပိုယ်ဂွံဆဵုကေတ်ရ။ မၞိဟ်ထိၚ်တံကဵု မၞိဟ်ဟွံကာတ်ဗ္ဒါဲဂှ်တံဂှ်တှ်ေ ဗၠးအာရ” သာ်ဝွံ အဳမာဒ် ယိုဝ်ဟာနာ အာယုက် (၃၄) သၞာံ မဗၠးကၠုၚ်နူကဵုဘဲပၟတ်တူဂှ် ဟီုရ။
အတိုၚ်တၚ်နၚ်ပရိုၚ်ပြဟ်ဟ်ဏံဂှ်မ္ဂး စမြိုၚ်ဂှ်ဝွံ ဟိုတ်နူသိုၚ်ခၞံလဝ် နကဵုကပေါတ်သိုၚ်ခၞံ ပၟတ်တူလောဲတံဂှ်ရ သရိုဟ်စှ်ေအာလဝ် ဗွဲမပြဟ်ဂှ် မဳဒဳယျာကၟိန်ဍုၚ်ပိုၚ်တံ သ္ဂးရ။
နူကဵုသၟိၚ်တၠအဝဵုအဳရာတ်တံကဵု ဒေသကာဒေတ်သတာန် ဂွံအခေါၚ်အုပ်ဓုပ်အပိုၚ်တံ ဒဒှ်ရဗလးလဝ် ယာန်ဖ္ဍိုက်မၞိဟ်ယဲတံကဵု ညးယိုက်ဝန်စပ်ကဵုလ္ပာ်ဂဥုဲတံ ပ္ဍဲကဵုဒၞါဲဒှ်ပရူဂှ်ဂှ် ဂွံတီကေတ် အတိုၚ်တၚ်နၚ်လလောၚ်ပ္တိတ် ဗွဲမလုပ်သၞောဝ်တံရ။
ပရေၚ်ဒဒှ်ပၟတ်တူဂှ်ဝွံ က္တဵုဒှ်အာလဝ် အခိၚ်ဒေသ ဗ္တံ ၁၀ နာဍဳ ၄၅ မိနေတ်တုဲ အခိၚ်က္တဵုဒှ်ပရူဂှ် မၞိဟ်ဂၠိုၚ်ကဵုကၠံ ဒဒှ်ရတိုန်စိုပ်ဒၟံၚ်ဂှ် ညးဂွံဆဵုကေတ် နမတ်တံ ဟီုဂးလဝ်ကဵု ဌာန်ပရိုၚ်ရိုက်တာရ။
Ref: CNA
sanlontai